AmbonVibes.com – Jaksa profesional deng polisi profesional dapa uji. Ujiang datang dar pengacara nasional Djamaludin Koedoeboen. Dia bilang, ada dua kasus basar di Maluku yang su tatahang, macet, deng kase beku dalang peti es.
Djamaludin kas kaluar isi hati di muka Panitia Kerja (Panja) Reformasi Hukum Komisi III DPR RI deng Kajaksaan, Kapolisian, dan Pangadilan, Kamis (4/12/2025).
Djamaludin bilang dua kasus basar di Maluku Tenggara itu, parkara Landmark Langgur deng Parkara Masker par pananganan Covid-19.
Koedoeboen buka-buka saja. Dia bilang, dugaan korupsi pembangunan Landmark Langgur ternyata sampe oras ini akang tatahang di Kejaksaan Tinggi Maluku.
“Di beta pung kampung di Maluku Tenggara, ada dugaan korupsi pambangunan Landmark yang diam-diam su mandek di Kejati Maluku. Sampe sakarang, akang pung kasus seng parnah abis,” ujar Koedoeboen.
Salaeng parkara Landmark, Koedoeboen juga buka dugaan korupsi balanja masker waktu pandemi Covid-19 taong 2020–2021. Dugaan korupsi kepeng Rp60 miliar, manurut Djamaludin, akang su maso dalang peti es di Polda Maluku.
“Indikasi korupsi ini katong duga dia pung pelaku itu Bupati Malra, lalu sampe oras ini akang tatahang,” cetusnya.
Pernyataan Koedoeboen langsung dapa respon dar pimpinan deng anggota Komisi III DPR RI. Dong minta laporan soal kasus-kasus tadi, sampekan secara tertulis.
Salaeng itu, DPR RI sepakat mo biking gelar perkara pas abis masa reses selesai, sabage langkah tindak lanjut dugaan kasus korupsi di Malra.
Langkah ini dong harap bisa buka kepastian hukum deng biking capat pananganan parkara yang salama ini samua anggap akang su mandek, sakaligus jadi perhatian nasional takait transparansi dan akuntabilitas pengelolaan dana publik di Malra. (Vera)
