AmbonVibes.com – Warga Negeri Soya deng Jemaat GPM Soya bakumpol deng warga Paroki Katedral Ambon, par biking panas pela, Sabtu (7/12/25). Soya deng Katedral taika pela rohani yang su mulai taong 1992.
Dalang panas pela, ada dua kagiatang yang dong biking. Partama, seminar di Gereja Katedral Ambon. Akang nama Seminar Sehari: Kumpul Orang Basudara Negeri Soya dan Paroki Santo Frasiskus Xaverius Katedral Ambon. Akang pung tema: Menghidupkan Semangat Santo Fransiskus Xaverius Untuk Beradaptasi Dengan Budaya Lokal Dalam Konteks Budaya Modern.
Seminar ini pung narasumber tiga pambicara yaitu Pastor Igo Refo, Raja Soya Herve Rehatta, deng Pendeta Elifas Maspaitella. Pastor Igo kupas banya soal Fransiskus Xaverius yang datang ka Maluku. Sadangkan Raja Soya carita bagemana Soya dapa kunjungan dar Xaverius, lalu 33 taong lalu ada orang tatua Soya su angka pela deng Paroki Katedral. Samantara Pendeta Elifas lia peran Xaverius par kahidupan iman di Maluku.
Abis seminar, kegiatan lanjut ke Negeri Soya. Di sana, panas pela dalang ibadah oikumene. Pastor deng Pandita pimpin ibadah oikumene. Ada Pastor Paroki Katedral RD Paul A. S. Kalkoy, Pastor Igo Refo, Ketua Majelis Jemaat GPM Soya Pandita S. Pattikawa, Penghentar Jemaat Pandita Elvis Sabono deng Pandita D. Soparue. Pastor Kalkoy dapa bageang khotbah, sadangkan Pandita Sabono dapa bageang doa syafaat. Di ujung ibadah, lima pandita deng pastor tumpang tangan kase berkat par samua jamaat.
Waktu acara seremoni, Pastor Kalkoy bilang orang Soya paleng bae, su jaga lingkungan, hutan, deng air sampe samua dalang kota bisa iko rasa akang. Samua orang, kata Pastor, musti bilang danke banya par Soya pung bae. Pastor taruh hormat par samua di Soya yang su ika pela deng Paroki Katedral.
Raja Soya Herve Rehatta bilang, orang tatua deng bapa-bapa gareja su ika pela dar 33 taong lalu. Sekarang katong musti jaga akang. Soya deng Katedral, manurut Raja Soya, musti laeng lia laeng macang orang basudara. Dar baku sayang Soya deng Katedral, Raja parcaya katong bisa bawa hidop dame.
“Ini satu titik sejarah yang katong seng boleh lupa, bahwa katong parnah ika janji. Di mana ada ikatan parsaudaraan, di situ kedamean making basar,” kata Raja Soya.
Ketua Majelis Jemaat GPM Soya Pandita S. Pattikawa mangaku paleng rasa syukur bisa iko acara panas pela dar pagi sampe sore, dari Katedral sampe Soya.
“Kagiatang ini penting par generasi muda, karena generasi muda akang lanjutkan, musti tau carita pela ini,” kata Pandita Wattimena.
Pandita Wattimena bilang Soya dan Katedral musti tarus baku sayang. Hubungan ini, kata Pandita, satu par samua.
“Mari jaga bae-bae hubungan ini, jaga bae-bae persekutuan ini,” ungkap Pandita Wattimena.
Pandita kastau par warga Katolik di Katedral, Soya ada bangong Gareja Betfage. Pandita minta dukungan Paroki Katedral, par bisa baku bantu bangong Gareja Betfage.
Abis ibadah, Pastor, Pandita, deng Raja Soya ada baku tukar cinderamata. Sadangkan anana muda rayakan sukacita panas pela pake badendang Tanimbar deng Katreji. (opa)
