AmbonVibes.com – Wali Kota Ambon Bodewin Wattimena kas pasang yang tegas sakaligus reflektif par samua Aparatur Sipil Negara (ASN) di lingkup Pemerentah Kota Ambon waktu apel pagi terakhir taong 2025, di Kintal Taman Pattimura, Senen (22/12/2025).
Samua ASN Pemkot Ambon iko apel yang jadi momentum par evaluasi tutu taong, sakaligus ruang tabuka par Wali Kota sampekan kondisi riil kauangan daerah, jadwal vakansi Kajadiang deng Tambaru, juga tantangan barat yang akan tatongka di taong 2026.
Dalang arahan, Walikota Bodewin tegaskan, ASN itu bageang panting dar kontribusi pembangunan bangsa deng negara, jadi profesionalisme, loyalitas, deng tanggung jawab musti tarus jaga akang, maski daerah ada dapa tekanan fiskal.
Salah satu poin paleng krusial yang Wali Kota sampekan itu komitmen Pemerentah Kota Ambon par tetap bayar kepeng Tunjangan Penghasilan Pegawai (TPP) ASN salama satu bulan, maski kondisi kauangan daerah dalang keadaan susah.
Bodewin bilang, kasulitan itu samua tagal kabijakan pemerentah pusat yang sapihak deng talalu paparipi, sampe akang pung dampak langsung di kamampuan fiskal daerah.
“Demi penuhi komitmen ini, beta su minta Sekda deng BPKD cari sumber dana. Kalo seng ada, mo jual jual kantor saja ya. Ini manunjukkan banar-banar susah lawang katong tongka situasi ini,” ujar Bodewin dengan nada sindiran.
Maski bagitu, Bodewin tegaskan, TPP satu bulan yang tatunda musti tetap bayar sondor tawar-tawar, sabage bntuk tanggung jawab pemerentah daerah par ASN.
Dalang kasampatan itu, Wali Kota juga umumkan jadwal libur Har Kajadiang 2025 deng Tambar 2026 bagi ASN Pemkot Ambon. Dia sampekan surat edaran resmi su kaluar dan dapa sosialisasi.
ASN Pemkot Ambon mulai vakansi 23 Desember 2025 sampe 4 Januari 2026, dan samua pegawai wajib maso karja kumbali 5 Januari 2026.
“Pake waktu vakansi ini deng bae, bakumpul deng kaluarga, rayakan Kajadiang, tetap ati-ati dalang parjalanang,” imbaunya.
Bodewin juga sebut skema Work From Home (WFH) nanti mo dapa atur lebe jao, malalui Peraturan Wali Kota, tarmasuk pangaturan sistem kerja paruh waktu eso-eso.
Wali Kota biking inga, taong 2026 nanti mo jadi periode yang jao lebe barat, tarmasuk ada potensi potong Transfer ke Daerah (TKD) dar pemerentah pusat.
Dia meminta samua ASN par jang pesimis atau gampang putus asa, malaengkan tetap solid deng siap tongka sagala risiko pambangunan kota.
“Taong 2026 nanti mo jadi ujian yang lebe barat. Mar katong seng boleh pesimis deng putus asa. Ini ujian baru par bangong Kota Ambon, dan katog musti tongka sama-sama,” tegasnya.
Pada kasampatan itu, Bodewin sampekan Salamat Kajadiang par samua ASN, sakaligus parmohonan maaf tagal masih banya harapan pagawr yang balong samua dapa jawaban yang bae. (Piere)
