AmbonVibes.com – Aksi kajahatang di Kota Ambon balakangan ini, akang jadi perhatian Komisi I DPRD Provinsi Maluku.
Katua Komisi I Solichin Buton tegaskan aparat kapolisian parlu biking patroli malang hari par kase rasa aman par warga.
Menurut Solichin, kasus bacok deng aksi kajahatang yang laeng itu berarti kahadirang polisi di lapangan masih harus dapa kase kuat.
“Katong minta Polda Maluku deng Polres Pulau Ambon lebe intens patroli ka daerah-daerah rawan. Ini penting par cegah aksi kriminal dan kase rasa aman par masyarakat,” ujarnya di Ambon, Jumat (21/11/2025).
Solichin tambahkan, patroli malang hari bukang sekadar formalitas, mar langkah strategis par tekan potensi kajahatang yang biasa muncol kalo hari su galap.
Komisi I juga tekankan parlu tindakan tegas par palaku bacok deng begal.
“Pelaku musti dapa tangka, lalu proses hukum secara jelas. Ini penting par kajadiang serupa seng ulang tarus-tarus, lalu keluarga korban bisa dapa kaadilan,” tegas Solichin.
Solichin soroti kejahatan yang seng dapa tindak secara serius bisa timbulkan rasa seng nyaman yang lebe luas di dalang masyarakat.
DPRD Provinsi Maluku harap, paningkatan pangamanan lakas dong biking jua. Salaeng biking kurang angka kriminalitas, langkah ini juga par biking stabil keamanan di Kota Ambon.
“Katong samua pung tanggung jawab par pastikan wargarasa aman waktu aktivitas, lebe-lebe pas malang hari,” tukasnya.
Deng dorongan ini, Komisi I harap patroli rutin seng cuma di pusat kota, mar juga merata ke wilayah rawan di berbagai kecamatan. (Piere)
