AmbonVibes — Pemerintah Kota Ambon ada ajak samua warga par kalesang lingkungan deng iko aksi barsi laut serentak di Labuang Ambon, Sabtu (1/11/2025). Aksi ini par jaga pinggir-pinggir pante tetap lestari, tagal su lia tamba badaki deng kotorang.
Aksi ini libatkan ASN Pemkot Ambon, Dharma Wanita, Tim Penggerak PKK, deng komunitas lingkungan. Dong mulai akang deng apel sama-sama. Wali Kota Ambon Bodewin Wattimena pimpin apel lalu yang Iko itu pimpinan OPD, pejabat, deng masyarakat.
Wali Kota Bodewin Wattimena bilang, penting paskali samua sadar par jaga Labuang Ambon tetap barsih.
“Katong dapa karunia labuang yang indah, mar katong pung tangang yang pake biking rusak akang. Sampah di Labuang Ambon bukang satu orang pung barbuat mar katong samua balong kalesang akang,” tegasnya.
Wali Kota juga soroti video kondisi dalang labuang yang pono sampah, itu par biking inga samua brenti buang sampah takaruang.
ASN deng peserta laeng saparuh turung ka laut pake speedboat par loku sampah yang anyo-anyo, sedangkan yang laeng kas barsih pinggir-pinggir pante yang DLHP su ator.
“Tanggung jawab jaga kebersihan bukang cuma pemerintah. Katong musti kas contoh dolo baru masyarakat Iko kalesang,” tambahnya.
Pemkot Ambon juga mo pasang CCTV di tampa buang sampah, lalu nanti mulai 1 Januari taong muka, sapa buang sampah takaruang dapa denda Rp1 juta atau sanksi sosial.
“Sampah yang dong buang itu jadi luka par Teluk Ambon. Mari katong rawat deng wariskan par ana cucu deng sagala Bae,” ajak Wali Kota.
Eso-eso, pemerentah rencana sadia kapal angka sampah laut, meski solusi utama tetap biking stop kalakuang buang sampah ka lau.
Aksi beasih laut ini jadi momentum penting par warga deng Pemkot Ambon, par biking kuat komitmen kalesang Teluk Ambon sebagai warisan alam dan kebanggaan kota. (Leo)
