AmbonVibes.com – Ruas jalang raya nasional yang dapa kas nama Jalan Laksdya Leo Wattimena lumayan panjang par ukuran Ambon. Akang pung titik mulai di Pertigaan Durian Patah, trus lewat Waiheru, Negeri Lama, Nania, sampe ujung di Mata Passo, pas depan Sakolah Polisi Negara (SPN), baku tatongka Jalang Wolter Monginsidi deng Jalang Sisingamangaradja pung ujong.
Jalan Laksdya Leo Wattimena pung panjang 5.78 kilometer. Akang pung badang jalang ada yang paleng lurus macang di muka Markas Tantara di Waiheru. Sadangkan bageang laeng akang taero-ero iko bibir Teluk Ambon Dalam.
Tarnyata, nama jalan bukang cuma par jadi patunjuk alamat deng lalu lintas. Nama jalang juga bisa par jadi parigi inspirasi deng imajinasi vor saparu orang. Salah satunya, Wali Kota Ambon Bodewin Wattimena.
Ini carita Bodewin. Dolo-dolo waktu kacil di Passo, partama kali baca nama Jalang Laksdya Leo Wattimena, Bodewin langsung eleng. Ada juga orang Wattimena bisa jadi nama jalang.
“Beta bangga lai ada orang fam Wattimena bisa jadi nama jalang,” carita Bodewin waktu bicara di muka Kalurga Basar Wattimena Satu Moyang di Baileo Oikumene Ambon, Sabtu (27/12/2025) malang hari.
Dari kabanggaan itu, Bodewin dapa satu hal lai. Dalang buku alamat telepon yang PT Telkom biasa kase par orang yang pasang telepon rumah, nama-nama keluarga Wattimena abis banya.
“Nomor satu paleng banya itu Wattimena, abis itu baru Wattimury,” kenang Bodewin.
Dari cuma nama jalang deng daftar nama di buku telepon, Bodewin mangaku paleng bangga deng fam Wattimena. Lalu pas abis lulus STPDN trus karja di Pemkab Masohi, Bodewin dapa tuju tamang karja, samua Wattimena dar negeri Akon, Gorom, Titaway, Itawaka, Seri, deng Siwang. Ini jua biking bangga.
“Jadi mari katong bangga deng Wattimena. Apalai, sakarang samua su taika dalang wadah Wattimena Satu Moyang. Jaga bae-bae supaya katong samua tahubung, laeng kanal laeng, tau asal usul, supaya laeng sayang laeng,” pinta Bodewin.
Manurut Bodewin, salaeng bangga Wattimena, samua ana cucu Wattimena Satu Moyang musti jadi contoh par samua orang. Wattimena Salam deng Sarani, Wattimena dar kampung beda-beda bisa baku tahubung, itu contoh bae par samua orang.
“Deng bagitu, Wattimena bisa jadi agen-agen yang bantu pemerentah par samua orang pung bae,” ucap Bodewin.
Sabalong Bodewin kase sambutan itu, dalang ibadah syukur har Kajadiang, Pandita Elifas Maspaitella pung refleksi Natal ada sentil Wattimena banya paskali. Salah satunya, ana cucu Wattimena musti pastikan, salalu muncul sosok-sosok Wattimena yang biking bae vor dunya.
Pandita Elifas ada ambe dua moto yang oras ini ada paleng top. Partama, dar Gubernur Hendrik Lewerissa, ada moto “Par Maluku Pung Bae”. Kadua, dar Bodewin Wattimena, ada moto “Beta Par Ambon, Ambon Par Samua”.
Dari sini, manurut Pandita Elifas, ana-cucu Wattimena itu bukang cuma par urus Wattimena pung kahidopang mar Wattimena par samua orang di luar Wattimena. (Opa)
