Dari informasi yang takumpul, polisi tangka Salembe tagal dapa kanal dia pung jejak dalang sajumlah laporan parkara papancuri di dua-tiga lokasi baku laeng.

Pas abis loko Salembe, polisi langsung bawa dia pi ka Markas Ditreskrimum Polda Maluku di Batu Meja, Kota Ambon, par iko pamariksaan lebe lanjut.
“Dia su dapa tangka dari malang dan sakarang iko proses pamariksaan,” ujar salah satu sumber kepolisian, Senen (8/6/2026).

Salembe dapa duka biking dia pung aksi di sajumlah tampa. Dar hasil panyalidikan awal, panyidik duga Salembe pung kaitan deng aksi-aksi pancurian di sajumlah tampa di Kota Ambon, antara laeng Batu Merah, Laha, Galunggung, sampe kawasan STAIN.

Oras ini, polisi masih gale lebe dalang kamungkinan Salembe tamaso memang dalang barbagae laporan kahilangan yang maso ka polisi balakangan ini.

Dalang sajumlah akang parkara, polisi duga Salembe ambe korban pung barang-barang barharga macang telepon genggam, komputer jinjing (laptop), parhiasan emas, sampe uang tunai.

Manurut sumber kapolisian, puluh-puluh unit telepon ganggam dar barbage merek deng tipe dapa lapor ilang dalang sajumlah kajadian yang oras ini samantara panyidik gale.

Maski bagitu, sampe oras ini, Polda Maluku balong kase katarangang resmi takait status hukum Salembe, mopun jumlah parkara yang dia tamaso di akang.

Panyidik masih pariksa deng intensif par mo ungkap samua rangkeang tindak pidana yang polisi duga salembe biking akang, deng juga kamungkinan ada pihak laeng sama-sama deng dia.

Sampe berita ini dapa kas nae, Direktur Reserse Kriminal Umum Polda Maluku mopun Kabid Humas Polda Maluku balong kase tanggapan resmi takait akang panangkapan . Polda Maluku kamungkinan mo kastau parkambangan hasil panyalidikan kalo proses pamariksaan tarhadap Salembe su klaar. (Red)

Parkara ini sakarang dalang pananganan intensif aparat panagak hukum deng jadi parhatian sarius tagal manyangkut parlindungan tarhadap anana.

Kasi Humas Polres SBB Ipda Asep Souisa bilang panahanan tarhadap YS setelah panyidik Satuan Reserse Kriminal (Satreskrim) biking sarangkeang panyalidikan deng panyidikan bardasarkan laporan dar korban.

“Panyidik su biking sarangkeang panyelidikan deng panyidikan sampe tetapkan YS sabage tarsangka. Oras ini dia su dapa tahang di Rutan Polres SBB par kapantingan proses hukum lebe lanjut,” kata Asep, Salasa (2/6/2026).

Paristiwa dugaan tindak pidana itu, akang jadi har Jumat, 22 Mei 2026 sakitar jam 03.00 WIT di sabuah kamar di Dusun Hatumuli, Desa Piru, Kecamatan Seram Barat, Kabupaten Seram Bagian Barat.

Bagitu abis dapa laporan, polisi langsung biking pandalaman sampe akhirnya kas nae status tarlapor sabage tarsangka deng biking panahanan par kas lancar proses hukum.

Dalang perkara ini, tarsangka dapa jareng deng Pasal 473 ayat (2) huruf b juncto Pasal 126 ayat (1) Undang-Undang Nomor 1 Taong 2023 tentang Kitab Undang-Undang Hukum Pidana (KUHP).

Salaeng itu, panyidik juga terapkan Pasal 81 ayat (2) Undang-Undang Nomor 17 Taong  2016 tentang Parlindungan Anak juncto Pasal 76D Undang-Undang Nomor 35 Taong 2014 tentang Parlindungan Anak.

Polres SBB managaskan komitmen par manindak tegas satiap palaku tindak pidana yang malibatkan anana deng mo pastikan korban dapa parlindungan sasuai katantuan hukum yang barlaku.

Asep juga mangimbau masyarakat par lebe paduli tarhadap lingkungan sakitar deng lakas lapor kapolisian kalo dapa tau ada tindak pidana tarhadap anak.

“Partisipasi masyarakat paleng penting par parkara macang bagini lakas dapa handel deng seng bawa dampak lebe loas,” pungkas Asep. (Red)

Ana pranggang ini pung initial nama ARP (17). Dia dapa loko di kawasan Halong Baru, Kecamatan Baguala, Kota Ambon, Kamis (28/5/2026) pagi. Waktu dapa loko, dia sondor malawang.

Akang parkara mulai dari postingan viral di Facebook sakitar pukul 05.00 WIT, yang muat dugaan pancurian deng biking masyarakat jadi resah.

Abis dapat informasi, Tim URC langsung bagara capat, baku koordinasi deng jaringan informan par cari tau posisi pelaku.
Bagitu dapa info yang su akurat soal tampa sambunyi, anggota URC langsung turung ka lokasi dan sukses tangka dia capat-capat saja.

Abis loko dia, Tim URC Ditreskrimum Polda Maluku langsung koordinasi deng Polresta Pulau Ambon dan Pulau-Pulau Lease, tagal laporan kasus ini su lebih dulu dapa urus di sana.

Salanjutnya, palaku dapa ovor ka panyidik Satreskrim Polresta Ambon par maso proses hukum iko atorang yang barlaku.
Ana pranggang ini tarnyata warga Negeri Waai, Kecamatan Salahutu, Kabupaten Maluku Tengah.

Kabid Humas Polda Maluku Rositah Umasugi bilang, langkah capat ini jadi bukti komitmen polisi par jaga keamanan deng ketertiban masyarakat.

“Polda Maluku tetap komit hadir capat dalang satiap parsoalan kamtibmas yang jadi parhatian masyarakat. Informasi di media sosial tetap katong respons secara profesional deng taukur,” ujar Rositah.

Dia juga kasih apresiasi par masyarakat yang aktif kasi informasi sahingga bantu proses pangungkapan kasus.

“Karja sama antara masyarakat deng polisi itu panting, supaya penanganan parkara bisa lebe capat deng situasi tetap aman,” tambah Rositah.

Langkah cepat ini kumbali kas unju aparat kapolisian tetap sigap hadapi dinamika kaamanan, sakaligus biking kapercayaan publik tarhadap panegakan hukum di Maluku tambah lebe kuat. (Red)

Tim Subdit IV Tipidter Ditreskrimsus pi garebek sakitar jam 08.00 WIT tagal sabalong ini dong dapa laporan masyarakat takait dugaan aktivitas panimbunan minya tana deng oplos BBM jenis solar.

Kabid Humas Polda Maluku Rositah Umasugi bilang, informasi awal dapa tarima har Senen malang.

“Dar hasil penyalidikan, pagi tadi sakitar jam 07.30 WIT, tim amankan barang bukti sajumlah orang yang dong duga tarlibat dalang aktivitas akang BBM ilegal,” jelas Rositah.

Dalang panggerebekan itu, patugas dapa tau timbunan BBM jenis minya tana deng solar yang dapa simpan di dalang kios satu.

“Barang bukti barupa belasan drum BBM su dapa loko deng bawa pake satu unit dump truk. Samua barang bukti sakarang ada di Kantor Ditreskrimsus Polda Maluku par proses panyalidikan lebe lanjut,” ungkap Rositah.

Salaeng barang bukti, tiga orang yang ada di lokasi juga dapa bawa par proses klarifikasi takait peran masing-masing.

Polisi duga akang praktik ilegal takait deng pangoplosan BBM subsidi, yakni campor minya tana dent solar par dong jual-bali akang.

Maski bagitu, panyidik masih tarus cari tau jumlah pasti BBM yang su dapa sita ini deng akang pung modus bagemana.

“Polda Maluku pasti mo tindak tegas palaku panyalahgunaan BBM subsidi deng imbau masyarakat par lakas lapor kalo dapa tau kagiatan sarupa di dong pung tampa tinggal,” tandas Rositah. (Tim)

Gubernur Hendrik langsung parentah Kapala Dinas Perindustrian dan Perdagangan (Disperindag) Maluku Achmad Jais Ely par lakas biking evaluasi manyaluruh tarhadap sistem pangalolaan pasar.

Juru Bicara Pemprov Maluku Kasrul Selang bilang, papancuri pung akang aksi seng bisa dapa toleransi tagal biking rugi padagang, juga biking tarbae citra pemerentah daerah.

“Pemprov Maluku tantu minta maaf par padagang deng masyarakat yang su jadi korban papancuri di Pasar Baru Mardika. Pak gubernur su parentah Disperindag evaluasi akang,” ujar Kasrul, Selasa (24/3/2026).

Kasrul kastau, dar hasil kajian capat Disperindag, langkah awal yang musti biking itu kas batul sisi internal, di Unit Pangelola Pasar Mardika.

Pambenahan itu mancakup paningkatan kualitas dan kuantitas sumber daya manusia (SDM), yang oras ini samantara dalang proses kasbae.

Kasrul kas pasti, evaluasi tata kalola ini marupakan bageang dar komitmen gubernur par biking rasa aman deng nyaman par padagang mopun masyarakat di Pasar Mardika.

Wali Kota Ambon Angka Suara

Wali Kota Ambon Bodewin Wattimena juga ada master akang parkara papancuri di Pasar Mardika. Di akun Facebook pribadi, Bodewin tulis paleng prihatin sakaligus desak Pemerintah Provinsi Maluku lakas ambe langkah konkret.

“Mohon dengarkan keluhan warga Kota Ambon. Karena pencurian barang milik pedagang di Pasar Mardika (gedung baru) telah terjadi berkali-kali. Kasihan mereka, para pedagang kecil,” tulis Bodewin.

Bodewin tulis bagitu sabage respons par kaluhan padagang yang rame sampe su muncol di media sosial.

Bodewin pung status facebook itu dapa dukungan luas dar masyarakat. Warga manilai pangelolaan pasar oras ini masih payah, tarutama dar sisi pangawasan.

Sajumlah netizen bahkan mandorong pangelolaan Gedung Pasar Mardika kase par Pemerintah Kota Ambon par kontrol lebe bae.

Salaeng itu, masyarakat juga usul pasang CCTV deng tindak karas tarhadap palaku pancurian par cegah kajadian sarupa taulang.

Situasi ini jadi parhatian serius publik. Warga harap akang jadi momentum par pemerentah daerah, bae provinsi mopun kota, par biking bae pasar par lindung padagang kacil di Pasar Mardika. (Piere)

Kasat Reskrim Polresta Ambon Kompol Androyuan Elim bilang par wartawan di Mapolresta Ambon, Jumat (6/3/2026), tarsangka MRM su dapa tangka deng ada iko proses hukum. Korban DHL kana tusuk deng dapa luka. Dia masih dapa rawat di RSUP Leimena Ambon.

Parkara ini maso di polisi deng Laporan Polisi Nomor LP/B/14/II/2026/SPKT/Sek Teluk Ambon/Polresta Ambon/Polda Maluku tertanggal 27 Februari 2026.

“Tarsangka dapa jerat deng Pasal 466 ayat (2) KUHP deng ancaman hukuman lima taong panjara dan/atau Pasal 466 ayat (1) KUHP deng ancaman dua taongaenam bulang panjara,” ungkap Androyuan.

Androyuan kastau, paristiwa ini barmula dar rapat Dewan Perwakilan Mahasiswa Fakultas (DPMF) di Fakultas Ekonomi Universitas Pattimura Ambon. Dalang rapat, muncul pro deng kontra tarhadap agenda kagiatan yang samantara dong bahas. Pardebatan lalu picu kaributan yang barujung aksi baku pukul di area parkiran Gedung B Fakultas Ekonomi.

“Pardebatan lalu picu kaributan baku pukul di area parkiran Gedung B Fakultas Ekonomi yang tarus barlanjut sampe ka luar area kampus di wilayah Rumatiga,” jelasnya.

Manurut Androyuan, tarsangka MRM saat itu ada di kamar kos. Dia dapa informasi dia pung sudara dapa pukol dar salah satu kalompok mahasiswa.

MRM langsung ambe piso dapor dar kamar kos di kawasan Poka Pemda III lalu pi kampus pake motor.

Sampe di pinggir Alfamidi Rumatiga, ada aelompok mahasiswa di situ. Tarsangka kira kalompok itu yang pukol dia pung sudara.

“Jadi dia langsung tikam korban DHL dua kali pake piso dapur,” jelas Androyuan.

Tagal panikaman itu, korban dapa luka di bageang balakang deng pinggang kiri.

Aparat Polresta Ambon deng Polsek Teluk Ambon bagera capat biking panyalidikan sampe akhirnya tangkap tarsangka di kamar kos.

“MRM dapa tangka sondor malawang, malang hari sakitar jam 21.00 WIT di kos-kosan di Rumatiga. Dia langsung dapa bawa par dapa pariksa lebe lanjut,” tandas Androyuan.

Dar hasil pameriksaan samentara, panyidik baru tetapkan satu orang sabage tarsangka. Samentara sejumlah pihak laeng di tampa kajadiang masih sabage saksi.

Polisi su pariksa 18 saksi, tarmasuk tiga orang yang lia langsung kajadiang itu.

Penyidik juga su kumpol rekaman CCTV deng video dar masyarakat sakitar deng sita sajumlah barang bukti, antara laeng pakeang korban, pakeang tarsangka, deng piso yang tarsangka pake. (red)

Insiden yang bikin darah tumpah itu akang jadi di muka lorong pamukiman warga. Sajumlah saksi bilang, suasana yang kamuka ada bae-bae, kage lae kaco pas dong dua baku ambe. Seng lama, MH cabu parang lalu kabas kana di korban pung tangang.

Tagal dapa biking bagitu, MA (23) dapa luka barat di sajumlah jari tangang kanang deng musti bawa lari ka RS Siloam Ambon par dapa parawatan. Sampe oras barita ini nae di media, korban masih dapa rawat inap.

Kapolsek Sirimau Iptu Reza Ardiansyah S.Tr.K, bilang peristiwa itu gara-gara konflik lama antara palaku deng korban. Katagangan dong dua su ulang-ulang dan biasa baku kata di lingkungan sakitar.

“Bagitu tarima laporan, personel langsung bagera ka lokasi deng unsur TNI dan tokoh masyarakat par amankan situasi, biking tanang kaluarga korban, deng cegah potensi kaributan lebe loas,” jelas Kapolsek.

Manurut Kapolsek, respons cepat aparat ini par mo pastikan situasi kaamanan deng katartiban masyarakat tetap takandali, mangingat lokasi kajadiang barada di kawasan padat penduduk.

Seng pake lama, polisi barhasil tangka MH deng barang bukti sabilah parang yang diduga dia pake dalang aksi pambacokan. Oras ini MH su dapa tahang di ruang tahanan Polsek Sirimau par proses hukum lebe lanjut.

“Katong imbau saluruh pihak par manahang diri deng seng tamakang cabar. Parcayakan pananganan parkara par aparat panegak hukum,” tegas Kapolsek.

PAr astikan situasi kondusif, aparat kapolisian juga dapa taruh di sakitar lokasi kajadiang sabage langkah antisipasi tarhadap kamungkinan gangguan kaamanan.

Pihak kapolisian pastikan proses panyalidikan dan panyidikan mo jalang deng profesional dan transparan. Katarangang dari korban nanti mo ambe lkalo dia pung kondisi su bae.

Paristiwa ini kumbali jadi pangingat bahwa konflik personal yang seng biking abis akang, laste-laste bisa sampe tindak pidana dan biking rugi samua. Aparat harap warga lebe taruh cara damai di muka par jaga stabilitas kaamanan di lingkungan masing-masing. (red)

Kapolres memang turung langsung dalam aksi baku serang pake bom molotov sampe panah waer. Dalang usaha biking brenti orang bakalae inilah, anak panah datang pas di kaki.

Paristiwa ini akang Saeasa (24/2/2026) sakitar jam 17.30 WIT, waktu aparat kepolisian tarus usaha biking stop dua pihak.

“Iya, betul Kapolres dapa panah,” ujar Aipda Husinjaya Korwaka, Kasubsi PID Humas Polres Tual, waktu konfirmasi malalui pesan singkat WhatsApp.

Husinjaya bilang Kapolres deng jajaran turung langsung ka lokasi par halau massa yang ada samantara serang. Mar situasi massa yang sudah par ator, aparat pun jadi sasaran.

“Kapolres dapa panah di kaki kiri sakitar jam 17.30 WIT. Saat itu deng anabua usaha halau massa,” jelas Husinjaya.
.
Warga Fidatan Lama dan Fidatan Baru su baku biking dar har Minggu (22/2/2026). Situasi panas Senen (23/2/2026), waktu Puskesmas Fidatan dapa bom pake bom molotov.

Aksi baku serang tarus barlanjut sampe Salasa sore.. Bom molotov dan panah waer paleng dominan.

Polisi su pake barbage upaya par redam konflik. Aparat dar Polres Tual terjun ke lokasi. Ketua DPRD Kota Tual Aisyah Renhoat juga turung langsung ka malang sabalong ini par mediasi. Sampe berita ini dapa siar, dua pihak yang bakalae masih karas par bakalae.

Maski suasana mancekam, aparat kapolisian tarus usaha ure masa par jaga jang sampe eskalasi konflik batambah, juga Jang ada sampe jatuh korban. (Vera)

“Ini paleng keji deng biadab. Bagemana bisa sorang aparat panagak hukum malawang ana skola yang jalas bukang lawang sabanding. Hukuman barat maksimal musti kase par oknum itu,” kata Selly, Sabtu (21/2/2026).

Manurut Selly, parkara ini kas lia arogansi oknum aparat jadi sanksi musti kase efek jera par jang taulang kumbali eso-eso.

Selly sebut tindakan yang biking korban Arianto Tawakal (14) maninggal dunya marupakan palanggaran hak asasi manusia (HAM), juga seng sesuai deng kode etik kepolisian deng Kitab Undang-Undang Hukum Pidana (KUHP).

Saking paleng murka, Selly sampe manuntut bui saumur hidop par palaku sabage bantuk tanggong jawab tagal gagal jamin anana pung kasalamatan.

Salaeng pidana barat, Selly tuntut pecat sondor hormat, PTDH sabage konsekuensi etik yang seng bisa par tawar-tawar. Dia juga minta sidang kode etik biking tabuka sabage bageang dar komitmen reformasi Polri.

Selly jua kutip Ketua DPR Puan Maharani, yang dorong nagara malalui lembaga takait kase pamulihan manyaluruh par kaluarga korban.

Bripka Masias Siahaya yang su viral di media, dia kapala Arianto Tawakal pake helm sampe jatuh dari atas motor, badarah-darah, lalu maninggal dunya.

Bripda bertugas di Mako Brimob Pelopor C juga biking sampe Nasrim Karim (15), kakak korban, patah tulang.

Atas paristiwa itu, Selly minta parlu ada rekonsiliasi. Komandan Brimob wajib baku dapa kaluarga korban par minta maaf langsung sabage bantuk tanggong jawab moral institusi.

Selly tekankan pamulihan par korban deng kaluarga musti manyaluruh, mancakup pandampingan psikologis jangka panjang, rehabilitasi medis, jaminan pendidikan, serta restitusi ato kompensasi yang layak.

“Negara seng boleh cuma sampe di hukum palaku mar wajib kas hadir kaadilan yang utuh tarmasuk pamulihan sosial dan mental kaluarga korban,” tegas Selly. (red/bs)

Kapolres Tual Whansi Des Asmoro dalang konferensi pers di Mako Polres Tual, Jumat (20/2/2026), mangaku banar ada paristiwa itu.

“Banar adanya, Kamis 19 Februari 2026 jam 06.30 WIT di Jalan Panglima Mandala, dekat Kampus Uningrat, Kecamatan Dullah Utara, diduga terjadi tindak pidana oleh terduga Bripda MS anggota Kompi I Batalyon C Pelopor,” ujar Kapolres

Polisi, lanjut dia, su tarima laporan, su biking laporan polisi, minta visum, deng biking olah tampa kajadiang parkara (TKP). Terduga palaku juga su kas aman par kapantingan panyidikan.

“Bripda MS sudah katong amankan dan oras ini masih cari tau lebe dalang, bagemena dia pung katarlibatan. Sajumlah saksi, bae dar internal Brimob mopun masyarakat, masih dapa pariksa,” kata Kapolres.

Dalang parkara ini, panyidik jerat Bripda Masias Siahaya deng sajumlah pasal balapis. Di antaranya Pasal 76C junto Pasal 80 ayat (3) Undang-Undang Nomor 35 Taong 2014 tentang Parlindungan Anak, takait tindak panganiayaan tarhadap anak.

Salaeng itu, panyidik juga pake Pasal 466 ayat (3) Undang-Undang Nomor 1 Taong 2023 tentang KUHP Nasional, tentang panganiayaan yang mangakibatkan kamatian deng ancaman hukuman tujuh taong bui.

Seng cuma itu, Pasal 474 ayat (3) UU Nomor 1 Taong 2023 tentang tindak pidana yang mangakibatkan mati, deng ancaman lima taong panjara, juga kana par dia.

Kapolres bilang, polisi balong tau pasti sacara utuh kronologi kajadian, tarmasuk dugaan balap liar, kacalakaan, mopun tindak kakarasan.

“Katong balong dapa sampekan dar satu sisi saja. Katong masih dalami saksi-saksi, tarmasuk cari saksi di luar anggota Brimob,” tegas Kapolres.

Sajumlah barang bukti juga su takumpol antara laeng helm yang diduga Bripda Masias Siahaya pake, kunci sapeda motor korban, deng dua unit sepeda motor.

Kapolres Tual pastikan proses panyidikan bajalang objektif dan profesional.

“Katong jamin palaksanaan panyidikan bajalang objektif, transparan, deng profesional,” pungkas Kapolres.

Korban Arianto Tawakal (14) adalah siswa madrasah maninggal dunia di RSUD Karel Sadsuitubun, Langgur, Jumat (19/2/2026). Kakak korban, Nasri Karim (15), siswa kelas X MAN Malra yang jadi saksi mata, mangalami patah tangang. (Vera)