AmbonVibes.com – Parkara dugaan kakarasang tarhadap Veronika Rahanyat, karyawati perusahaan PT Lik Mutiara di Kecamatan Kei Kecil Barat, Kabupaten Maluku Tenggara (Malra), tarus dapa parhatian publik. Kaluarga korban kase tau kronologi kajadian har Kamis (19/2/2026) dini hari di Pulau Lik.
Akang kamuka sakitar jam 06.00 WIT. Kakak korban nama Simon yang juga karja di parusahaan yang sama, tabangong tagal dapa dengar suara orang bataria dari arah Veronika pung kamar.
Abis dapa dengar orang bataria, Simon lakas-lakas pi kamar korban. Sampe di dalang kamar, dia lia ampa sampe lima orang su ada di situ.
Manurut carita kaluarga, waktu itu di korban pung badang-badang su ada luka-luka, deng salah satu tangang ada bangka-bangka. Dari dia pung badang, juga ada noda-noda darah. Simon usaha par tanya-tanya par dia pung Ade Veronika mar korban su seng basuara lai.
“Waktu partama kali lia korban di kamar, korban su dalang kaadaan seng bardaya,” ungkap Simon sabagemana pihak keluarga kas tau akang.
Sajumlah tamang kerja di parusahaan pi lapor ka pimpinan parusahaan deng sakalian inta bantuan transportasi. Dalapang orang lalu bawa korban ka Ohoi Debut par lanjut ka RSUD Karel Sadsuitubun.
Sakitar jam 07.30 WIT, korban su sampe di rumah sakit deng langsung ka ruang UGD par dapa pananganan medis.
Dokter yang pegang korban sempat tanya ka Simon mangane panyaki yang korban dapa akang. Mar Simon mangaku seng tau soal dia pung ade pungkasehatan.
“Beta seng tau korban saki apa. Waktu beta maso ka kamar, korban su seng pung kakuatang,” jelas Simon.
Parkara ini lalu biking sampe OKP Cipayung deng Aliansi Perempuan Kei bagara ka Polres Malra, Sabtu (28/2/2026). Dong desak transparansi dar panyalidikan yang aparat polisi biking akang.
“Katong mandesak transparansi pono-pono dar hasil panyalidikan yang Polres Malra su biking,” ujar Koordinator Aksi Ima Sarah Reliubun.
Manurut dia, OKP deng Aliansi manuntut kapolisian buka saluruh hasil panyalidikan sacara tabuka par publik deng kaluarga korban, tarmasuk kase panjalasang rinci kronologis dar muka pananganan perkara sampe kasimpulan akhir.
“Transparansi itu bantuk akuntabilitas deng upaya par jaga kaparcayaan publik tarhadap institusi panagak hukum,” pungkas Ima Sarah Reliubun. (Vera)
