AmbonVibes.com — Media sosial di Ambon rame kumbali deng baku prang kata-kata, khusus par yang maeng Facebook Pro deng TikTok. Kalakuang baku hujat, sindir, dan baku maki ini biking Ketua Tim Periksa Fakta Mafindo Maluku Aril Salamena hati nae-nae.
Waktu bicara deng Ambon Vibes, Salasa (21/10/2025), Aril biking inga, viral bukang segalanya. Obsesi jadi terkenal di dunya digital sering biking orang lupa akal sehat dan tar mo tau nilai budaya lokal yang taika rasa basudara.
“Banyak orang sakarang mo viral sondor pikir akang pung akibat. Padahal, viral sondor etika itu bukang prestasi, mar tanda literasi digital yang randa,” ujarnya.
Menurut Mafindo Maluku, konten baku cabar sakarang pono di dua platform digital tadi, termasuk potongan video pribadi deng stori-stori yang dong ero jadi kewel par tarek perhatian. Mudel ini biking jao medsos dar tujuan bage-bage pikiran deng edukasi.
“Lebe kasar, lebe rame yang nonton,” sindir Aril.
Dia juga hati seng pas tagal anana jadi penonton aktif konten vulgar. Kalo tabiasa Lia konten bakalae deng baku maki, itu gampang dapa tiru.
Aril bilang deng tegas, ruang digital musti jadi tampa kreatif positif, bukang arena baku binci. Dia biking inga orang Maluku par tarus pegang mati samangat orang basudara, pela, deng gandong yang ajar samua baku hormat, di dunya nyata deng dunya maya lai.
“Kalo di dunya nyata, katong bisa baku buang suara, baku polo, baku pegang tangang, mangapa di dunya maya musti baku lot? Dunya digital juga bageang dar kahidupan sosial Katong,” jelas Aril.
Aril jua ada tamba lai, literasi digital itu bukang cuma bisa pake medsos mar juga bisa tahang diri.
“Kalo di dunya nyata katong bisa jaga lisan, maka di dunya maya juga katong musti jaga jari mai,” tegasnya.
Aril biking inga, viral itu boleh sa mar jang sampe biking rusak orang basudara.
“Jari mai itu kacik sa mar bisa biking api basar manyala. Pake par biking tarang manyala, jang bakar rumah sandiri. Maluku talalu mahal par jadi medan baku binci digital,” tutup Aril Salamena. (Piere)
