AmbonVibes.com — Pemerentah Kota (Pemkot) Ambon tarus unju komitmen kuat biking abis masalah tanaga honorer. Komitmen itu deng tegas Wali Kota Ambon Bodewin Wattimena sampekan waktu kase sambutan dalang aengambilan Sumpah/Janji dan Palantikan Pagawe Pemerentah deng Parjanjian Karja (PPPK) Paruh Waktu di lingkungan Pemkot Ambon taong 2025. Kagiatang itu barlangsung di Ruang Rapat Vlissingen, Balai Kota Ambon, Senin (15/12/2025).
Wali Kota Bidewin tegaskan, kabijakan ini marupakan tindak lanjut kabijakan pemerentah pusat par biking abis masalah tanaga honorer, yang secara bartahap juga mo barlaku di daerah, tarmaso di Kota Ambon.
“Proses panyalesaian tanaga honorer di Pemkot Ambon tarus bajalang. Hari ini katong su sampe di tahap panting, yakni ambe sumpah deng palantikan PPPK paruh waktu. Artinya, masalah tanaga honorer yang salama ini ada, palang-palang mulai katong biking abis,” ujar Bodewin.
Pada kasampatang itu, Wali Kota ungkapkan, sabanya 170 PPPK Paruh Waktu resmi dapa lantik. Akang pung rinci, 70 tanaga teknis, 89 guru, deng 11 tanaga kesehatan.
“Har ini katong basyukur tagal 170 PPPK paruh waktu su katong angka. Ini jawaban atas panantian panjang sudara-sudara sakalian,” katanya.
Bodewin tegaskan, pangangkatan PPPK Paruh Waktu ini marupakan bantuk kahadirang pemerentah pas kase kapastiang status karja par tanaga honorer yang salama ini su mangabdi.
Lebe lanjut, Wali Kota buka peluang par PPPK Paruh Waktu no dapa usul jadi PPPK pono waktu kalo tasadia formasi dar Kementerian PANRB. Mar, hal itu harus iko kinerja deng disiplin yang bae.
“Kalo sudara karja deng bae, pegang sumpah deng janji yang su ucap, maka peluang par dapa angka jadi PPPK poono waktu tetap tabuka, dan ini mo tarus katong parjuangkan,” tegasnya.
Bodewin tekankan, seng boleh ada lai angka tanaga honorer baru di samua OPD, sakolah, maupun unit karja laeng di lingkup Pemkot Ambon.
Kabijakan itu par jadi langkah tegas cegah panambahan beban balanja aegawe yang sakarang su sampe 48 parsen, lebe dar batas ideal yang pemerentah pusat ator akang.
“Katong inging parsoalan tanaga honorer abis di sini. Jangan ada lai OPD atau sakolah yang angka tanaga honorer baru. Pemkot Ambon ada tata kumbali ASN par lebe efektif deng profesional,” ujarnya.
Wali Kota ajak samua PPPK Paruh Waktu karja deng bae, ikhlas, kase kontribusi nyata dukung 17 program prioritas Pemkot Ambon.
Bodewin juga dorong samua ASN jadi agen parubahan di lingkungan masing-masing, tarmaso edukasi masyarakat jaga kebersihan, ketertiban, deng kaamanan Kota Ambon.
“Kalo samua ASN aktif di dia pung lingkungan, akang pung dampak paleng basar. Katong pung tanggong jawab barsama jaga Ambon tetap aman, dame, deng nyaman par samua,” pungkas Bodewin. (keket)
