AmbonVibes.com – Anggota Komisi I DPRD Maluku Wahid Laitupa bilang, komisi su dukung Daerah Otonomi Baru (DOB) Kota Lease. Mar itu sa seng cukup. Iko atorang, musti ada rekomendasi dar kapala daerah asal. Jadi, dia cabar Bupati deng DPRD Kabupaten Maluku Tengah, lakas kase dukungan.
“Katong harap Bupati dan DPRD Maluku Tengah dukung pemekaran Kota Lease, par pelayanan publik masyarakat bisa dapa jawab deng bae,” tambahnya.
Rencana kas badiri Kota Lease su dapa dukungan Komisi I DPRD Provinsi Maluku. Macang di barita kamareng, dukungan itu bisa dapa lia Rapat Dengar Pendapat (RDP) deng Tim Konsorsium Kota Lease di ruang Paripurna DPRD Maluku, Kamis (13/11/2025).
Laitupa bilang, secara administratif, samua syarat yang Tim Konsorsium Kota Lease kase maso, akang su lengkap.
“Samua su penuhi syarat. Rapat juga bahas 13 DOB laeng,” jelas Wahid.
Wahid bilang, Tim Konsorsium ka DPRD itu bukti orang Lease serius barjuang par jadi daerah otonom. DPRD Maluku su kase dukungan par pemekaran wilayah sebage bentuk keadilan fiskal deng pelayanan publik par daerah kepulauan.
Laitupa soroti kebijakan Dana Alokasi Umum (DAU) yang balong adil par Maluku tagal cuma hitong jumlah penduduk deng luas wilayah, padahal karakter geografis provinsi ini wilayah kepulauan.
“Katong di Maluku rasa dapa biking rugi. Pemerintah pusat musti kase perhatian deng dukungan par pemekaran wilayah di Maluku, sebagai bentuk keadilan fiskal deng politik,” kata Laitupa.
Menurut dia, pemekaran DOB bukang cuma administratif, mar juga tanggung jawab moral par biking pende rentang kandali pemerintahan dan kas capat pelayanan publik. Making banya pemekaran, program kementerian bisa maso lebe gampang ka Maluku, deng bawa manfaat nyata par masyarakat di pulau-pulau terpencil.
“Samangat dorong pemekaran ini akang jadi bageang dar tanggung jawab moral DPRD par jawab masyarakat pung kaparluan yang susah daoa jangkau layanan pemerentah,” tegasnya. (Leo)
