Dalang wawancara, Gubernur Maluku bilang paleng rasa dapa hormat deng apresiasi atas kunjungan Dubes deng rombongan. Gubernur anggap akang panting paskali par kas kuat hubungan kadua negara.

“Hari ini Beta rasa tarhormat sabage Gubernur Maluku. Katong tarima kunjungan Duta Basar Belanda deng tim par bahas kapantingan barsama kadua negara. Beta apresiasi parhatian deng dukungan Pemerentah Belanda par Indonesia, lebe khusus par Maluku,” ujar Gubernur Hendrik.

Gubernur bilang, hubungan Indonesia- Belanda, Lebe khusus deng Maluku, su tajaleng panjang sacara historis. Sampe oras, puluh-puluh ribu orang Maluku tinggal di Belanda dan pung kontribusi di barbage bidang seni, budaya, deng olahraga.

Gubernur manilai kadekatan historis jadi modal panting par kas kuat karja sama yang lebe nyata, eso-eso.
Lebe lanjut, Gubernur bilang, Pemerintah Belanda buka paluang karja sama deng sajumlah perguruan tinggi di Maluku, macang Universitas Pattimura deng UIN Abdoel Mutalib Sangadji.

Dubes Belanda nanti mo ka UIN, Rabu (8/4/2026) par bakudapa pimpinan universitas deng mo ansprak potensi kolaborasi di bidang pendidikan deng paningkatan kualitas sumber daya manusia.

Salaeng itu, Gubernur juga apresiasi dukungan Pemerintah Belanda tarhadap paningkatan SDM Maluku, tarmasuk malalui program beasiswa LPDP par putra-putri daerah.

Seng cuma sektor pendidikan, pambahasan juga mancakup karja sama di bidang infrastruktur deng peluang ekspor komoditas unggulan Maluku ka pasar Belanda.

“Katong juga bahas paluang ekspor, tarutama komoditas barkualitas dar Maluku par dapa maso ka pasar Belanda. Ini panting par pertumbuhan ekonomi daerah,” jelas Gubernur.

Samantara itu, Dubes Belanda Marc Gerritsen mangaku tarkesan deng kunjungan partama kali ka Maluku.

“Ini kunjungan partama beta ka Maluku dan beta paleng sanang barada di sini. Katong pung hubungan ratusan taong dan komunitas Maluku paleng kuat di Belanda,” ujar Dubes.

Dia manilai potensi karja sama antara Maluku deng Belanda cukup basar, tarutama di bidang pendidikan, olahraga, budaya, deng komoditas ekspor macang rampa-rampa deng mineral.

Pemerentah Provinsi Maluku harap kunjungan ini jadi awal panguatan karja sama yang lebe konkret deng kase manfaat nyata par masyarakat di barbage sektor. (Keket)

Sampe di Bandara Internasional Soekarno–Hatta, Gubernur langsung Pi Masjid Istiqlal par silaturahmi sakaligus koordinasi deng Menteri Agama.

Pertamuan ini jadi bageang dar upaya kas kuat karja Pemerintah Provinsi Maluku dan Kementerian Agama Republik Indonesia par dukung barbage program kaagamaan deng jaga kerukunan umat baragama di daerah.

Gubernur sampe di kompleks Masjid Istiqlal pagi hari, langsung dapa sambut dar Menteri Agama di Kantor Pangalola Masjid. Suasana partamuan barlangsung hangat deng akrab paskali.

Dalang kasampatan itu, Menteri Agama kase plakat ka Gubernur Maluku sabage simbol panghargaan sakaligus panguatan hubungan karja sama antara pemerentah pusat deng pemerentah daerah.

Dalang diskusi, dong dua bahas sajumlah isu strategis, antara laeng panguatan moderasi baragama, dukungan tarhadap pendidikan kaagamaan, serta langkah-langkah kas kuat karukunan antarumat baragama di Maluku.

“Katong mamandang kolaborasi deng Kementerian Agama paleng panting par kas kuat nilai toleransi deng jaga karukunan umat baragama di Maluku,” ujar Hendrik Lewerissa.

Menteri Agama Nasaruddin Umar kase apresiasi par komitmen Pemerentah Provinsi Maluku par bangong kahidupan baragama yang harmonis dan inklusif.

“Maluku pung kakuatan dalang kabaragaman. Upaya manjaga harmoni antarumat baragama di daerah macang ini paleng panting dan patut par kas kuat,” kata Nasaruddin.

Partemuan itu juga jadi momentum par biking erat komunikasi antara pemerintah pusat deng daerah par dukung pambangunan di bidang kaagamaan, lebe di Provinsi Maluku.

Sabage panutup rangkeang partamuan, kadua pihak baku tukar cendramata. Pemerintah Provinsi Maluku serahkan plakat par Menteri Agama sabage simbol panghargaan dan panguatan hubungan kalambagaan. Menteri Agama kase sejumlah Majalah Istiqlal par Gubernur Maluku. (red)

Gubernur kas baku dapa wakil-wakil dua negeri di Ruang Rapat Lantai 2 Kantor Gubernur Maluku, Kamis (5/3/2026). Hadir dalang kagiatan baku dapa ini, Anggota DPRD Provinsi Maluku, Juru Bicara Pemerintah Provinsi Maluku, Kapala Badan Pendapatan Daerah (Bapenda) Provinsi Maluku, Direktur Pembinaan Masyarakat (Dirbinmas) Polda Maluku, parwakilan Pemerintah Kabupaten Maluku Tengah, Kapolsek Leihitu yang diwakili, Raja Hitumessing deng parwakilan warga, Raja Morella deng tokoh masyarakat, tamba lai Raja Hitu Lama.

Pertemuan bajalang dalang suasana dialog orang basudara. Samua pihak sampekan harapan par situasi dame lakas jadi di dua negeri. Deng bagitu, warga Hitumessing deng Morella bisa hidop bae-bae macang kamuka-kamuka.

Dalang diskusi, dapa tau masyarakat dua negeri sama-sama ingin kumbali hidop baku birman deng dame.

Parwakilan masyarakat Hitumessing sampekan apresiasi par Gubernur Maluku yang su ambe inisiatif par kas baku dapa samua dudu sama-sama.

“Katong paleng apresiasi partemuan ini deng Bapak Gubernur Maluku. Katong juga bilang dangke tagal pemerentah ada pung komitmen par bantu biking bae katong pung rumah-rumah yang rusak. Katong juga pung komitmen par hidop dame kumbali,” ungkap tokoh masyarakat Hitumessing.

Samantara itu, parwakilan masyarakat Negeri Morella menilai salah satu langkah panting par biking kuat rasa dame yaitu bangong kumbali rumah-rumah yang kana dampak konflik.

“Katong pung titik barat panyalasean deng bangong kumbali rumah-rumah yang tabakar. Kalo itu bisa biking deng bae, tantu rasa dame itu akang datang sandiri,” ujarnya.

Dia juga tekankan peran para raja deng tokoh masyarakat dua negeri paleng panting par tarus jaga komunikasi deng antisipasi potensi konflik susulan dalang masyarakat.

Gubernur Maluku Hendrik Lewerissa manegaskan komitmen Pemerentah Provinsi Maluku deng Pemerentah Kabupaten Maluku Tengah par lakas-lakas tangani dampak karusakan tagal bakalae tempo hari.

“Katong paleng manyasal paristiwa itu akang jadi. Mar karusakan itu nanti lakas Pemerentah Provinsi Maluku deng Pemerentah Kabupaten Maluku Tengah uros akang. Dalang tempo capat, katong mo biking bae rumah-rumah yang rusak,” tegas Hendrik.

Gubernur juga harap barbage tindakan yang bisa ganggu aktivitas masyarakat, macang pamblokiran jalang di beberapa titik, bisa lakas kas stop akang.

“Katong harap dame bisa lakas jadi sacara permanen. Peristiwa su jadi katong manyasal akang mar itu kajadiang su lewat. Mari katong lia hari eso deng samangat baru, deng baku hormat, baku hargai, iko atorang hukom, deng parcaya proses hukom par aparat yang barwenang,” pungkas Gubernur Hendrik.

Pemerentah Provinsi Maluku harap partemuan ini jadi langkah awal par biking kuat rekonsiliasi deng biking pulih hubungan orang basudara di Negeri Hitumessing deng Negeri Morella. (Keket)

Sampe oras ini, lebe-lebe di kalompok netizen, baku malawang masih rame. Maski bagitu, Pemerentah Provinsi Maluku tetap karas deng prinsip: Kaputusan biking MIP di Pulau Ambon akang pung dasar hasil kajian ilmiah, bukang partimbangan politis apalai sampe kabarpihakan teritorial.

Gubernur Maluku Hendrik Lewerissa dalam konferensi pers di Kantor Gubernur, Kamis (26/2/2026), kas lurus barbaga asumsi yang barkembang di ruang publik. Dia bicara tegas, rekomendasi Ambon sabage tampa bangong MIP marupakan hasil studi kalayakan dar World Bank, bukang kajian internal pemerentah daerah.

“Bank Dunya biking pra-studi kalayakan sampe studi lanjutan. Dong pung kasimpulan, Ambon tampa paleng feasible. Katong musti hormat par hasil kajian ilmiah,” ujar Hendrik.

Manurut Gubernur, salah satu faktor panentu adalah kasiapan infrastruktur deng kakuatan pasar di Pulau Ambon. Sabage pusat aktivitas ekonomi dan konsentrasi penduduk tarbasar di Maluku, Ambon puny daya dukung yang lebe stabil par jamin kabarlanjutan investasi jangka panjang.

Dia jelaskan, kalo MIP dudu di Ambon, akang lebe tabuka par integrasi langsung deng simpul distribusi utama macang palabuhan deng bandara. Akang par tekan biaya logistik deng manghindar proses bongkar-muat ulang-ulang yang bisa saja tamba beban ongkos produksi.

“Kalo biaya logistik tinggi, daya saing langsung turong. Investor pasti hitung akang,” kata Hendrik.

Hendrik juga biking inga, proyek skala basar mudel MIP seng cuma soal bangong infrastruktur fisik, mar musti pastikan rante pasok bajalang efisien deng manarik par palaku usaha.

Gubernur tegaskan, peran Pemerentah Provinsi Maluku dalang proyek ini lebe barsifat fasilitatif. Pemerentah daerah bangung komunikasi deng masyarakat yang kana dampak, bantu proses negosiasi lahan, deng bentuk tim pandamping. Dari sisi pambiayaan, APBD Maluku seng pung kapasitas fiskal par ongkos akang proyek basar macang MIP.

Hendrik juga tanggapi isu panandatanganan nota kasepahaman (MoU) di Osaka, Japang. Manurut dia, Pemprov Maluku bukang pihak dalang akang kasapakatan. Kahadiran Gubernur deng Bupati SBB cuma jadi saksi par karja sama dua parusahaan swasta par pra-studi kalayakan.

“Bukang MoU pambangunan MIP. Itu cuma kasapahaman antarparusahaan par biking kajian awal,” tegas Hendrik.

Oras ini, rencana pambangunan MIP dapa dampingan Kamenterian Perencanaan Pembangunan Nasional (Bappenas), yang bantu fasilitasi koordinasi deng World Bank dan pastikan proyek mamanuhi syarat teknis par skema pambiayaan internasional.

Takait wacana awal pambangunan MIP di Wasarissa, Hendrik seng manyangkal bahwa akang gagasan lahir dar samangat pamarataan ekonomi par seng tapusat di Ambon. Mar dia manilai, akang visi tetap musti tunduk par data deng realitas kalayakan.

“Akang pung tujuan bae, mar kalo kajian bilang balong akang pung waktu, katong musti lapang dada,” ujar Hendrik.

Sacara politik, Gubernur manolak anggapan yang bilang kata pamilihan Ambon sabage tampa MIP mancarminkan kapantingan wilayah tartantu. Par Hendrik, yang lee panting itu MIP dapa bangong di Maluku deng mampu jadi simpul distribusi strategis par Indonesia Timur deng kawasan Pasifik Selatan.

“Ini bukang soal Ambon, Seram, ato Buru. Ini soal bagemana Maluku pung palabuhan tarintegrasi yang banar-banar hidup deng barkelanjutan,” kata Gubernur Hendrik.

Hendrik tegaskan, Pemerentah Provinsi Maluku pilih jalur yang paleng bartanggung jawab, iko hasil kajian ilmiah par pastikan MIP seng sakadar jadi proyek prestisius, mar infrastruktur strategis yang kase manfaat nyata par masyarakat Maluku dalang jangka panjang. (Piere)

Gubernur Maluku Hendrik Lewerissa batamang Dubes RI pi lia-lia Pelabuhan Perikanan Nusantara (PPN) Ambon deng parusahaan pangolahan perikanan nasional, PT Harta Samudera, yang pung kantor operasi di kawasan palabuhan.

Dubes Susi Marleny Bachsin bisa lia langsung ekosistem industri perikanan di Ambon. Sakitar satu jam, rombongan bajalang kuliling area produksi, lia langsung proses pananganan ikang hasil tangkapan nelayan Maluku, mulai dar tahap sortir, pangolahan, sampe pangamasan par kabutuhan ekspor.

Kunjungan lapangan ini jadi bageang panting par tau kasiapan Maluku sabage pemasok langsung hasil laut kea pasar Eropa, lebe khusus Portugal.

Gubernur Maluku Hendrik Lewerissa bilang, kahadiran Dubes RI par Portugal ini jadi langkah awal par buka jalur investasi dan perdagangan yang lebe loas. Manurut Hendrik, sajumlah investor dan buyer Portugal ada pung minat par komoditas unggulan Maluku macang ikan segar, udang, deng cumi-cumi.

“Kunjungan ini jadi bentuk panjajakan pasar. Portugal pung potensi investor deng buyer yang mo bali hasil parikanan langsung dari Maluku,” ujar Hendrik.

Sabage tindak lanjut, Pemerentah Provinsi Maluku mo biking partemuan daring deng sajumlah calon investor Portugal par mo bahas paluang karja sama dan investasi di sektor perikanan.

Hendrik bilang, di tengah dinamika ekonomi global dan kabijakan efisiensi anggaran, investasi manjadi strategi utama par dorong partumbuhan ekonomi Maluku. Mar Hendrik harap investasi itu harus sehat, patuh aturan, dan barpihak ka kapentingan daerah.

“Investasi musti kase manfaat nyata, tarutama par masyarakat lokal, malalui panyarapan tenaga karja deng peningkatan kapasitas SDM,” tegas Hendrik.

Ia juga mengajak seluruh pemangku kepentingan menjaga stabilitas sosial dan menciptakan iklim usaha yang kondusif. Aparatur pemerintah, kata dia, harus hadir sebagai pelayan publik yang memberikan kemudahan perizinan dan kepastian hukum bagi investor.

Kunjungan Dubes RI ke Ambon ini bageang dari kalanjutan komunikasi bisnis yang tabangun waktu kunjungan Gubernur Maluku ke Lisbon, 2025 lalu, waktu baku dapa sajumlah palaku usaha Portugal.

Eso-eso, karja sama seng cuma di sektor parikanan, mar juga pung potensi maso ka sektor pariwisata, perkebunan, sampe pangalolaan lingkungan.

“Maluku tabuka par investasi yang bartanggung jawab dan barkalanjutan. Potensi katong besar, dan katong siap karja sama deng mitra internasional,” pungkas Hendrik.

Di PPN Ambon, diplomasi seng barlangsung di ruang rapat formal, malaengkan di di tengah aktivitas nelayan dan pekerja pangolahan ikang. Akang jadi pasang simbolik, bahwa masa depan Maluku deng kakayaan laut, ada dapa kalesang langsung dar dermaga-dermaga yang manghadap samudera. (red)

Gubernur Maluku Hendrik Lewerissa deng Katua Majelis Pekerja Harian (MPH) Sinode GPM Pandita Sadrac Izack Sapulette resmikan akang, deng tanda tangan prasasti dan penekanan tombol. Sadangkan Maya Baby Lewerissa, Istri Gubernur Maluku sakaligus Ketua TP-PKK Provinsi Maluku dapa hormat par gunting pita. Acara lanjut deng panyarahan kunci ka Jemaat GPM Itawaka

Samua kagiatan paresmian tarangke deng ibadah syukur di Gereja Maranatha Itawaka. Katua MPH Sinode GPM Pandita Sadrac Izack Sapulette yang pimpin ibadah.

Gadong Pastori deng Gadong Serbaguna ini mulai bangong dari waktu taruh batu alas sampe abis, semua makang kepeng sakitar Rp4,7 miliar. Pastori par kadiaman pandita yang malayani Jemaat GPM Itawaka, sadangkan Gadong Serbaguna su dapa rancang par jadi pusat kagiatang jemaat, mulai dari kagiatan seremonial, pambinaan iman, sampe palayanan sosial.

Dalang sambutan, Gubernur Maluku Hendrik Lewerissa tegaskan, pantahbisan Gadong Pastori daleng Gadong Serbaguna jadi bukti nyata panyartaan Tuhan par Jemaat GPM Itawaka.

“Pambangunan ini bukang sakadar bangunan fisik, mar juga jadi simbol berkat, panyartaan, deng kasih karunia Tuhan. Beta harap dar gadong ini akan tumbuh parsakutuan yang indah dan utuh, hasilkan jemaat yang misioner, sanggup pikol tugas palayanan garejawi iko amanat agung Tete Manis,” ujar Gubernur Hendrik.

Dia tambahkan, kahadiran sarana garejawi yang representatif juga sajalang deng upaya bangong Maluku yang rukun, dame, religius, deng pung martabat, di mana gareja pungi peran strategis dalang mambantuk karakter masyarakat.

Samantara itu, Katua MPH Sinode GPM Pandita Sadrac Izack Sapulette mangajak samua warga jemaat par maknai paresmian ini sabage buah dar kasatiaan dan kacintaan jemaat par gareja.

“Kadua gadung jadi bukti komitmen warga jemaat deng anana Negeri Itawaka dalang manopang palayanan gareja pada aspek spiritual, kasih, sosial, dan pambinaan generasi,” ungkapnya.

Pandita jelaskan, Gedung Serbaguna sejak awal su rancang par jadi ruang hidop bersama yang tabuka deng multifungsi, tarmasuk pangambangan kapasitas generasi muda malalui palatihan bahasa deng komputer.

Pantahbisan Gadong Pastori deng Gadong Serbaguna ini jadi tonggak panting par Jemaat GPM Itawaka vor tarus bagara sabage gareja yang hidop, tabuka, dan misioner, juga kas hadir tarang dan berkat par masyarakat deng daerah sakitar. (red)

Parayaan mulai deng prosesi barisan panjang pandita-pandita deng umat Jemaat GPM Ouw. Musisi-musisi Ouw tiop suling antar-antar rombongan. Samua bajalang palang-palang ka tampa acara. Rasa akang khidmat, sakral, rasa-rasa macang masa tempo dolo tasambong deng oras ini.

Pandita J. Haurissa deng Raja Negeri Ouw Wellem Pelupessy bajalang paleng muka, pimpin barisan yang bagara majo plang. Dua tokoh ini jadi simbol iman Kristen deng adat Negeri Ouw bisa baku dapa lalu sama-sama bajalang dalang hidop yang manis.

Sampe di muka Gadong Gareja Pniel, ada prosesi obor. Pandita J. Haurissa kase obor sabage lambang api Injil Kristus yang seng parnah mati par Ktua Majelis Jemaat GPM Ouw Pandita Erick Nanuru. Pandita Nanuru lanjut sambong akang obor par Wakil Ketua I MPH Sinode GPM Pandita Ricardo Rikumahu. Samua ini jadi simbol iman yang seng taputus mar sambong manyambong dar satu angkatan ka angkatan.

Abis prosesi obor, kabaktian bajalang paleng khusyuk. Gubernur Maluku Hendrik Lewerissa deng rombongan juga su maso gadong gareja, iko saluruh rangkean ibadah deng jemaat yang datang biking pono Gareja Pniel.

Dar prasasti yang ada di sana, bisa dapat baca Gareja Pniel di Ouw su badiri taong 1875 pada masa pamarentahan Raja Ouw Johan Abraham Pelupessy, sadangkan yang tahbis itu nama S. J. de Vries, yang pung jabatan Hulppredikker Saparua atau Asisten Pendeta.

Gubernur Hendrik Lewerissa waktu kase kata sambutan, mangucapkan salamat par Jemaat yang marayakan har jadi ka-150 Gadong Gereja Pniel, deng salamat paringatan 209 taong baptisan partama di Negeri Ouw.

Hendrik tegaskan, parayaan ini bukang sakadar manganang umor gadong gareja deng jemaat, mar jadi panggelan iman par umat lebe tamba baakar dalang Kristus, hidop jadi garang dan tarang dunya, deg paduli sesama.

Gubernur Hendrik kase umpama Gereja Pniel sabage bahtera iman yang su lewat omba deng galombang sejarah. Salama satu setengah abad, gereja ini tetap badiri tagak tangada barbage tantangan zaman, samua ini tagal panyartaan Tete Manis saja.

“Pniel tatap jadi rumah persekutuan, tampa doa, deng pusat kahidupan rohani masyarakat Ouw dar masa ka masa,” ungkapnya.

Manurut Gubernur, seng banya negeri di Maluku yang mampu jaga ingatang sejarah iman sampe lebe dua abad. Samua itu jadi bukti kuat, masyarakat Negeri Ouw pung akar nilai katuhanan deng adat istiadat yang karas.

Gubernur Hendrik juga sampekan apresiasi khusus par Katua Majelis Jemaat deng samua parangkat palayan, Pemerentah Negeri, panitia parayaan, deng samua warga Jemaat GPM Ouw—bae yang tinggal di kampong halaman mopun di parantauan—atas kasatiaan dong rawat Gadong Gareja PNIEL dan jaga warisan iman baptisan partama yang sakarang su umor 209 taong.

Menurutnya, Gereja PNIEL adalah saksi nyata pengorbanan dan ketekunan masyarakat Ouw dalam menghargai dan merawat warisan leluhur.

Paringatan 209 Taong Baptisan Pertama, kata Gubernur, musti jadi pangingat jati diri sabage umat Tuhan, sakaligus pamicu par anana muda Negeri Ouw par menjaga warisan iman itu malalui kalakuang hidop bae yang takotang par Tuangala.

Dia juga tegaskan komitmen Pemerentah Provinsi Maluku par tarus dukung pambangunan masyarakat deng basis kaagamaan, sambil mangajak jemaat GPM Ouw jaga karukunan, biking erat nilai pela deng gandong, serta jadi mitra pemerentah par biking barhasil pambangunan daerah.

“Mari katong pake momentum ini sabage pangikat parsudaraan, panguat palayanan, deng dasar sinergi sama pemerentah, demi Maluku yang majo, sajahtera, dan dame, par Maluku pung bae,” tandas Gubernur.

Parayaan iman di Negeri Ouw hari itu pun jadi lebih dar sakadar seremoni. Akang su barobah jadi kasaksian hidop bahwa iman yang dapa rawat deng setia, mampu tambus zaman deng tatap manyala sampe oras tadi. (Leo)

Tagal situasi di tampa kajadiang bagitu tegang, Pemerentah Provinsi Maluku bagara capat. Gubernur Maluku Hendrik Lewerissa langsung ambe inisiatif biking partamuan darurat deng samua unsur Forkopimda di Markas Polda Maluku, Jumat malang.

Partamuan akang bajalang amper satu jam. Kapolda Maluku seng ada, mar ada Wakapolda Maluku Brigjen Pol. Imam Thobroni, Wakil Gubernur Abdullah Vanath, Kasdam XV/Pattimura Brigjen TNI Nefra Firdaus, Danrem 151/Binaiya Brigjen TNI Rafles Manurung, Kabinda Maluku, Wali Kota Ambon Bodewin Wattimena, Bupati Seram Bagian Timur Fachry Husni Alkatiri, Kapolresta Ambon, Dandim 1504/Ambon, Ketua MUI Maluku, deng tokoh masyarakat SBT Munir Kairoty.

Gubernur Hendrik bicara tegas dalang partamuan itu. Dia bilang, partamuan itu marupakan bantuk kahadirang nagara dan dukungan pemerentah daerah par Polri dalang panagakkan hukum deng pamulihan situasi keamanan.

“Ini nagara hukum. Satiap parbuatan malawan hukum, bae aktor intelektual deng palaku lapangan, harus dapa proses iko atorang,” tegas Lewerissa.

Dia juga minta publik kase kaparcayaan ka aparat panegak hukum par bakarja deng profesional.

“Polisi bakerja pake alat bukti. Kalo bukti su cukop, beta yakin dong seng tidak ragu bartindak,” ujarnya.

Berdasarkan laporan Wakapolda dan Kapolresta Ambon, jumlah korban luka mencapai 10 orang dari kedua belah pihak. Para korban saat ini menjalani perawatan di sejumlah rumah sakit di Kota Ambon.

Gubernur minta masyarakat manahang diri deng seng parlu biking aksi balasan yang justru nanti biking konflik tampa basar.

“Jang maeng hakim sandiri. Aksi balasan cuma tamba biking kaadaan lebe seng bae deng biking rugi masyarakat yang seng iko bakalai,” katanya.

Gubernur Hendrik juga biking inga masyarakat jang gampang makang cabang deng informasi liar di media sosial. Pemerintah, kata dia, su minta pihak takait par kas turung konten yang bacabar.

“Rujukan informasi resmi cuma dar kapolisian,” tegasnya.

Wakapolda Maluku Brigjen Pol. Imam Thobroni pastikan, situasi di kawasan STAIN dan sakitar situ su kondusif. Ada 300 personel gabungan su turung biking aman.

“Katong masih kumpol alat bukti. Su 20 sampe 30 saksi dapa pareksa. Ini rangkean paristiwa, jadi musti carmat paskali,” jelasnya.

Dari hasil partamuan juga samua sapakat biking pos pengamanan gabungan parmanen deng pasang CCTV di titik-titik rawan, bae pemerintah bae swadaya masyarakat.

Agenda wisuda Universitas Islam Negeri (UIN) A.M. Sangadji nanti mo jalang iko jadwal, seng taganggu deng kajadiang kaco ini. Polda Maluku tetap biking pangamanan. (red)

Waktu kase sambutan, Gubernur Lewerissa kase apresiasi par samua pihak, lebe khusus par PT Karya Bahari Abadi Yamaha Marine, yang su bantu kapal capat. Kapal capat ini nanti Yayasan Heka Leka Foundation pake akang. Kapal literasi ini akang pung fungsi par jadi sarana panghubung antar-desa par kase layanan literasi yang inklusif par anana, jangkau skolah deng komunitas yang salama ini susah dapa akses.

“Heka Leka su tunju komitmen luar biasa par biking majo pendidikan di Maluku. Upaya rintis perpustakaan ramah anak, deng ampa perpustakaan yang katong resmi har ini, jadi kontribusi paleng panting par kas tamba minat baca deng kualitas balajar anana Maluku,” ungkap Gubernur.

Sebage provinsi kapulauan, Maluku tatongka tantangan pamarataan akses pendidikan. Masih banya anana yang tinggal di pulau-pulau kacil deng katarbatasan buku, pandampingan balajar, deng ruang literasi. Gubernur tegaskan, tantangan itu bisa atasi akang malalui karja sama deng kolaborasi.

Salaeng literasi, Gubernur kase bantuan sarana deng prasarana pertanian par kalompok tani di Saparua, sabage upaya biking bae produktivitas deng katahanan ekonomi masyarakat desa.

“Bantuan ini harap bisa dukung paningkatan produktivitas masyarakat deng biking kuat katahanan ekonomi di tingkat desa,” jelasnya.

Gubernur tutu acara deng ucap danke banya par samua pihak yang su kase kontribusi par biking majo literasi deng kasajahteraan masyarakat Maluku.

“Samoga karja sama ini tarus bajalang deng kase manfaat par Maluku pung bae,” pungkas Hendrik Lewerissa. (Piere)

Banya orang datang ka rumah duka. Orang-orang basar banya yang datang, macang anggota DPR RI dan DPD RI asal Maluku, tokoh-tokoh Maluku di Jabodetabek, Forkopimda Provinsi Maluku, pimpinan dan anggota DPRD Maluku, sampe Bupati/Wali Kota se-Maluku. Keluarga besar almarhum dan kerabat dekat samua su ada di area rumah duka dar pagi.

Gubernur Hendrik bicara deng suara tenang mar tegas, kapergian Said Assagaff bukang cuma duka par kaluarga, mar juga kahilangan basar par orang Maluku.

“Katong kanal almarhum sabage sosok pemimpin tanang, bijaksana, dan pono integritas. Sapanjang jadi gubernur, antua kase parhatian beasar pada pembangunan sumber daya manusia, stabilitas daerah, biking kuat identitas budaya Maluku, sampe pembangunan infrastruktur yang sakarang jadi fondasi kemajuan daerah,” ujar Gubernur.

Hendrik juga bilang, sosok yang akrab dengan sapaan Pak Bib ini, tipe pemimpin yang lebe banya bakarja dar pada bicara kewel. Menurut dia, Pak Bib punya karakter randah hati. Almarhum dekat deng masyarakat dar macang-macang golongan, tagal itu Pak Bib jadi teladan pemimpin yang tulus.

“Antua sering tekankan bahwa tugas pemerintahan adalah amal jariyah, ladang pangabdian yang akang pung pahala tarus mangalir. Hari ini katong jadi saksi bahwa kabaikan almarhum su kase manfaat par masyarakat Maluku, dan insya Allah jadi bakal paleng bae di hadapan Tuhan Yang Maha Kuasa,” ucapnya.

Gubernur Maluku sampekan duka cita paleng dalam atas nama pemerintah dan seluruh masyarakat Maluku. Ia juga panjatkan doa par keluarga yang ada.

“Semoga Allah SWT kase kasabaran, katabahan, deng kakuatan par keluarga, dan limpahkan rahmat-Nya par almarhum,” tutup Lewerissa.

Kapergian Said Assagaff su tinggalkan jejak pangabdian panjang par tanah Maluku—dari birokrasi sampe pucuk pemimpin daerah. Sosok Pak Bib akan tarus orang inga sabage pemimpin yang tata pondasi pambangunan dan kase taladan par generasi panerus. (red)