AmbonVibes.com – Pung jabatan seng maeng-maeng. Duta Basar Australia par Indonesia. Itu dia Rod Brazier. Dengan dua tangang, laklaki ramas sagu campur ampas kalapa paru.
Abis itu, Rod kas maso sagu kalapa di porna panas. Gula merah di dalang piring, ontua kas pinda ke sagu pung bageang atas.
Waktu sagu su masa, Dubes Rod ungkel akang dari porna ka piring. Abis itu antua makang.
“Enak,” kata Rod lalu bage-bage akang par orang-orang yang ada nonton.
Ini bukang carita kewel. Dubes Rod Brazier memang bakar sagu gula. Mama Yoty Silooy di Sanggar Booyratan ajar Dubes bakar sagu gula.
Duta Basar Australia par Indonesia Rod Brazier memang ada datang ka Ambon dar hari Sabtu (18/10). Mar bakar-bakar sagu itu, pas har Minggu (19/10) sore tadi.
Duta Basar pi ka Negeri Amahusu par bakudapa deng komunitas balayar, Ambon Sailing Community (ASC).
Komodor ASC Nico Tulalessy deng para pengurus laeng tarima dubes di Sanggar Booyratan. Rombongan Dubes Rod Brazier dapa sambut deng tarian artis-artis muda.
Salaeng dapa syal dan sambutan satu sloki sopi, Dubes Rod juga baku tukar tanda mata deng ASC. ASC kase ukulele tampurung kalapa, dubes kase boneka kangguru.
Dubes sanang bisa lia anana manari, manyanyi, tukar carita.
“Beta paleng sanang dapa lia tarian deng nyanyian yang bagus,” kata Dubes Rod.
Selain bakar sagu, Dubes Rod dan rombongan juga Iko manari katreji Ambon, di bawah komando Yonas Silooy. Akang rame paskali.
Waktu dapa wawancara deng wartawan, Rod bilang Indonesia deng Australian pung hubungan bae.
“Biar bagitu, Australia deng Maluku baku birman. Beta sanang paskali datang di sini, harap Ambon deng Darwin tetap karja sama eso-eso,” kata Rod. (Opa)
