AmbonVibes.com, Ambon – Terminal Transit Passo yang su makang taong tadudu, akang sabantar jadi wajah baru Kota Ambon. Pemkot Ambon rencana mo biking gedung terminal tu jadi Balai Kota Ambon.
Terminal Passo su mulai biking akang oras Wali Kota MJ Papilaja (2007–2015) deng kepeng kira-kira Rp35 miliar dari Kemenhub deng APBD Kota Ambon. Sayang dilale, abis bangong, akang gedung tuh seng parna dapa sonto sampe tadi ini.
Dari Aset Mangkrak Jadi Pusat Pemerintahan
Wali Kota Ambon Bodewin M. Wattimena bilang Pemkot seng rela gedung maliong-maliong tu rusak palang-palang.
“Anggaran basar paskali, masa katong kas biar rusak bagitu sa? Lebe bae pake. Katong akan bikin jadi Kantor Balai Kota yang sterek par kase jalan urusan hamente deng urus orang banya,” kata Bodewin, Selasa (26/8/2025).
Bodewin jua ada carita, alasan utama rencana itu, tagal sakarang pegawai Pemkot tamba banya. Ada tambah 2.000 PPPK deng 941 ASN baru, bikin ruang kerja di kantor lama su seng cukup.
“Dudu sa seng bisa, apalai mo layani masyarakat. Jadi katong parlu tampa baru,” tegasnya.
DPRD Kasi Lampu Ijo
Memang ada baku-tarek sadiki soal rencana ini, tapi Bodewin kase jaminan, seng ada program laeng yang jadi korban.
“Katong seng paparipi, samua hitung bae-bae. Nilai akang layak ka seng, abis itu baru ator apa yang parlu tamba par bisa jadi balai kota,” jelasnya.
Bodewin juga kase apresiasi par DPRD Kota Ambon yang su dukung fol-fol rencana ini.
“Gedung Balai Kota baru ini kebutuhan dasar supaya katong samua di Pemkot bisa karja lebe bae deng pelayanan orang banya jua makin bae,” pungkasnya. (Piere)
