AmbonVibes.com – Ritual Cuci Negeri Soya su biking kumbali deng sagala bae, di Rumah Raja Soya, Jumat (12/12/25). Pemerentah Kota Ambon taruh parhatiang sarius par iko rawat tradisi adat. Akang pung bukti, Wali Kota Ambon Bodewin Wattimena datang lalu secara buka rangkean upacara.
Di muka pamangku adat deng masyarakat, Wali Kota tegaskan, Cuci Negeri Soya bukang sakadar tradisi seremonial, malaengkang warisan agung yang tarus hidop dalang masyarakat.
“Adat cuci negeri Soya ini warisan turung-tamurung dari tete -nene moyang par anana cucu Negeri Soya hari ini. Katong rasa syukur, akang masih tajagat, lestari deng masih biking sampe sakarangi,” ujar Bodewin.
Wali Kota bilang, pemerentah su biking pangakuan resmi par tradisi ini sabaga warisan budaya takbenda yang jadi identitas Kota Ambon.
“Adat Cuci Negeri Soya ini marupakan warisan tak benda yang dapa pangakuan pemerentah dan su manjadi ciri khas negeri adat Soya, deng juga ciri khas Kota Ambon,” jelasnya.
Bodewin biking inga, palestarian adat seng boleh tabrenti di seremoni sabang taong. Manurut dia, samua negeri adat di Ambon parlu biking hidup kumbali nilai-nilai pela deng gandong sabage pondasi hidop barsama.
“Beta inging taong muka, samua negeri adat yang pung biking panas pela. Yang pung gandong, biking panas gandong. Deng bagitu, Katong sampe ana cucu mangarti bae kahidopang ini dapa bangong atas dasar hidup barsama. Jadi, Deng bagitu, Ambon seng boleh jadi ta7mpa konflik lae,” tegasnya.
Wali Kota sampekan apresiasi par seluruh pemangku adat Negeri Soya yang tarus jaga tradisi.
“Dangje banya par pamangku adat Negeri Soya yang tarus partahankan adat ini dar waktu ka waktu,” tutupnya.
Raja Negeri Soya Herve Rene Jones Rehatta juga bilang, pawarisan nilai adat par anana muda.
“Jang lupa carita par anana supaya nanti dong bisa lanjut carita par generasi barikut,. Masyarakat yang pung moral itu kalo dong ada pung adat. Adat yang bentuk moral, par seng bageser dari nilai kamanusiaan,” ujar Raja Herve.
Tradisi Cuci Negeri Soya taong kumbali biking inga, Ambon tumbuh dar akar adat yang kuat—dan tugas generasi sakarang adalah jaga akang tatap hidop. (Leo)
