AmbonVibes.com – Tim Pengendali Inflasi Daerah (TPID) Kota Ambon biking rapat koordinasi. Dong mo pastikan stok bahan pokok cukup tasadia, par maso Kajadiang-Tambaru (Nataru). Rapat di Ruang Vlissingen, Balai Kota Ambon, Senin (24/11/25). Wakil Wali Kota Ambon Ely Toisutta pimpin rapat, lalu ada kas datang distributor bahan pangan.
Waktu kase arahan, Wawali bilang koordinasi ini paleng penting tagal tren nae harga bahan kabutuhan pokok saban kali maso Desember. Padahal, daya beli masyarakat justru turong.
“Biasa kalo maso 1 Desember, bahan–bahan kebutuhan pokok di pasaran mulai bagara nae mar seng sabanding deng daya bali masyarakat yang lebe taturung,” ujarnya.
Tagal itu, Pemkot Ambon parlu pastikan stok pangan cukup tasadia, seng cuma par Nataru mar juga sampe tiga bulang ke muka nanti. Informasi itu dapa dar laporan para distributor yang hadir dalang rapat.
Wawali juga biking inga, permintaan pangan akan nae di bulang Desember, bae dar masyarakat maupun instansi yang biking acara Natal. Dia harap distributor seng manfaatkan kondisi itu par kas nae harga suka-suka.
“Beta minta deng hormat, jaga kondisi ini par katong sama–sama baku mangarti,” katanya.
Wawaly Ely tambahkan, pemerintah mo biking inspeksi mendadak (sidak) par pastikan data stok yang distributor dong bilang, akang pas deng kondisi lapangan. Langkah ini penting par cegah spekulasi pedagang yang bisa picu harga-harga nae.
“Katong mo sidak ka distributor par tau secara nyata apakah data yang dong sampekan sesuai dengan di lapangan, deng pantau harga bahan–bahan pokok seperti bawang, minyak goreng, gula dan laeng-laeng,” jelas Ely.
Di akhir rapat, Ely minta TPID Kota Ambon tetap siaga deng jalankan tugas pokok fungsi deng maksimal. Kehadiran pemerintah, katanya, musti masyarakat dapa rasa akang, lebe-lebe par jaga stabilitas harga kebutuhan pokok, di muka Nataru.
Deng langkah koordinatif ini, Pemkot Ambon harap kestabilan harga dapat tajaga deng bae dan masyarakat bisa maso perayaan Nataru deng tanang. (Leo)
