AmbonVibes.com – Pemerentah Kota (Pemkot) Ambon tarus barupaya kas kuat sektor kesehatan par biking bae kualitas palayanan masyarakat. Salah satu langkah itu, Wali Kota Bodewin Wattimena deng jajaran, baku dapa Wakil Menteri Kesehatan (Wamenkes) Benjamin Paulus Octovianus.
Akang kagiatan baku dapa itu, bisa dapa baca akang di akun facebook pribadi Bodewin Wattimena, Senen (9/3/2026).
Dalang partemuan itu, sajumlah isu strategis di bidang kesehatan dapa bahas, tarlebe takait kabutuhan palayanan kesehatan masyarakat di Kota Ambon. Wali Kota Ambon sampekan rancana pambangunan rumah saki yang nanti Pemkot kelola akang.
Manurut Bodewein, kalo rumah saki itu su ada, akang bisa biking tamba akses layanan kesehatan par masyarakat, lebe-lebe yang parlu layanan medis deng biaya lebih tajangkau.
“Rencana itu harap bisa bantu biking luas akses par warga yang parlu layanan medis deng biaya tajangkau,” ujar Wali Kota.
Salaeng rencana pambangunan rumah saki, Wali Kota juga soroti kondisi fasilitas kesehatan tingkat partama, macang puskesmas yang jadi garda paleng muka palayanan kesehatan masyarakat.
Dia kas usul paningkatan sarana deng prasarana puskesmas par pelayanan kesehatan dasar bisa bajalang deng optimal.
Pambahasan dalang partemuan itu juga manyantuh parsoalan panyakit manular yang masih jadi perhatian di daerah, tarmasuk kasus Tuberkulosis (TBC).
Wali Kota Bodewin harap ada dukungan deng karja sama pemerentah pusat par biking kuat program pencegahan deng pananganan panyakit tersebut di Kota Ambon.
Manurut Bodewin, langkah koordinasi deng pemerentah pusat jadi bageang dar upaya pemerentah daerah par kas nae kualitas palayanan kesehatan par masyarakat Kota Ambon.
Dia juga harap barbage usul Pemkot Ambon ka pusat bisa dapa parhatian sahingga kabutuhan layanan kesehatan masyarakat bisa jalang deng bae.
“Beta komitmen tarus bakarja par kapantingan masyarakat deng samangat ‘Beta Par Ambon, Ambon Par Samua’,” tutup Wali Kota Bodewin Wattimena. (red)
