AmbonVibes.com – Program Makanan Bergizi Gratis (MBG) di Kabupaten Maluku Barat Daya (MBD) baru bajalang ampat hari. Mar, akang langsung kayak dong bikin drama lucu-lucu bodo. MBG su jadi makanang baracong gratis. Tagal tartau balanja, tartau mamasa, tartau barsi-barsih, puluh-puluh ana SMP Negeri 1 Tepa abis makang langsung keracunan.
40 Anak Kena, Diduga Karena Ikan Tuna
Info dari MBD, ana skola yang kana makanan racong ada 40 ana SMPN 1 Tepa. Di SMA Tepa, ada lai satu ana dapa rasa makanang racong. Dar sakola laeng di Tepa bolong ada laporan.
Pas dapa dengar kabar ini, Camat dan Sekcam Tepa langsung turung panto Puskesmas. Dari carita satu-dua ana, dong kira-kira ikan tuna yang maso dalang menu MBG hari itu yang biking racong.
Satu hari di muka itu, ada ana SD sempat protes makanan MBG – katanya semangka yang dong kase par anana akang su basi, sayor kacang ijo juga bagitu. Untung bae dong balong sempat makang akang.
DPRD Maluku Angka Swara
Anggota DPRD Maluku dar Dapil KKT–MBD Yan Zamora Noach langsung angka swara, minta pemerintah evaluasi basar-basar par pengelola program MBG.
“Beta su pastikan memang ada ana-ana kana racong, saparu su dapa suru pulang rumah. Pengelola harus lebe taliti, cek ulang tenaga gizi, dan dapa tau pasti samua bahan makanang batul-batul layak sebelum dong mamasa,” ujar Noach di Ambon, Kamis (11/9/2025).
Dia bilang, katong samua tau, program ini akang pung tujuan bae, biking anana lebe sehat dan fokus balajar. Mar kalo bagini, malah bisa biking orang tua ilang parcaya par akang.
Pemerintah Jang Babadiang
Noach bilang pengawasan harus saban hari, jang sampe ada bahan basi yang lolos. “Ingat, anana ini generasi penerus. Jang kase biar dorang jadi korban cuma tagal pengelola karja tar war,” tegasnya.
Ia juga desak dinas pendidikan dan dinas kesehatan jangan dudu babadiang. “Pemerintah harus turun langsung cek kualitas makanang. Kalo ada kelalaian, tindak tegas. Jang sampe ada apa-apa deng nyawa ana-ana,” pungkas Noach. (red)
