AmbonVibes.com – Kota Ambon kumbali biking prestasi di bidang parawisata nasional. Pada Anugerah Parawisata Indonesia (API) Award ke-9 Tahun 2025, Negeri Rutong deng Negeri Nusaniwe sukses bawa nama Ambon ka panggung apresiasi nasional.
Kepala Dinas Pariwisata dan Kebudayaan (Disparbud) Kota Ambon Christian Tukloy kase tau, penghargaan ini layak dapa apresiasi, deng jadi tolok ukur par desa ato negeri laeng yang mo biking majo dong pung pariwisata.
“Beta kira di Desa/Negeri harus siapkan infrastruktur pariwisata, agenda-agenda harus dong biking deng lebe maksimal kalo mo jadi tujuan wisata. Termasuk kase siap warga pung kalakuang par wisatawan seng rasa fals waktu dong jalang-jalang ka lokasi wisata,” ungkap Tukloy, Rabu (19/11/2025).
Dalam ajang tersebut. Rutong dapa juara dua par kategori Minuman Tradisional deng buah tomi-tomi yang dong olah jadi jus. Sadangkan Nusaniwe dapa juara tiga par kategori wisata olahraga dan petualangan, khususnya paragliding.
“Proses penilaian dong biking iko platform digital. Dari 17 kategori, Kota Ambon maso penilaian dua kategori, dapa saring jadi 10 basar, lalu laste-laste maso tiga basar,” jelas Tukloy.
Tukloy tekankan, API Award yang dong biking saban taong akang pung dpak Basar par pariwisata daerah. Dia pun Kase samangat par desa, negeri, kelurahan laeng di Ambon par biking bae infrastruktur, atraksi, deng budaya par bisa iko taong muka.
“Jadi beta harap, Desa/Negeri/Kelurahan laeng bisa ambe bageang di API, benahi samua infrastruktur pariwisata deng atraksi budaya yang ada,” pungkasnya.
Penghargaan API Award 2025 dong biking dalang malam puncak di Kabupaten Bengkayang, Provinsi Kalimantan Barat, Selasa (18/11/2025). (New)
