AmbonVibes.com – Wakil Gubernur Maluku Abdullah Vanath dan Nyora Rohani Vanath deng tangang tabuka tarima ratus-ratus peserta Sidang Sinode GPM di Rumah Dinas Karangpanjang Ambon, Selasa (21/10) tadi malang. Iko jadwal, peserta sidang memang makang malang di sana.
Pas waktu bicara par bilang salamat datang, deng Wagub Vanath mulai buka satu demi satu carita. Akang pung carita, santai mar serius lae. Ada yang biking tatawa, ada yang biking eleng, ada yang bisa biking mata babasah, deng ada yang biking jantong tapukol seng rata.
Vanath bilang, acara makang ini su sadia akang dar dua bulan lalu. Dia su tau nanti ada 500 sampe 600 peserta sidang sinode mo makang di Rumah Wagub.
Jadi, Vanath mangaku sanang samua su datang. Lebe-lebe lai, Ketua Sinode GPM Pdt Elifas Maspaitella baru parnah inja rumah dinas wagub sejak akang badiri.
Wagub carita, makang malang ini samua mamasa di rumah. Nyora Any Mamasa di dapur.
‘Beta skali-skali pi lur di dapor lai,” kata Vanath.
Wagub rasa sanang peserta Sidang Sinode GPM makang malang di Rumah Wagub. Alasan sanang tagal deng dudu makang sama-sama, itu su jadi pasang-pasang dame par Maluku.
“Beta deng Gubernur seng bosan-bosan kiring pasang dame par Maluku,” ujar Wagub.
Gubernur Bajalang Tarus
Wagub Vanath lalu bilang, situasi dame di Maluku paleng penting jang sampe kaco. Sebab Maluku ini ada bagara di atas pondasi ekonomi yang loga-loga. Samua itu tagal Maluku paleng tagantong kepeng transfer dar pemerentah pusat. Tantu, Maluku gampang dapa susah tagal susah fiskal.
Vanath lalu kastau, taong muka, Maluku devisit. Kepeng kurang sampe Rp370 miliar tagal dapa potong kepeng transfer. Kalo gabung samua kabupaten deng kota, samua pung jumlah sampe Rp2 triliun.
Dalam kondisi keuangan bagitu, Vanath bilang seng ada jalang laeng kacuali biking bagara sektor swasta.
“Sakarang ini orang biasa bilang Gubernur Hendrik Lewerisisia cuma tinggal bajang-bajalang sa. Itu sang batul. Gubernur pi bajalang-bajalang itu pi cari investasi par tambal kepeng deng buka lapangan karja.
Vanath Pung Guru Par Ketua Sinode
Vanath jua ada carita soal Ketua Sinode GPM Pendeta Elifas Maspaitella yang sadiki lae su abis masa jabatan.
Selain bilang Pendeta Elifas baru parnah inja kaki di Rumah Wagub, Vanath mangaku pas samua orang, dia pung guru par Pendeta Elifas
Akang pung carita, waktu Vanath mo nae jadi Bupati SBT taong 2004, Pendeta Elifas jua yang ajar bagemana bicara di muka orang banya.
“Waktu itu di Beta pung kantor deka Hotel Wijaya, Beta dapa kas badiri di mimbar. Lalu Pendeta Elifas ajar bicara. Jadi kalo hari ini orang bilang Beta salah satu orator papan tengah, papan atas, itu tagal Beta pung guru ini, Pendeta Elifas.
Anana Smansa yang Pake Jilbab
Masih soal hidop dame, Vanath lalu bacarita pengalaman pi di skola SMA Negeri 1 Ambon (Smansa). Waktu sampe di sana, Vanath iskerek lia siswa parampuang yang pake jilbab.
“Beta su siap materi pidato. mar bagitu ada anana Smansa pake jilbab, Beta ganti isi pidato. Di muka dong, Beta bilang, minta maaf tagal katong tua-tua ini su kas rusak harmoni dan baku parcaya. Hari ini, ana cucu su bangung harmoni. Katong seng boleh Iko orang tatua pung kalakuang tarbae biking rusak harmoni deng rasa baku parcaya.
Elifas: Katong Utang Dosa
Waktu kase balasa sambutan, Ketua Sinode GPM Pendeta Elifas bilang GPM tetap pung komitmen kas badiri tegak pilar dame di Maluku deng Maluku Utara. Komitmen itu, menurut Elifas, akang bukang pilihan melainkan panggilan.
“Katong memang pung utang dosa par anana katong sandiri. Katong musti bayar utang itu deng jalang pengorbanan diri,” kata Elifas.
Elifas bilang, pembelajaran dame, katong dorong par anana. GPM tarus pada komitmen itu deng tarus bangong sinergi deng gubernur dan wagub. (Opa)
