AmbonVibes.com – Suasana Aula Universitas Kristen Indonesia Maluku (UKIM) Ambon, Kamis (28/8/2025), rame paskali. Ribuan mahasiswa baru pono sasa iko acara paleng laste PKKMB alias ospek kampus.
Yang biking lebe spesial, UKIM kasdatang Anggota DPD RI asal Maluku, Bisri As Shiddiq Latuconsina yang lebe top deng nama Bung Boy. Ontua jadi pembicara utama di bageang Empat Pilar Kebangsaan.
Empat Pilar itu – Pancasila, UUD 1945, NKRI, sampe Bhinneka Tunggal Ika – Bung Boy bawa akang pake bahasa sederhana. Rektor UKIM Ambon Dr. Henky H. Hetharia, M.Th. Prof. Dr. John Christian Ruhulessin, dan moderator Pdt. D. Salakory.
Maluku Punya Peran Besar di Republik
Prof. Ruhulessin bilang jelas, generasi muda musti pegang teguh nilai-nilai kebangsaan ini.
“Penguatan ampat pilar itu akang penting paskali par bangsa ini pung hari eso,” katanya deng semangat paskali.
Rektor UKIM Dr. Hetharia, tambah lagi deng sonto sejarah.
“Maluku itu provinsi ke-8 yang iko kasbadiri Indonesia. Jadi mahasiswa baru UKIM ini musti sadar, dorang generasi emas yang dapa Kase siap maso Indonesia Emas 2045. Kalo seng pegang empat pilar, mo jadi apa Indonesia blakang hari nanti?” tegasnya.
Bung Boy: Generasi Muda Maluku Harus Jadi Agen Pembaruan
Di muka ribuan mahasiswa baru, Bung Boy tekan akang ampa pilar bukang semata teori. Itu landasan hidop yang musti tamaso dalang jiwa ana muda.
Bung Boy kase inga lae, jaga Indonesia akang pung arti jaga keadilan, hukum adat, kedaulatan laut deng hutan yang jadi hak rakyat.
“Generasi muda bukang cuma agen perubahan, tapi juga agen pembaruan. Katong butuh kader terbaik yang peka sosial dan pung kemampuan akademik par perjuangkan Maluku di level nasional,” jelas mantan Ketua KNPI Maluku ini.
Bung Boy seng lupa titip pesan soal kebersamaan. “Maluku bukan satu dua orang punya. Maluku tanggung jawab katong samua. Mari berjuang sama-sama, mar lewat cara-cara konstitusional,” ujarnya.
Acara ini jadi tanda penutup PKKMB UKIM Ambon 2025. Mar bagi ribuan mahasiswa baru, momen ini seng cuma akhir ospek. Ini justru titik awal perjalanan panjang dorang sebagai generasi emas Indonesia. (Leo)
