AmbonVibes.com — Telkomsel Regional Maluku dan Papua ada biking acara di kampus Universitas Pattimura (Unpatti), Rabu (12/11/2025). Akang pung nama, Campus Roadshow Papua Maluku Digital Boothcamp (PMDB) 2025. Dong su biking akang par tiga kali di Ambon. Telkomsel memang mau jareng talenta-talenta unggul dar Maluku den Papua dari acara bagini.
Vice Presiden Consumer Bisnis Telkomsel Pamasuka Muharlis bilang, PMDB 2025 pung tujuan bimbing generasi muda par biking karya inovatif melalui pelatihan, seminar, deng talkshow.
“Kegiatan ini katong kase nama Planting Seeds atau tanam benih. Katong bimbing bibit-bibit unggul, piara sampe pete hasil. Katong mau bawa bakat yang paleng bae ka program-program Telkomsel, bae lokal, nasional, deng global,” jelas Muharlis.
Selama PMDB, peserta mahasiswa maupun luar kampus dapa kesempatan pamer dong pung inovasi yang bisa jadi solusi par kebutuhan masyarakat. Program ini sadia reward dan mini project funding par karya terbaik.
Kepala Dinas Kominfosandi Ronald H. Lekransy sambut bae kegiatan ini. Ia tekankan, bangun ekosistem digital yang kuat itu penting par jawab percepatan digitalisasi.
“Event ini jadi langkah strategis par cipta partner yang siap hadapi kecepatan zaman. Atas nama Pemkot Ambon, katong ucap danke Telkomsel yang su dukung visi Ambon Kota Cerdas,” ungkap Lekransy.
Lekransy harap PMDB 2025 bisa biking kuat SDM digital, ekosistem digital regional, deng pung dampak positif par ekonomi Maluku dan Papua.
Rektor Unpatti Prof. F. Leiwakabessy kase apresiasi taga Unpatti kumbali jadi lokasi prioritas PMDB. Rektor dorong mahasiswa pakai kesempatan ini par tambah skill, pengetahuan, deng sikap digital yang kompetitif.
“Kesempatan macang bagini seng salalu ada, jadi mahasiswa musti jang menyerah par ambe akang,” tegas Prof. Leiwakabessy.
PMDB 2025 jadi momentum penting par biking maju talenta digital Maluku dan Papua, deng dorong inovasi yang pung manfaat nyata par masyarakat dan ekonomi lokal. (Keket)
