AmbonViber.com – Pemerintah Kota Ambon resmi lantik 1.152 Pegawai Pemerintah dengan Perjanjian Kerja (PPPK) Tahap I Formasi 2024, di Convention Hall Maluku City Mall, Rabu (1/10/2025). Wali Kota Bodewin Wattimena ambe sumpah deng kase SK par dong yang dapa lantik.
Waktu kase sambutan, Wali Kota Bodewin bilang pelantikan ini jadi momentum penting para tata pegawai di Pemkot Ambon.
“Hari ini ale dong resmi jadi ASN, PPPK. Atas nama Pemkot dan warga Ambon, salamat deng sukses,” ujar Bodewin.
Wali Kota bilang, proses panjang ini bukti pemerintah paleng serius perhatikan ASN pung hak-hak. Selain pelantikan tahap I, Pemkot juga pung rencana pelantikan tahap II lebe dar 700 PPPK deng kira-kira 250 PPPK paruh waktu, setelah samua administrasi kelar.
“Kalo samua klar, persoalan tenaga honorer atau kontrak di Pemkot Ambon akang beres,” jelasnya.
PPPK yang baru dapa lantik ini dong karja iko perjanjian satu tahun, dan nanti evaluasi par biking panjang.
“Yang karja bae, disiplin, dan pung dedikasi pasti dapa kas panjang sampe umor pansiong. Kalo seng, kontrak bisa dapa kas putus,” tegas Bodewin.
Wali Kota juga kasi inga etos karja, disiplin, deng tanggung jawab, par samua PPPK bisa kase kontribusi positif par pembangunan Kota Ambon.
Waktu acara pelantikan, ada Wawali Ely Toisutta, Forkopimda, anggota DPRD Kota Ambon, Kepala UPT BKN Ambon, Pj. Sekda Robby Sapulette, deng pimpinan OPD Pemkot Ambon. (Leo)
