AmbonVibes.com – Gereja Katolik Paroki Santo Joseph – Passo, Kota Ambon kumbali biking Perarakan Arca Kristus Raja Semesta Alam, Sabtu (22/11/25) di pelataran Gereja tersebut, Passo, Kecamatan Baguala.
Penjabat Sekretaris Kota (Pj.Sekkot) Robby Sapulette, dalam sambutan kase apresiasi dar pemerintah Kota (Pemkot) Ambon atas kagiatan perarakan.
“Ini sabuah perayaan basar Gereja Katolik par kase hormat par Kristus Yesus sebagai Raja Alam Semesta, Raja Kemuliaan, dan Raja Damai,” kata Sapulette.
Menurut dia, ada tiga pasang panting yang dapa dar kagiatang ini. Partama, kegiatan ini ajak samua umat Katolik di kota Ambon par Kase hormat paleng tinggi par Kristus. Hal itu bararti umat kase taruh Kristus sebage yang utama dalang kahidupan Gareja deng masyarakat.
“Kedua, kalo Katong mangaku Kristus Raja Semesta Alam, Raja Damai dan Raja Kemuliaan, maka jadi tanggungjawab katong hadirkan Shalom, atau damai sejahtera Allah di mana katong barada,” lanjut Sapulette.
Dan yang katiga, kata dia, kagiatan ini cerminkan sikap kebersamaan, toleransi dan kerukunan antar umat beragama, sebab deng toleransi maka Pemkot bisa laksanakan program prioritasnya secara baik.
Vikaris Jenderal Keuskupan Amboina, RD. Anton Kawole Lerek juga bilang, perarakan Arca Kristus jadi cara umat Katolik hormat Yesus sebage Raja di atas segala Raja.
“Kalo hari ini katong ambe satu kaputusang par hormat dan sembah Dia, itu kaputusan yang tepat. Katong arak patung atau Arca ini bukan sembah berhala karena Alkitab juga catat umat Israel arak Tabut Perjanjian sebagai lambang penghormatan kepada Allah,” ungkapnya.
Pastor Anton biking inga, perarakan Arca Kristus Raja Semesta Alam, juga pung maksa lebe, Allah harap umat tetap hidop deng dame macang teladan Tuhan Yesus Kristus.
“Tuhan harap dar katong samua, dan Gareja harap, seng cuma katong jalan lalu, capek, trus selesai. Yang paleng panting, kalo su selesai, marilah katong hidop deng dame macang taladan dan parentah far Yesus,” pungkasnya.
Perarakan ini su maso taong katiga. Akang pung tema “Melalui Kegiatan Perarakan Arca Kristus Raja Alam Semesta Mari KatongWujudkan Kota Ambon, Maluku dan Indonesia Pung Bae”. (Leo)
