AmbonVibes.com — Wali Kota Ambon Bodewin Melkias Wattimena ada minta par warga Kota Manise samua bisa sama-sama baku jaga biking aman deng dame par maso tiga hari basar agama-agama.
Wali Kota Bodewin bilang akang pas abis iko pawai ogoh-ogoh umat Hindu yang tarangke Hari Raya Nyepi Tahun Saka 1948 di Gong Perdamaian Dunia, Rabo (18/3/2026).
Manurut Bodewin, dalang waktu deka-deka ini, warga Kota Ambon mo maso tiga momentum basar kaagamaan, yakni Nyepi, Idul Fitri 1447 Hijriah, deng Paskah.
Dia bilang, panting paskali manjaga situasi kaamanan deng katartiban par sluruh rangkean parayaan bisa bajalang aman deng lancar.
“Maski katong hidop dalang kabaragaman, akang seng boleh biking katong tapica. Justru tabola-bale, akang musti jadi katong pung kakuatang par biking samua warga Kota Ambon jadi satu, dan masyarakat Provinsi Maluku jadi satu lai,” ujar Bodewin.
Bodewin harap samua elemen masyarakat bisa maeng rol deng aktif par biking daerah jadi kondusif, sahingga satiap umat baragama bisa ibadah deng sagala bae.
“Tagal itu, mari katong pastikan kaamanan deng katartiban di Kota Ambon tetap tajaga, sahingga saluruh parayaan hari basar kaagamaan bisa bajalang deng bae,” tandas Wali Kota Bodewin Wattimena. (Piere)
