Panghentian aktivitas di site bukang cuma tagal masyarakat tola akang pambangunan fasilitas partahanan negara. Akang pung parsoalan justru sampe di hal yang lebe mandasar yaitu status tanah, batas wilayah, dasar panguasaan lahan, deng katarlibatan masyarakat adat dalang proses panggunaan areal itu.

Masyarakat bale tanya bagemana pambangunan fasilitas strategis negara bisa bajalang kalo0 info mangenei batas lahan, luas areal, titik koordinat, deng dasar hukum panggunaan tanah balong dong dapa akang.

Masyarakat adat Nusaniwe pung pikiran, pambangunan boleh saja bajalang, kalo saluruh aspek hukum jelas. Mar, kapastian mangenei tanah musti lebe dolo kas jelas akang par eso-eso jang ada masalah.

Tokoh adat Nusaniwe Mihel Wattilete bilang, masyarakat seng mau, parsoalan tanah baru jadi bahan baku malawang setelah pambangunan fasilitas talanjur bajalang.

“Yang katong hal itu batas, luas, deng status tanah. Kalo memang sacara hukum akang jelas, silakan unjub dokumen deng akang pung titik koordinat par masyarakat,” ujar Mihel.

Kabaratan itu pung akibat aktivitas kontraktor palaksana, PT Lestari Nauli Jaya dapa kase stop par samantara. Sajumlah pakarjaan yang sabalong inin bajalang lokasi, molai dar pangukuran, pambarsihan areal, pamasangan patok sampe kas nae pagar, su seng lanjut akang oras ini.

Situasi itu lalu mambuka parsoalan yang lebe loas manganei proses pangadaan ato panggunaan lahan par bangong fasilitas strategis negara.

Masyarakat bilang, lokasi pambangunan ada di kawasan yang dong tau sabage hutan lindung deng luasan sakitar 8,38 hektare.

Mar, informasi itu blong manjawab partanyaan masyarakat adat manganei kamungkinan ada wilayah yang salama ini dapa klaim, warga Nusaniwe ada pake deng waris akang turung-tamurung.

Tagal itu, bagi warga, akang pung hal bukang cuma soal pamasangan patok ato pangukuran lahan. Partanyaan yang lebe mandasar itu, sapa yang pung kawenangan par akang tanah deng atas dasar apa lahan itu bisa pake par bangong fasilitas nagara.

Mihel juga parsoalkan katarlibatan parangkat pemerintahan negeri dalang proses pangukuran lahan. Manurut dia, kahadiran parangkat negeri dalang suatu kagiatan seng serta-merta bisa lia akang sabage parsatujuan saluruh masyarakat adat.

“Jang ssampe kahadiran pemerientah negeri dong anggap sabage parsatujuan masyarakat. Parsatujuan masyarakat adat miusti malalui mekanisme yang jelas deng bisa par tanggong jawab akang,” kata Mihel.

Kabaratan masyarakat itu manunjukkan ada kabutuhan tarhadap katarbukaan informasi dar tempo-tempo, lebe-lebe waktu pambangunan pake areal yang takait deng wilayah adat.

Masyarakat inging informasi yang jalas manganai dokumen panguasaan tanah, luas pasti areal proyek, batas koordinat, deng mekanisme yang pemerintah pake par tantukan lokasi pambangunan.

Sorotan sarupa dating dar Saka Mese Maluku yang mangaku su pantau akang parsoalan tanah adat di Maluku dari Juni 2025. Kalompok itu manila, pambangunan fasilitas negara musti seng biking masyarakat adat cuma sabage pihak yang dapa informasi setelah kaputusan panggunaan lahan turung.

Manurut dong, kapantingan partahanan negara memang marupakan kapentingan strategis. Mar, pambangunan infrastruktur partahanan tetap parlu kapastian hukum manganei tanah deng panghormatan tarhadap hak masyarakat yang pung hubungan adat dengan akang wilayah.

Artinya, kapantingan partahanan deng parlindungan hak masyarakat adat musti seng biking dua kapantingan baku tasalah deng baku abis. Kapastian hukum justru parlu par pambangunan fasilitas nagara seng biking sangketa agraria baru.

Setelah masyarakat biking kabaratan, pimpinan teknik PT Lestari Nauli Jaya langsung barsadia stop samentara pakarjaan di lokasi. Dokumen kabaratan masyarakat lalu dapa kas tarus ka pihak-pihak tarkait di Jakarta, tearmasuk PT Len Industri yang jadoi kontraktor utama akang proyek.

Sampe barita ini kaluar, belum balong ada penjalasan resmi dar Kamanterian Pertahanan mopun TNI AU manganei dasar panggunaan lahan, status hukum areal, loas pasti lokasi proyek, batas koordinat, mopun mekanisme palibatan masyarakat adat dalang pambangunan site radar.

Katiadaan panjelasan biking parsoalan lahan skarang jadi bageang panting dar polemik pambangunan fasilitas partahanan di Airlow. Sebab, fasilitas radar marupakan bageang dar kapentingan partahanan negara yang strategis. Mar, kapantingan itu tetap parlu pijakan hukum yang tarang, tarutama Waktu masyarakat parsoalkan akang debf klaim pung hubungan adat deng akang wilayah.

Masyarakat Nusaniwe bilang mo tarus parsoalkan akang proyek sampe dapa panjalasan tabuka manganei status dan dasar panggunaan tanah. Dong seng manutup kamungkinan pambangunan bisa lanjut kalo dong dapa panjalasan manganei saluruh aspek hukum lahan lalu hak masyarakat adat seng tabiar bagitu saja.

Di titik ini, pemerentah musti kase kapastian. Kalo akang proyek site radar memang su pung memiliki dasar hukum par pake tanah yang sah deng akang pung saluruh prosedur su batul, publik tunggu pemerentah buka informasi sacara transparan.

Sabaliknya, kalo masih ada parsoalan mangenei status, batas ato hak atas lahan, pambangunan seng boleh anggap enteng kabaratan masyarakat. Sebab, pambangunan fasilitas partahanan boleh jadi kapantingan negara, mar kapastian hukum deng panghormatan tarhadap hak masyarakat adat tetap jadi fondasi par kapantingan nagara seng barubah jadi sangketa par eso-eso. (Mario)

AmbonVibes.com — Kalompok Siswa Pencinta Alam (Sispala) Pattra 28 SMA Negeri 1 Ambon pung stel laeng dar laeng par biking hari jadi ka-81 Kamerdekaan Republik Indonesia. Dong seng biking di sakolah pung kintal malaengkang biking di dasar laut.

Katua Panitia Hari Jadi ke-81 RI Sispala Pattra 28 Jessyca Evelin Berhitu kastau, dong pung akang aksi heroik itu sangaja dong biking par pesta hari jadi RI, Senen, 17 Agustus 2026. Tampa yang dapa pilih itu lautang di Negeri Morella, Maluku Tengah, sabalah utara Pulau Ambon.

“Tampa ini dapa pilih tagal pung potensi bahari yang gagah. Selaeng itu, akang pung tampa paleng strategis par aksi palastarian lingkungan,” kata Jessyca di Ambon, Sabtu (15/8/2026).

Jessyca bilang, ada 20 anggota Sispala Pattra 28 yang dapa pilih par jadi panitia deng patugas upacara. Pas akang dong pung maksud, dong su biking parsiapan deng instruktur Zainal H. Renuat di Markas Ambon Dive Explore, Laha.

Iko skenario, hari H nanti, patugas yang dapa tunju samua pake alat-alat molo, lalu dong turung ka dasar laut par tanang tiang, abis itu baru kas nae bandera. Maski dalang air masing, manurut Jessyca, prosesi panghormatan bandera nanti juga pake kode tangang par tanda lagu Indonesia Raya. (Editor Rudi Fofid)

Akang hal bukang cuma sabatas kaluhan masyarakat. Dinas Lingkungan Hidup dan Persampahan (DLHP) Kota Ambon sabalong ini su pareksa instalasi pangolahan air limbah (IPAL) akang gerai, 27–28 April 2026.

Kapala DLHP Kota Ambon Apries Benel Gaspersz bilang hasil pamariksaan itu su jadi bahan evaluasi pemerentah. Dong su ansprak deng sajumlah organisasi parangkat daerah (OPD) deng pangelola Mie Gacoan.

“Katong su rapat koordinasi deng OPD takait, Satpol PP, Indag deng pangelola Mie Gacoan. Rapat dapa pimpin dar Asisten,” kata Apries par Porostimur.com, Jumat (14/8/2026).

Manurut Apries, pemerentah seng langsung maeng kas barenti aktivitas usaha, mar kase kasampatan par pangelola biking bae sistem IPAL bardasarkan rekomendasi hasil pamariksaan DLHP.

“Pangelola dapa kase waktu par biking bae IPAL iko rekomendasi DLHP,” ujar Apries.

Langkah itu manampatkan parsoalan Mie Gacoan di tahap pambinaan sakaligus pangawasan. Mar, kasampatan biking bae sistem pangolahan aer limbah juga bararti pangelola pung kawajiban pastikan IPAL seng cuma tasedia sacara fisik, mar batul-batul pung fungsi mangolah aer limbah sabalong lapas ka lingkungan.

Apalai, aktivitas usaha kuliner akang pung limbah caer dar barbage kagiatan, mulai dar pancucian bahan makanang deng paralatan, aktivitas dapur, sampe panggunaan fasilitas sanitasi.

Salaeng pambanahan IPAL, pangelola wajib biking laporan barkala tarhadap hasil uji kualitas aer limbah.

“Lapor sacara barkala kualitas hasil uji aer limbah musti iko katantuang,” jelas Apries

Akang kawajiban jadi bageang panting par pastikan akang pung proses efektif. Sebab, kabaradaan IPAL saja seng otomatis manjamin aer limbah yang kaluar su iko standar parameter kualitas yang jadi akang pung syarat.

Hasil uji barkala juga bisa par pemerentah pantau parubahan kualitas aer limbah setelah pangalola biking parbaikan.

Parsoalan di sakitar gerai Mie Gacoan tarnyata seng cuma parsoalan IPAL.

Apries bilang, kondisi drainase di sakitar lokasi juga jadi parhatian pemerietah. Pangalola ssbalom ini sampekan parsoalan drainase yang jadi kawenangan Dinas Pekerjaan Umum dan Penataan Ruang (PUPR).

“Parmintaan pangalola par drainase yang marupakan kawenangan PUPR juga jadi parhatian pemerentah tagal drainase yang tasumbat juga ada pangaruh,” kata Apries.

Deng bagitu, pemerentah lia parsoalan lingkungan di kawasan itu sacara lebe manyaluruh. Kalo ada masalah IPAL, maka sistem itu musti biking bae akang. Samantara kalo drainase tasumbat ato parsoalan teknis laeng, aspek itu juga parlu tangani akang sasuai kawenangan instansi takait.

Pas abis pamariksaan lapangan, April 2026 lalu, pemerentah kumbali biking pambahasan deng pihak Mie Gacoan, 27 Juli 2026.

Rapat itu bahas hasil temuan lapangan deng langkah parbaikan yang musti pangelola biking akang. Katarlibatan sajumlah OPD manunjukkan akang parsoalan parlu pananganan lintas sektor. DLHP berwenang pada aspek lingkungan, samantara parsoalan drainase takait deng PUPR. Satpol PP deng parangkat daerah laeng bisa ampe peran sesuai kawenangan masing-masing.

Koordinasi jadi penting par pananganan seng barenti di satu aspek, samantara sumber gangguan laeng tetap dapa kas biar. Apries managaskan, DLHP Kota Ambon masih biking pamantauan tarhadap pangalolaan akang limbah gerai.

“Pihak DLHP Kota Ambon tarus biking pamantauan takait parmasalahan limbah Mie Gacoan sampe dong biking kagiatan iko katantuan yang ada,” tegas Apries

Parnyataan itu sakaligus manunjukkan pambarian waktu parbaikan bukang bararti pangawasan tarenti. Justru, efektivitas langkah pemerentah akang dapa lia dar dua hal: Apakah rekomendasi DLHP batul-batul dong biking deng dan apakah abis biking bae, dilakukan perbaikan, persoalan bau limbah itu su bisa atasi akang.

Kaluhan warga sabalong ini mangaku bau seng sadap paleng mangganggu masyarakat, pajalang kaki deng konsumen yang datang ka akang gerai. Sakarang, setelah pemerentah dapa parsoalan di sistem IPAL deng kase waktu par pangelola biking bae dong pung IPAL, publik tantu tunggu akang pung hasil nyata.

Kalo sumber gangguan memang barasal dar sistem pangelolaan aer limbah, maka parbaikan IPAL musti mampu atasi akang. Bagitu lae kalo drainase turut jadi faktor, maka parsoalan itu parlu tangani sacara barsamaan.

Masyarakat seng cuma parlu rapat, rekomendasi, deng pamariksaan, mar juga hasil yang bisa dong dapa rasa langsung Laste-laste, parsoalan Mie Gacoan bukang cuma soal bau. Ini manyangkut bagemana aktivitas usaha di tengah kawasan padat kota bisa bajalang deng sondor lupa warga pung rasa nyaman deng kawajibang par jaga lingkungan.

Sakarang bola ada di tangang pangelola deng pemerientah: Apakah pambenahan IPAL deng pananganan drainase mampu jawab kaluhan warga yang salama ini ciong bobou busu di Jalan Rijali? (Josian)

Kagiatang nobar nanti Pemerentah Kota Ambon biking akang di Esplanade, Lapangan Merdeka Ambon, Minggu (21/6/2026) amper siang. Orang prediksi, fens fanatik tim De Oranje nanti datang batambong.

Kahadiran Dubes Belanda akang jadi momentum istimewa, sakaligus mo kas inga, ikatan emosional antara warga Maluku deng tim nasional Belanda akang memang karas.

Pemerentah Kota Ambon sandiri su ansprak par kas siap samua agenda nobar di Kantor Konsulat Kehormatan Kerajaan Belanda di Jalan Dana Kopra, Rabu (17/6/2026).

Kapala Dinas Infokom dan Persandian Kota Ambon Ronald H. Lekransy bilang, barbage aspek teknis su dapa bahas par pastikan kagiatang bajalang lancar deng bae.

“Tadi su ansprak, katong ator par parsiapan nobar deng Dubes Balanda,” ujar Ronald Lekransi par wartawan.

Kapala Dinas Pemuda dan Olahraga Kota Ambon Richard Luhukay juga kas tau rancana kahadiran Dubes Belanda dalang agenda nobar.

“Iya, Dubes Balanda mo iko nobar di Ambon,” kata Richard.

Pemkot Ambon juga su bage-bage flyer undangan par masyarakat sabage bentuk ajakan tabuka par biking rame nobar di Esplanade.

Rencana Dubes Belanda ka Ambon dapa sambutan warga, lebe khusus fens setia Timnas Belanda di Ambon dan Maluku.

Yoga, salah satu warga, manilai kadatangan Dubes seng lapas dar basis pandukung Balanda yang basar di Maluku.

“Ya itu mangkali dong tahu di Ambon itu basis fens timnas Balanda paleng basar makanya Dubes mo datang nobar di sini deng lia langsung dukungan orang Ambon,” ujar Yoga.

Warga laeng, Jeffry mengaku bangga dan anggap momen ini sabage bantuk panghargaan par fens enggemar De Oranje di Maluku.

“Jadi ini kahormatan deng panghargaan par katong samua yang salama ini tongka timnas Belanda,” kata Jeffry.

Lebe dar sakadar lia partandingan sepak bola, nobar ini juga jadi ruang kabarsamaan yang kas baku dapa orang-orang lintas latar balakang dalam satu semangat yang sama.

Kahadiran langsung parwakilan Pemerintah Belanda di Ambon pun dapa respon, sabage simbol kadekatan historis deng kultural yang masih tajalin sampe oras.

Deng atmosfer yang paste pica-poci, Lapangan Merdeka Ambon mo barubah jadi panggung orang basudara, tampa dukungan par De Oranje dapa dengar sampe ka negeri asal di Balanda. (Keket)

Wali Kota Bodewin bilang akang pas waktu “Bacarita Deng Calon Sekda” di Ruang Rapat Vlissingen, Lantai II Kantor Walikota Ambon, Senen (15/6).

Manurut Bodewin, proses pengangkatan sekot pung atorang su jalas, mulai dar seleksi dar panitia seleksi (Pansel), asesmen, sampe panatapan calon yang nanti dapa pilih oleh Pejabat Pembina Kepegawaian (PPK).

“Katong seng bikin uji publik, karena ini bukang kontestasi politik yang masyarakat yang pilih. Mekanismenya su jelas, mulai dari pansel, asesor, sampe dapa pilih oleh Pejabat Pembina Kepegawaian,” ujar walikota.

Bacarita Jadi Ruang Liat Kualitas Calon

Dia bilang, forum bacarita ini sangaja dong biking par masyarakat bisa kanal lebe deka deng para calon sekot, tarmasuk cara dong manjawab parsoalan pemerentahan.

“Bacarita ini ruang par masyarakat bisa lebe langsung calon-calon Sekot. Bagemana dong mananggapi parsoalan, analisa masalah, sampe tawarkan solusi. Itu yang katong mo unju par publik,” katanya.

Wattimena juga mangaku barsyukur karena tiga kandidat yang iko seleksi, dong pung kualitas yang sama-sama kuat.

“Yang patut katong syukuri, tiga-tiga pung kamampuan luar biasa. Artinya proses seleksi ini su bajalang bae, karena samua layak,” ujar Bodewin.

Satu Kursi, Banyak Kandidat Kuat

Meski bagitu, wali kota bilang, cuma satu orang yang nanti dapa pilih jadi Sekot Ambon.

“Saya su bilang, sapa pun yang tapilih itu yang paleng bae. Yang seng tapilih juga tetap orang-orang bae. Mar jabatan Sekda cuma satu. Kalo bisa tiga orang jadi Sekda satu, dua, tiga mungkin gampang, mar atorang cuma kasih satu,” kata Bodewin.

Kalo samua tahapan su abis, Pemkot Ambon mo lapor ka Gubernur Maluku par minta partimbangan, sabalong usul satu nama ke Badan Kepegawaian Negara (BKN).

“Beta nanti mo lapor ka Bapak Gubernur, iko prosedur. Abis koordinasi, baru katong usul satu nama ke BKN par dapa partimbangan teknis sabalong pelantikan,” jelas Bodewin.

Target Pelantikan Bulan Ini

Takait waktu palantikan, Bodewin bilang akang pung proses, dong usaha par lebe capat.

“Target sacepatnya. Kalo samua proses lancar, bisa saja bulang ini su ada Sekretaris Kota Ambon definitif,” ujar Bodewin.

Dia juga bilang, partanyaan yang dia kasih ka tiga kandidat saat forum bacarita itu bukang sekadar diskusi biasa, mar bageang dar panilaian.

“Partanyaan-partanyaan itu cara Beta lia dong pung kamampuan. Beta mo tau bagemana dong jawab parsoalan sabage Sekda, bukang sabagae staf ato kapala OPD. Sekda musti bisa lia masalah sacara manyeluruh deng kase solusi strategis,” tegas Bodewin.

Sampe oras, wali kota mangaku balong ada pilihan final.

“Balong ada kaputusan. Samua masih dalang partimbangan beta. Nanti beta koordinasi juga deng Ibu Wakil Wali Kota par dapa masukan. Memang ini hak prerogatif wali kota, mar tetap katong bangong komunikasi,” kata Bodewin.

Salaeng itu, dia juga mo konsultasi deng Gubernur Maluku sabalong ambe kaputusan akhir.

“Bacarita ini salah satu cara beta pake hak prerogatif sacara objektif. Beta koordinasi deng Wakil Wali Kota, konsultasi deng gubernur, baru samua itu jadi bahan partimbangan sabalong putuskan,” ujar Bodewin.

Dia juga bilang, faktor usia bukang jadi panantu utama par pilih Sekot.

“Bagi beta, muda atau tua seng jadi masalah. Yang penting kemampuan, kapasitas, pangalaman, deng kasiapan pimpin birokrasi. Nanti katong lia sapa yang paleng pas,” pungkas Bodewin. (Red)

Bagitu wasit FIFA dar Polandia Szymon Marciniac tiop lifri panjang, tanda duel Argentina vs Aljazair su abis waktu, suara orang bataria di Stadion Arrowhead Kansas City, AS, juga taiko di Ambon.

Euforia kamanangan Timnas Argentina di ajang Piala Dunia 2026, seng pake lama, langsung tatumpa di jalang raya. Ribu-ribu fens La Albiceleste langsung biking padat straatbdi Kota Ambon. Dong biking pesta par kamanangan Argentina 3-0 par Aljazair. Konvoi paleng rame.

Dar hasil lia-lia di lapangan, konvoi motor paleng dominan di strat-strat utama kota. Fens banya-banya pake jersey biru-putih, kipas bandera Argentina, deng kas babunyi klakson baku-baku balas.

Suasana tamba pica-poci waktu massa lewat di Jalang Jenderal Sudirman sampe jantong kota. Bahkan, iring-iringan kandaraan juga pi kuliling ikon kota, Jembatan Merah Putih.

Salah satu fens, Sam Hatuina, mangaku su pung idola par Argentina dar masih kacil.

“Saban kali ada pawe kamanangan tim Argentina, beta pasti iko. Beta cinta sepak bola tim ini dar kecil,” ujar Sam.

Fenomena konvoi suporter bukang hal baru di Ambon. Satiap Piala Dunia, kota ini pasti rame deng pandukung tim-tim basar macang Argentina, Brasil, sampe Prancis.

Kamanangan Argentina yang dapa pimpin dar Lionel Messi biking fens tambah antuasias. menyulut antusias. Massa dari barbage kalangan—anak-anak sampe orang tatua—turung ka jalang marayakan kamanangan pake bataria kas unju dukungan.

“Hidup Argentina, hidup Messi! Argentina seng ada lawang!” teriak fens sapanjang konvoi.

Massa yang tahambur di jalang biking sampe macet panjang. Aparat kapolisian musti kas aman deng biking rekayasa lalu lintas, tarmasuk tutu samantara akses di kawasan Batu Merah par ure kapadatan.

Maski bagitu, parayaan barlangsung relatif tartib deng pangawalan aparat. Warga yang ada di pinggir jalang dapa lia antusias nonton iring-iringan suporter.

Euforia ini jadi bukti bahwa sepak bola bukang sakadar olahraga di Ambon, mar su jadi budaya kolektif masyarakat yang salalu hidop saban kali ada pesta dunia digelar. (Red)

Momentum ini jadi sorotan, tarutama par Pemerentah Kota Ambon yang barhasil “nae klas” deng dapa opini Wajar Tanpa Pengecualian (WTP).  Sabalong ini, tiga taong barturut-turut Ambon ada di opini disclaimer dan Wajar Dengan Pengecualian (WDP).

Wali Kota Ambon Bodewin Wattimena, yang mawakili kapala-kapala daerah se-Maluku, manyampaikan apresiasi par Kapala BPK RI Perwakilan Maluku, Andriyanto, deng samua tim pamariksa atas pandampingan yang dong su biking.

Bodewin bilang, proses pameriksaan su bajalang batahap, mulai dar pamariksaan pandahuluan dar 26 Januari sampe 10 Maret 2026, lalu lanjut deng pamariksaan tarinci, 2 April sampe 11 Mei 2026.

“Hari ini BPK RI Perwakilan Maluku su kase LHP dengan opini yang ada. Katong yakin sungguh bahwa akang laporan ini wujud komitmen manjalankan pemerentahan yang inklusif, transparan, deng akurat, demi maningkatkan kasajahteraan masyarakat,” ujar Bodewin.

Secara khusus, Bodewin mangaku bangga atas capean Kota Ambon yang barhasil raih opini WTP taong ini, dar kamuka di kategori WDP.

“Banya hal yang sabanar balong  mampu katong parbaiki sandiri. Mar atas arahan deng bimbingan BPK, katong bisa biking bae palang-palang. Ini jadi bukti bahwa BPK adalah mitra karja yang bae,” ungkap Bodewin.

Samantara itu, Kapala Perwakilan BPK Maluku Andriyanto sampekan, panilaian opini akang pake ampa kriteria utama, yakni kasasuaian deng Standar Akuntansi Pemerintahan (SAP), kacukupan pangungkapan, kapatuhan tarhadap paraturan parundang-undangan, deng efektivitas Sistem Pangandalian Intern (SPI).

Bardasar hasil pamariksaan, BPK kase sajumlah daerah dapa opini WTP, di antaranya Kabupaten Maluku Tengah, Maluku Tenggara, Buru, Kota Tual, Maluku Barat Daya, Seram Bagian Timur, deng Kota Ambon yang nae dar WDP ke WTP.

Samentara itu, beberapa daerah laeng masih dapa opini Wajar Dengan Pengecualian (WDP), yakni Kabupaten Seram Bagian Barat, Kepulauan Aru, Kepulauan Tanimbar, dan Buru Selatan.

“Katong musti apresiasi paningkatan opini tarhadap Pemerentah Kota Ambon yang taong lalu dapa WDP, sakarang katong bisa kase opini WTP. Ini batul-batul karja karas,” ujar Andriyanto.

Bodewin biking inga par capean ini seng biking pemerentah daerah bapuas diri, malaengkang jadi motivasi par tarus manjaga kualitas pangalolaan kauangan.

“Yang su WTP, jaga akang bae-bae, yang masih WDP musti karja karas par bisa nae. Mudah-mudahan akang jadi motivasi par katong samua par tarus biking yang lebe bae,” tegas Bodewin.

Satu nada deng itu, Andriyanto juga harap pemerentah daerah yang masih dapa opini WDP bisa lakas tindak lanjut rekomendasi BPK.

“Kalo ada kasulitan dalang tata kalola, katong siap kase saran. Kalo rekomendasi bisa dong tindak lanjut, katong rasa itu akang biking gampang par dapa opini WTP di taong mandatang,” pungkas Andriyanto.

Panyarahan LHP ini sakaligus managaskan, panting paskali sinergi antara pemerentah daerah deng BPK par dapa kas muncol tata kelola kauangan yang transparan, akuntabel, deng dapa parcaya dar publik. (Red/MCAmbon)

Akang komitmen tarangka dalang audiensi Pemkot Ambon deng jajaran pimpinan FST Unpatti Kantor Hamente, Balai Kota Ambon, Rabu (3/6/2026).

Partamuan ini jadi momentum panting par kas kuat sinergi antara dunya akademik deng pemerentah daerah dalang manjawab tantangan pambangunan kota yang su lebe kompleks dan multidimensi.

Rombongan FST Unpatti dapa pimpin langsung oleh Dekan, Prof. Dr. Henry J. Wattimanela, S.Si., M.Si., ada juga jajaran pimpinan fakultas dan para katua jurusan.

Dalang partemuan, pihak FST tegaskan komitmen par kase kontribusi aktif dalang pambangunan daerah malalui pamanfaatan ilmu pangatahuan, riset terapan, deng inovasi teknologi.

Henry Wattimanela bilang, barbage disiplin ilmu di FST pung katarkaitan langsung deng kabutuhan pambangunan parkotaan oras ini.

“Barbage bidang kailmuan itu bisa kas optimal par dukung pangalolaan lingkungan hidup, transformasi digital pemerentahan, mitigasi risiko bencana, pelanguatan sistem pendidikan, pangolahan data pambangunan, sampe pangambangan inovasi teknologi barbasis kabutuhan lokal Kota Ambon,” jelasnya.

Diskusi juga tekankan pantingnya mambangun tata kalola pambangunan yang seng cuma barbasis kabijakan, mar juga dapa dukung deng data yang akurat dan pandekatan ilmiah yang komprehensif.

Wali Kota Ambon Bodewin Wattimena, manyambut bae inisiatif kolaborasi ini, deng bilang karja sama antara pemerentah dan parguruan tinggi musti hasilkan dampak nyata par masyarakat.

Manurut Bodewin, sinergi deng dunya akademik manjadi kabutuhan mandesak di tengah dinamika pambangunan kota yang manuntut solusi barbasis ilmu pangatahuan.

“Katong harap parjumpaan ini seng barenti di tataran seremonial ato diskusi samata, mar lahirkan karja sama yang konkret, tarukur, deng barkalanjutan pat kapentingan pambangunan Kota Ambon,” ujar Bodewin.

Dia secara khusus manyoroti pantingnya parguruan tinggi pung rol dalang mandukung paningkatan kualitas pendidikan, tarutama malalui panguatan kompetensi tanaga pandidik.

“Guru yang barkualitas akang manghasilkan proses pambalajaran yang lebe efektif dalang mambantuk karakter, kamampuan barpikir kritis, serta daya saing generasi muda di era digital,” kata Bodewin.

Salaeng sektor pendidikan, Pemkot Ambon juga mandorong kolaborasi dalang pangambangan inovasi teknologi pambalajaran deng panguatan kabijakan lingkungan.

Salah satu fokus yang Wali Kota Bodewin sampekan adalah rencana panarapan uji emisi kandaraan barmotor sabage langkah pangandalian pancamaran udara di Kota Ambon.

Manurut Bodewin, implementasi kabijakan itu parlu dukungan akademik deng pandekatan ilmiah, molai dar pangukuran sampe pametaan data lingkungan.

“Beta instruksi Dinas Perhubungan dan DLHP par lakas tindak lanjut kolaborasi ini. Pandekatan ilmiah paleng parlu dalang parumusan kabijakan pangandalian pancemaran udara,” tegas Bodewin.

Dalang audiensi, ada juga Kapala Dinas Komunikasi, Informatika dan Persandian Kota Ambon Ronald Lekransy, parwakilan Bappeda Rini M. Salampessy, Deng Dinas Pendidikan Kota Ambon.

Eso-eso, karja sama antara Pemkot Ambon dan FST Unpatti harap barkambang jadi kamitraan jangka panjang yang mampu kase solusi inovatif, barbasis riset, deng responsif tarhadap kabutuhan masyarakat.

Malalui kolaborasi ini, pambangunan Kota Ambon seng cuma orientasi di infrastruktur, mar juga par panguatan kualitas sumber daya manusia, tata kalola pemerentahan, deng kabarlanjutan lingkungan. (red/mcambon)

Ketua DPD I Golkar Provinsi Maluku Umar Lessy sampekan akang panunjukan dalam Rapat Pleno III di Sekretariat Partai Golkar Maluku, Karang Panjang, Kota Ambon, Senin (1/6/2026).

Kaputusan soal Plt, manurut Umar, akang par mo pastikan roda organisasi partai lambang pohon baringin itu tetap bajalang optimal di Kota Manise.

Salaeng itu, langkah ini juga jadi bageang dar upaya kas kuat konsolidasi internal manjelang Musyawarah Daerah (Musda) Golkar Kota Ambon. Panunjukan Plt dia anggap paleng panting par seng tarjadi kakosongan kapemimpinan sakaligus manjaga stabilitas politik internal partei di Ambon.

Mananggapi kapercayaan itu, Ely Toisutta bilang dia siap par kas bajalang dia pung akang tugas Plt.

“Beta siap kas jalang amanah partei ini deng sagala bae, tantu deng tetap patuh par saluruh mekanisme yang barlaku di partei,” ungkap Ely.

Dia bilang, fokus utama dalang waktu deka-deka ini yaitu konsolidasi internal partei par biking siap palaksanaan Musda.

“Katong mo pastikan, konsolidasi partei bajalang deng bae par palaksanaan Musda Partai Golkar Kota Ambon bisa tarlaksana sasuai arahan DPD I Maluku deng DPP Golkar,” pungkas Ely

Dalang tahapan ka muka, sajumlah agenda strategis mo jadi prioritas Plt Katua. Akang agenda antara laeng kas kuat struktur kapangurusan mulai dar tingkat kalurahan sampe kacamatan, par pastikan masin partei bagara solid deng sarantak.

Salaeng itu, parcapatan palaksanaan Musda manjadi mandat utama par kapamimpinan definitif lakas tabantuk malalui mekanisme yang sah di internal partei.

Seng kalah panting, upaya rekonsiliasi kader juga mo biking par biking satu barbage parbedaan yang mangkali muncul dalang dinamika internal sabalong ini.

Ely juga bilang, penguatan hubungan deng akar rumput, tarmasuk kader, simpatisan, deng masyarakat luas, akang paleng parlu sabage bageang dar strategi kas kuat posisi Golkar di Kota Ambon. (Keket)

Akang peristiwa tarjadi Senen (1/6/2026) malang, sakitar jam 19.30 WIT.  Barang yang dapa bakar itu fasilitas TPS yang baru dapa rehab sabage bageang dar upaya pemerentah kota biking bae sistem pangalolaan sampah.

Parnyataan kotok itu, Wali Kota ucap akang di sela paresmian TPS bantuan CSR dari PT Bank Negara Indonesia (Persero) di Negeri Halong, Salasa (2/6/2026).

Wali Kota Bodewin manilai, aksi pambakaran itu sabage bantuk perilaku yang seng mancarminkan tanggong jawab sabage warga kota, lebe-lebe di tengah upaya pemerentah biking bae fasilitas publik.

“Ini perilaku masyarakat yang seng tau atoran, seng tau kalesang, dan seng tahu tanggung jawab sabage warga kota. Par akang, beta kutok karas pambakaran TPS yang su tasadia,” tegas Bodewin.

Dia jelaskan, Pemkot Ambon salama ini su barupaya maksimal sadia deng biking bae infrastruktur pangalolaan sampah, bae malalui Anggaran Pendapatan dan Belanja Daerah (APBD) mopun dukungan program CSR.

Mar, upaya itu dia nilai seng bisa bajalang optimal kalo seng taiko deng kasadaran masyarakat par jaga fasilitas yang su tasadia.

Manurut Bodewin, insiden ini musti jadi bahan evaluasi barsama, bae pemerentah mopun masyarakat.

“Mudah-mudahan ini jadi catatan penting par sama-sama koreksi diri. Pemkot mo tarus perbaiki kapasitas pangelolaan sampah, deng masyarakat juga musti maningkatkan kapatuhan tarhadap atorang,” ujar Bodewin.

Dia tegaskan, pangalolaan sampah yang bae hanya bisa jadi kalo ada sinergi pemerentah deng masyarakat.

Imbau Jang Bakar Sampah

Wali Kota juga kas inga masyarakat jang bakar sampah di TPS, tarutama sampah palastik yang bisa saja biking rusak fasilitas deng biking cemar lingkungan.

“Di tengah katarbatasan kepeng, Pemkot su barupaya sadia fasilitas. Jadi beta minta jang bakar sampah di TPS, cukup buang di akang pung tampa,” kata Bodewin.

Dia ada tambah lai, fasilitas yang pemerentah sadia akang mo bagus apa lae, akang seng bawa parubahan, kalo perilaku masyarakat seng iko barubah.

“Bagus macang apa pun fasilitas, kalo masyarakat pung kalakuang seng barubah, parcuma saja. Katong seng bisa majo,” tandas Bodewin.

Deng kajadian ini, Pemkot Ambon harap seng ada aksi mudel bagini kumbali, eso-eso.  Dia ajak samua masyarakat sama-sama jaga fasilitas publik par kota ini barsih deng sehat. (Keket)