AmbonVibes.com — Pemerentah Kota (Pemkot) Ambon ada samantara biking skema work from home (WFH) alias karja dar rumah par aparatur sipil negara (ASN), mulai taong 2026. Samua ini par iko kondisi tagal Pemerentah Pusat potong kepeng Transfer ke Daerah (TKD). Wali Kota Ambon Bodewin Wattimena bilang akang pas abis pimpin apel pagi di Balai Kota Ambon, Sanin (15/12/2025).
“Katong seng bisa maratap dan manangis deng situasi bagini. Katong musti sesuaikan diri deng kondisi ini tagal kepeng TKD dar pusat su bakurang,” ujar Bodewin.
Bodewin bilang, salah satu dampak langsung dar kepeng TKD yang bakurang adalah kepeng Tambahan Penghasilan Pegawai (TPP) juga dapa potong. Taong lalu-lalu, TPP Rp78 miliar per taong, mar sakarang cuma Rp39 miliar per tahun.
“Salaeng TPP takurang, katong juga kase relaksasi par pegawai deng skema maso kantor stenga taong, malalui pembageang karja dua shift,” jelasnya.
Bodewin ure akang, ASN mo tabage dua kalompok karja. Pada sistem ini, pagawe maso kantor salama tiga hari dan WFH dua hari dalang saminggu, baku ganti shift.
“Misalnya, minggu partama shift satu maso tiga hari dan WFH dua hari. Minggu barikut, baku ganti deng shift dua,” terangnya.
Bodewin tegaskan, panarapan WFH taong muka seng ganggu palayanan publik. Manurut dia, sistem ini justru jadi solusi par tekan balanja nonprioritas deng sondor korbankan palayanan masyarakat.
“Palayanan seng parnah barenti, tetap bajalang macang biasa. Cuma saja jumlah pagawe yang maso kantor bakurang,” tegasnya.
Bodewin mangaku, sakarang ini Kota Ambon alami kelebihan pagawe tagal panyelesaian tanaga honorer yang dapa angla jadi Pegawai Pemerintah dengan Perjanjian Kerja (PPPK) maupun pagawe paruh waktu.
Lebe lanjut, Bodewin pastikan kabijakan WFH 2026 seng langgar atorang. Pemkot Ambon, su kiring surat par Kementerian Pendayagunaan Aparatur Negara dan Reformasi Birokrasi (PAN-RB) deng Badan Kepegawaian Negara (BKN).
“Seng jadi masalah, karena kementerian juga su lebe kamuka terapkan WFH sabage bageang dar efisiensi anggaran,” pungkasnya. (keket)
