AmbonVibes.com — Bakas Bupati Kabupaten Kepulauan Tanimbar (KKT) Petrus Fatlolon ada di balik trali besi tagal dapa tahang dar jaksa. Mar dari sana, dia buka mulu angka suara bilang jaksa bohong.
Dari Rutan Ambon, melalui komunikasi daring, suara Fatlolon dapa dengar di Ruang Sidang Komisi III DPR RI, yang samantara Rapat Dengar Pendapat Umum (RDPU) Komisi III DPR RI, Senen (08/12/2025), takait dugaan kriminalisasi deng pamarasan.
Fatlolon deng suara tegas, bilang Muji Murtopo, mantan Asisten Intelijen (As-Intel) Kejaksaan Tinggi Maluku ada tarima kepeng dari Fatlolon. Dia juga bilang, ada parmintaan kepeng Rp10 miliar dari Kepala Kejaksaan Negeri (Kajari) KKT, oras itu, Dady Wahyudi.
“Pernyataan Pak Muji yang menyebut fakta berbeda dari yang terjadi adalah bohong. Pertemuan itu berlangsung di Hotel Golden Boutique Blok M, Jakarta Selatan, dan ada saksi,” ujar Fatlolon lantang.
Fatlolon nilai tindakan pamarasan biking rusak marwah institusi Kejaksaan Agung. Dia minta pimpinan Kejaksaan par tindak tegas oknum yang tarlibat, deng lapas seluruh jabatan.
“Beta mohon Bapa Presiden deng pimpinan Komisi III DPR RI agar kasus ini bahas tabuka-tabuka deng transparan,” katanya.
Fatlolon sambut bae pernyataan Jaksa Agung Muda Bidang Pengawasan (Jamwas) Kejaksaan Agung Rudi Margono, yang pastikan mo buka kumbali laporan Fatlolon deng keluarga, soal kriminalisasi yang Kejati Maluku dan Kejari Tanimbar biking akang.
Kasaksian Fatlolon ini biking kuat apa yang sang istri, pengakuan Nyora Joice Fatlolon Pentury, di RDP sabalong itu, yang su bongkar skema pamarasan takait pancalonan Fatlolon dalag Pilkada Tanimbar 2024.
Dari Nyora Joice pung catatan, awal dugaan pamarasan akang mulai dar 27 Oktober 2023 waktu Kajari Tanimbar Dady Wahyudi, minta par baku dapa deng Asintel Kejati Maluku.
Akang pung lusa, 29 Oktober 2023, Fatlolon dapa kas inga dar Aspidsus Kejati Maluku Triyono Rahyudi, bahwa Fatlolon jadi target kriminalisasi.
Akang pung puncak, 2 November 2023, waktu Muji Murtopo bilang minta Rp10 miliar par “jaminan keamanan politik” par Fatlolon bisa kumbali majo Iko Pilkada.
Sondor iko Muji pung mau-mau, Fatlolon langsung tangada proses hukum, tarmasuk panatapan tarsangka kasus SPPD fiktif deng dugaan penyertaan modal PT Tanimbar Energi.
Manurut Nyora Joice, samua parkara yang biking dia pung laki taika sakarang, itu fitnah politik par kas jatoh Fatlolon pung pancalonan. Bukti-bukti yang dia bawa itu rekaman CCTV, catatan pertemuan, dan kronologi interaksi deng oknum jaksa. Bukti itu par biking kuat parnyataan soal pamarasan.
Komisi III DPR RI tarima samua katarangan Fatlolon laki-bini deng sagala bae. Indikasi pamarasan, panyalahgunaan jabatan, pangkondisian kasus, deng parmintaan kepeng Rp10 miliar, samua itu dong nilai sabage palanggaran sariu yang musti dapa usut sampe diusut tuntad..
Isu Nasional Deng Dampak Politik
Kasaksian Petrus Fatlolon deng pangakuan Joice Fatlolon-Pentury, bisa jadi bahan par lia ka balakang taong lalu. Tagal ada kriminalisasi,gejolak politik baru muncol di muka Pilkada Tanimbar 2024. Peta koalisi tabongkar, tagal Fatlolon pung hak politik ilang bagitu saja.
Parkara ini bukang cuma jadi isu daerah mar su jadi parhatiang nasional takait integritas aparat panagak hukum di Maluku.
Publik sakarang mananti langkah tegas negara par handel skandal yang pung potensi jadi pukulan basar par kredibilitas Kejaksaan di Maluku, sakaligus jadi indikator serius tentang marwah panagakan hukum di tanah Maluku. (Tim)
