AmbonVibes.com — Pawe Ogoh-ogoh par sambut Hari Raya Nyepi 1948, akang tapusat di Gong Pardamean Dunya, Rabo (18/3/2026). Kagiatang ini seng sakadar atraksi budaya, mar juga sarat deng pasang-pasang moral mangane parsaudaraan dan pangandalian diri manusia.
Tokoh agama, tokoh masyarakat, pimpinan lembaga, deng umat Hindu dan warga Kota Ambon bakumpul di Kintal Gong Pardamean Dunya.
Kamuka skali, acara mulai deng pujian syukur par Sang Hyang Widhi Wasa. Parayaan taong ini pake tema “Vasudhaiva Kutumbakam: Satu Bumi, Satu Kaluarga”. Akang tema par mo bilang tegas, samua umat manusia itu satu kaluarga basar di bumi yang sama.
Katua Parisada Hindu Dharma Indonesia (PHDI) Kota Ambon Ida Bagus G. Dwibawa bilang, nilai toleransi deng karukunan akang jadi kunci par jaga kahidupan barsama.
“Waktu katong toleransi, rawat karukunang, deng hormat akang parbedaan, itu sama saja deng katong jaga ruma barsama umat manusia,” ujar Ida Bagus.
Ida Bagus bilang, ogoh-ogoh bukang cuma patung raksasa yang dapa pikol kuliling, malaengkang simbol refleksi diri manusia tarhadap energi negatif yang seng saimbang.
“Ogoh-ogoh marupakan refleksi diri manusia takait kakuatan energi yang seng saimbang, bae dalang diri individu mopun dalang kahidupan sosial,” jelas Ida Bagus.
Dalam pawe Ogoh-Ogoh, ada dua simbol utama, yakni Buto Ijo yang jadi lambang kasarakahan, kamarahan, deng kakuasaan sondor kandali, deng Buta Lari warna merah yang gambarkan emosi seng takandali deng egoisme.
Menurut Ida Bagus, dua simbol itu mo kastau bahwa konflik yang pica di dunya saringkali barawal dar manusia yang seng mampu kontrol diri sandiri.
“Ogoh-ogoh bukang gambaran makhluk di luar manusia, malaengkang cermin sisi galap manusia itu sendiri,” tegas Ida Bagus.
Abis pawe Ogoh-Ogoh, umat Hindu mo maso parayaan Hari Raya Nyepi 19 Maret 2026. Hari suci ini jadi momentum kahaningan deng refleksi diri di tengah hiruk-pikuk kahidupan modern.
Di Hari Nyepi, umat Hindu biking Catur Brata Penyepian, yaitu seng kas manyala api, seng karja, seng pi mana-mana, deng seng hibur diri.
“Kakuatang manusia yang paleng basar bukang kuasa orang laeng, mar kuasa diri sandiri,” ujar Ida Bagus.
Sabalong ini, umat Hindu juga su biking upacara Meslati sabage bantuk panyucian diri deng alam samesta.
Pawe ogoh-ogoh yang PHDI Provinsi Maluku biking ini akang mulai dar kintal Gong Pardamaean Dunya, lalu lewat ruas-ruas jalang utama di Kota Ambon macang Jalang DI Panjaitan, Jalang Pattimura, Jalang Ahmad Yani, lalu bale ka Lapangan Mardeka.
Tradisi ogoh-ogoh sandiri marupakan bageang dar upacara Tawur Kesanga, yang pung tujuan user roh jahat sabalong Nyepi. Patung ogoh-ogoh yang dapa pikol kuliling nanti dapa bakar sabage simbol pambersihan alam deng pangendalian hawa nafsu manusia.
Salaeng kagiatan ritual, parayaan Nyepi taong ini juga dapa isi deng aksi sosial macang pambagean takjil, donor darah, deng tanang pohong. Akang jadi bukti, nilai spiritual seng cuma kas unju dalang ibadah, mar juga dalang bantuk paduli par sasama deng lingkungan. (Leo)
