AmbonVibes.com – Wali Kota Ambon Bodewin Wattimena biking lurus maksud pernyataan soal pulang kampong (Pulkam). “Kalau seng bisa hargai perbedaan, silakan pulang kampong”. Parnyataan ini par sorot bakalae-bakalae kaco di kawasan STAIN. Manurut Wali Kota, ada yang salah mangarti akang padahal akang seng singgung kalompok, suku, atau golongan tartantu.
Dalam video klarifikasi yang dapa bagi di akun Facebook pribadi, Kamis (27/11/2025), Wali Kota Bodewin tegaskan ungkapan Pulkam akang kaluar dalang samangat kabersamaan par jaga Kota Ambon sabage rumah barsama.
“Parnyataan beta yang bilang kalo seng bisa hargai parbedaan, silaka pulang kampong, itu akang pung maksud, ada tanggong jawab katong sama-sama par jaga Kota Ambon yang katong cinta. Salama ini pemerentah kota usaha bagemana katong bisa bangong hidop barsama di kota Ambon,” ujarnya.
Bodewin tekankan, Ambon cuma bisa jadi ruang aman par samua orang kalo samua masyarakat pegang komitmen jaga harmoni di tengah keberagaman.
Wali Kota Bodewin juga jelaskan, jika ada persoalan kriminal, mekanisme pananganan haros bawa ka aparat penegak hukum, bukan respons deng tindakan yang biking situasi tamba tarbae.
“Sabage orang yang tinggal di Ambon, katong samua pung tugas jaga kota ini par tatap aman, tatap dame sahingga samua bisa aktivitas deng bae,” tambahnya.
Bodewin pastikan, pemerentah kota salalu utamakan kaamanan deng katartiban sabage syarat utama kahidopan sosial masyarakat.
Dia tegaskan kumbali, seng ada sadikit pun maksud singgung kealompok, suku maupun golongan tertentu dalang parnyataan ‘Pulkam’ itu.
“Tanggong jawab beta sabage Wali Kota itu jamin saluruh orang yang tinggal di Ambon par rasa nyaman dalang dia pung hidop. Tagal itu beta harap katong samua bisa hidop sama-sama, baku hargai, baku jaga,” tuturnya.
Bodewin minta maaf kalo ada yang rasa tarsinggung. Dia minta masyarakat lia substansi pernyataan ‘Pulkam” sabage ajakan par jaga Ambon sama-sama.
Sampe berita ini dapa bage, video klarifikasi Wali Kota Ambon su dapa nonon 73.217 kali deng dapa bage 225 kali oleh warganet. Respons publik kas unju basar sakali masyarakat pung parhatian par jaga karukunan di Kota Ambon. (Keket)
