AmbonVibes.com — Kepolisian Daerah Maluku buju anam orang tersangka parkara babakar dan kas rusak rumah di kawasan Hunuth/Durian Patah, Kota Ambon, par capat bawa diri dan unju niat bae karja sama dalang proses hukum yang ada samantara bajalang.
Parkara ini akang kamuka cuma tagal bakalae anana skolah, 19 Agustus 2025. Tagal dong bakalae, satu siswa SMK Negeri 3 Ambon maninggal dunya.
Tagal korban su putus nafas, dia pung orang sudara seng tahan emosi, lalu dong biking aksi bakar rumah dan kas rusak rumah di tampa kajadiang.
Direktorat Reserse Kriminal Umum (Ditreskrimum) Polda Maluku su tetapkan anam orang jadi tersangka. Dong pung nama BT, FW, GW, RW, SW, dan ZN, yang sakarang ini maso Daftar Pencarian Orang (DPO) dan masih dapa cari dari polisi.
“Katong minta bae-bae par dong anam capat bawa diri kamari. Jang sambunyi atau lari. Iko proses hukum saja par unju tanggung jawab,” tegas Kabid Humas Polda Maluku Kombes Pol. Rositah Umasugi, S.I.K.
Pihak kepolisian tekankan, serahkan diri deng sukarela akang biking lancar proses penyidikan dan dong bisa unju niat bae par tanggungjawab perbuatan.
Polda Maluku tegaskan komitmen par indak tegas setiap pelaku tindak pidana yang ganggu keamanan dan ketertiban masyarakat. Proses hukum kasus ini akang bajalang deng profesional, transparan, dan sesuai aturan perundang-undangan.
Masyarakat juga dapa minta par tetap tenang, seng gampang par makang cabar, kas tinggal polisi karja iko polisi pung tugas.
“Polda Maluku pung komitmen biking kelar kasus ini sampai tuntas,” tutup Kabid Humas. (Keket)
