AmbonVibes.com – Wali Kota Ambon Bodewin Wattimena harap paskali, Pasar Apung Batumerah ato Hatukau Water Front City yang molai bangong akang, nanti bisa bawa dampak positif ekonomi daerah pung bae.
Wali Kota Bodewin bilang akang waktu kase sakapor sirih, di lokasi “Ground Breaking” Pantai Ruko Batumerah, Kecamatan Sirimau, Rabu (8/4/26).
“Katong harap pambangunan pasar ini akang bawa dampak positif par kas nae partumbuhan ekonomi di Kota Ambon. Akang tantu dukung upaya kota deng provinsi,” ugkap Bodewin.
Dia beberkan, pambangunan yang mo biking ini akang iko konsep Waterfront City yang pung tujuan manata kawasan pasisir jadi lebe bae deng bawa dampak langsung par kasajahteraan kota manise, lebe-lebe yang tinggal di pinggir pante.
“Jadi dalang konsep ini, katong harap pambangunan sapanjang pasisir pante di Teluk Ambon ini dapa biking sacara tarancang, tarintergrasi deng presisi par panampatan ruang bisa bajalang deng bae,” jelas Bodewin.
Salaeng itu, Wali Kota Bodewin juga taruh harapan, pambangunan ini bajalang bae deng mampu kas kurang masalah sampah pasar yang masih saja orang lego ka dalang laut.
“Pasar ini musti pastikan seng turung buang sampah di laut. Dalang pangalolaan, katong harap bisa biking akang bae-bae, iko apa yang su dapa rancang,” tandas Bodewin.
Salaeng itu, Bodewin kase apresiasi par Pemerentah Provinsi (Pemprov) Maluku yang su bakarja sama par bantu Pemkot dalang akang pambangunang.
“Katong ucap danke par Bapak Gubernur Hendrik Lewerissa deng Pemerentah Provinsi Maluku tagal memang katong parlu dukungan pono-pono dar provinsi par proses ini sampe akang bawa dampak bae par samua pihak,” pungkas Bodewin. (keket)
