Benhur bilang, pananganan karhutla musti malibatkan instansi takait sacara tarpadu. Satiap pihak, ujar dia, parlu tau dong pung rol deng baku tukar informasi, par patugas bisa respons kondisi di lapangan sondor talat.

“Pananganan karhutla parlu biking deng koordinasi yang bae. Pemerentah musti tau parkambangan di lapangan, deng biking pasti langkah yang mo ambe iko kondisi satiap tampa,” kata Benhur par wartawan, waktu tahubung dar Ambon, Rabu (7/10/2026).

Dia mandorong Organisasi Parangkat Daerah (OPD) tarkait kase tau pamantauan sacara tarus-manarus. Informasi tampa karhutla, cuaca, arah panyabaran api, deng kabutuhan patugas bisa jadi bahan par pemerintah, par tantukan prioritas deng dukungan.

Manurut Benhur, koordinasi juga parlu tajaleng deng pemerentah kabupaten deng kota. Laporan masyarakat musti lakas kas tarus par patugas, sahingga kabutuhan di tampa yang kana dampak bisa lakas dapa tau, dan bantuan bisa pung arah tepat.

Benhur biking inga, pananganan seng cuma fokus di pamadaman. Pemerentah daerah parlu lia kasalamatan warga, tarutama kalo asap su ganggu aktivitas masyarakat ato kabakaran su deka parmukiman. Informasi manganei situasi deng langkah parlindungan parlu kas tau deng bae.

Dia juga imbau warga, par jang pake api waktu buka lahan baru, atau biking barsi lahan. Kalo dapa titik api, harap paskali masyarakat lakas lapor par aparat ato patugas, deng kase patunjuk lokasi yang jelas.

“Jang bakar lahan. Kalo lia titik api, lakas lapor patugas agar par dapa handel sabalong akang jadi lebe basar,” imbau Benhur.

Lebe lanjut, dia kas tambah, pancegahan deng pamadaman parlu bakalang bariringan. Laporan warga yang dapa renspon capat, lalu pemeretah pung pamantauan tarus-tarus, bisa bantu kas kurang panyabaran api.

“Beta harap Pemprov Maluku, pemerentah kabupaten deng kota, patugas lapangan, deng masyarakat tarus bakerja sama dalang pananganan karhutla. Koordinasi yang bae parlu paskali par biking kurang dampak kabakaran tarhadap lingkungan deng warga,” tandas Benhur Watubun. (Red/Merindu)

“Kepeng dar PT SMI sabasar Rp174 miliar dan PT Bank Maluku-Malut sabasar Rp95 miliar,” kata Benhur par wartawan di Ambon, Salasa (29/9/2026).

Manurut dia, pambageang kepeng parlu partimbangkan kabutuhan deng kondisi satiap wilayah, par manfaat pambangunan seng manumpuk di daerah tartantu. Usulan pinjaman dar SMI yang pemerntah daerah biking, su dapa tekeng di pusat.

DPRD Provinsi Maluku, kata Benhur, nanti mo lia akang pung distribusi bae-bae. Daerah yang balong dapa kepeng secara optimal bisa dapa partimbangan par dapa akang dar sumber laeng, tarmaso Bank Maluku.

“Pambagian deng distribusi kepeng yang dapa pinjang dar SMI ini musti sama rata. Kalo ada daerah yang balong takaver bae-bae, maka bisa kaver juga lewat pinjaman daerah dar PT Bank Maluku sabasar Rp95 miliar,” ujar Benhur.

Dia bilang, bage sama rata itu bukang maksud samuq daerah dapa sama banya. Manurut Benhur, akang pung basar musti iko kabutuhan dent karakteristik wilayah, deng taruh kira indikator luas wilayah deng jumlah panduduk.

“Akang pung inti, pambageang kepeng musti taruh kira kabutuhan, deng karakteristik masing-masing tampa. Sajumlah indikator macang loas wilayah deng jumlah panduduk juga pqrlu jadi dasar, par ukor porsi pambiayaan,” tegas Benhur.

Benhur minta, samua 11 kabupaten deng kota di Maluku dapa rekeng, yakni Kabupaten Maluku Tengah (Malteng), Maluku Tenggara (Malra), Seram Bagian Timur (SBT), Kepulauan Aru, Buru, Buru Selatan (Bursel), Seram Bagian Barat (SBB), Maluku Barat Daya (MBD), deng Kepulauan Tanimbar, juga Kota Ambon deng Kota Tual.

“Samua tampa itu pung nilai musti sama. Sama dalang arti, bage akang iko loas luas wilayah, jumlah panduduk deng laeng-laeng,” kata Watubun.

Salaeng soal pamarataan, dia biking inga pemerentah daerah par pake kepeng SMI iko katantuan deng standar operasional prosedur (SOP).

Akang kepeng, kata Benhur, parlu lebe parhatikan kagiatan yang su bajalang. Tagal itu, pemda parlu rekeng bae-bae waktu palaksanaan yang tasisa di taong 2026.

Benhur juga minta pambahasan APBD Parubahan 2026 lakas biking kelar akang. Batas waktu yang Kamenterian Dalam Negeri patok oti 30 September 2026. Pangalokasian kepeng, tarmaso yang basumber dar pinjaman daerah, musti taruh akang deng jalas.

“Pambahasan APBDP 2026 lakas biking kalar, tagal Kamendagri kase batas waktu 30 September 2026. ByPangalokasian kepeng dalang APBD Parubahan 2026 tetap musti susong deng jalas, tarmaso pake kepeng yang pung sumber pambiayaan dar pinjaman daerah,” kata Benhur. (Red/Merindu)

Manurut Benhur, dukungan transfer pemerentah pusat paleng panting di tengah kabutuhan pambangunan daerah yang masih parlu kepeng banya.

Dia harap kabijakan pemerentah pusat takait transfer ka daerah bisa kase tampa yang lebe basar par daerah biking barbage program pambangunan sasuai kabutuhan masyarakat.

“Katong harap Presiden lakas realisasi transfer daerah. Itu musti kas nae akang par kapantingan pambangunan,” kata Benhur par wartawan di rumah rakyat, Karang Panjang, Ambon, Senen (28/9/2026).

Benhur manilai, dukungan pemerentah pusat malalui transfer ka daerah parlu par pambangunan di Maluku bisa bajalang deng bae, lebe-lebe par kabutuhan pambangunan di kabupaten/kota.

Dia manegaskan, pemerentah daerah deng DPRD tarus barupaya susong kabijakan pambiayaan yang taukur deng partimbangkan kamampuan kauangan daerah. Tagal itu, dukungan fiskal dar pemerentah pusat tetap jadi bageang penting par jaga pambangunan daerah pung kabarlanjutan.

“Katong harap dalang hal biking kabijakan ini, akang bisa barmanfaat bae-bae ka saluruh kabupaten kota,” ujar Benhur.

Benhur harap realisasi transfer daerah bisa lakas jadi par pemerentah daerah pung dukungan anggaran yang cukup par kas capat palaksanaan program pambangunan deng panuhi kabutuhan masyarakat di Maluku. (Red/Merindu)

Katua DPRD Provinsi Maluku Benhur Watubun biking inga par parsoalan yang kamuka cuma dar individu, akang seng barubha jadi partikaian antarkalompok. Dia minta samua warga bisa manahang diri deng stop biking apa-apa yang bisa kas basar eskalasi konflik. Manurut dia, konflik sosial seng parnah barenti di dorang yang tarlibat langsung. Katika parsoalan pribadi tabawa ka ruang kalompok, akang pung dampak bisa meanjalar ka kaluarga, masyarakat, bahkan marusak hubungan kakarabatan yang su bangong bataong-taong.

“Jang sampe parsoalan satu ato dua orang lalu biking hubungan masyarakat samua jadi rusak,” kata Benhur di Ambon, Sabtu (12/9/2026).

Dia manilai kondisi Patahuwe-Lisabata harus musti lakas kas abis akang sabalong katagangang barkembang jadi konflik sosial yang lebe basar deng manimbulkan korban baru. Benhur minta tokoh adat, tokoh agama, tokoh masyarakat, deng pemerentah negeri abe rol sabage panengah.

Para pamangku kapentingan itu, kata dia, musti jadi bageang dar solusi deng seng ambe langkah yang justru biking runcing kaadaan.

Manurut Benhur, Maluku pung modal sosial paleng karas par kas abis parsoalan deng dame. Adat, pela, gandong, deng nilai-nilai parsaudaraan su jadi bageang dar kahidupan masyarakat Maluku. Tagal itu, akang nilai-nilai musti kas hidop dalang situasi macang sakarang, bukang sakadar jadi imbol dalang barbage seremonial.

“Adat musti jadi jalang par kas baku dapa orang yang bakalae, bukang jadi alasang par biking jao masyarakat,” ujar Benhur.

Dia harap tokoh-tokoh masyarakat bisa membuka ruang komunikasi antara pihak-pihak yang bakalae sahingga parsoalan seng ambe jalang kakarasang.

Bagi Benhur, biking abis benturan marupakan langkah awal. Yang lebe panting itu kase pasti masyarakat bisa kumbali hidop baku birman sondor baku dendam sampe ka generasi barikot.

Di sisi laeng, Benhur bilang ajakan hidop dame seng bararati sondor ada proses hukum. Kalo ada pihak yang tabukti biking tindak pidana, aparat panegak hukum musti tetap proses seasuai katantuan yang barlaku. Mar, proses hukum itu musti bajalang proporsional deng seng seret masyarakat yang sondor talibat.

“Yang salah musti dapa proses, yang banar musti dapa lindung. Jang sampe masyarakat yang seng tahu apa-apa ikut jadi korban,” tegas Benhur.

Benhur juga biking inga masyarakat jang ambe tindakan sandiri tarhadap pihak yang musti tanggong jawab. Aksi balasan, manurut Benhur, akang cuma par biking rante kakarasan baru.

“Tahang diri deng lapas saja par aparat. Jang balas deng tindakan yang justru biking parsoalan baru,” kata Benhur.

Dia harap Pemprov Maluku , Pemkab SBB, kadua pemerentah negeri, aparat kaamanan, deng tokoh-tokoh masyarakat bisa bagara sama-sama par biking pasti situasi lakas aman deng kondusif kumnbali,.

Manurut dia, panyalaseian parsoalan Patahuwe-Lisabata seng boleh cuma orientasi di panghentian benturan. Pamulihan hubungan sosial musti jadi bageang panting dar proses kalo situasi kaamanan takandali.

Sebab, konflik yang barenti secara fisik balong tantu abis sacara sosial. Rasa takotang, trauma, dendam, deng baku curiga bisa batahang jao lebe lama kalo seng biking abis malalui komunikasi deng rekonsiliasi. Tagal itu, Benhur minta samua pihak lia parsoalan deng perspektif yang lebe panjang.

“Yang musti kita salamatkan bukang cuma kaamanan hari ini, mar juga masa depan parsaudaraan masyarakat Patahuwe deng Lisabata,” pungkas Benhur.

Pasang itu jadi panting di tengah situasi yang masih sensitif. Sebab, waktu bara konflik tabiar manyala, parsoalan yang kamuka akang kacil bisa barubah jadi api basar yang susah par kas mati akang.

Sakarang, Patahuwe deng Lisabata seng cuma parlu panghentian kakarasang mar juga kabaranian samua pihak par kumbali dudu sama-sama, buka ruang dialog deng marawat kumbali samangat orang basudara yang retak. (Mario)

Akang sikap tanae dalang Rapat Paripurna DPRD Provinsi Maluku deng agenda pandapat akhir fraksi-fraksi tarhadap Rancangan Peraturan Daerah (Ranperda) manganei Partanggungjawaban Palaksanaan APBD Provinsi Maluku Tahun Anggaran 2025 di Ruang Rapat Paripurna DPRD Maluku, Rabu (26/8/2026).

Katua DPRD Provinsi Maluku Benhur George Watubun bilang, pambahasan partanggungjawaban palaksanaan APBD marupakan bageang penting, par mo pastikan pangalolaan kepeng daerah bajalang transparan, akuntabel, deng iko katentuan peraturan parundang-undangan.

Dalang akang pambahasan, Banggar DPRD su biking abis dong pung melaksanakan tugas deng kawenangannya sama-sama Tim Anggaran Pemerintah Daerah (TAPD), par lia bae-bae akang palaksanaan APBD Taong Anggaran 2025.

“Pambahasan ini marupakan bageang dar palaksanaan prinsip transparansi, akuntabilitas, deng tata kalola pemerentahan yang bae,” kata Benhur.

Manurut Benhur, hasil pambahasan Banggar seng cuma pung orientasi par partanggungjawaban administratif atas palaksanaan anggaran, mar juga jadi bahan evaluasi tarhadap kinerja pemerentah daerah, dalang manjalankan program pambangunan.

Tagal itu, DPRD minta Pemerentah Provinsi Maluku kase parhatian serius tarhadap paningkatan kinerja samua OPD deng BUMD.

Parbaikan akanng kinerja paleng panting, par mo pastikan satiap program deng kagiatan yang su tarancana dalang APBD akang batul-batul kase dampak deng manfaat par orang banya.

“Katong minta parhatian Pemerentah Daerah, par tarus biking bae deng kas nae kinerja OPD deng BUMD,” tegas Benhur.

Salah satu parhatian utama DPRD adalah paningkatan PAD. Pemerentah daerah parlu gale tarus, deng biking optimal barbage potensi pandapatan yang daerah punya sahingga katargantungan tarhadap transfer pusat bisa dapa tekan.

Salaeng kas nae PAD, DPRD juga taru kira optimalisasi panyarapan anggaran balanja.

Manurut Benhur, realisasi anggaran musti ator akang bae-bae par efektif deng efisien, par dukung program prioritas, deng jawab kabutuhan masyarakat.

Optimalisasi balanja daerah juga musti dapa iko deng pareancanaan yang matang, palaksanaan program yang tepat sasaran, deng pangawasan yang konsisten, par kepeng yang su dapa alokasi seng cuma taserap secara administratif, mar bawa output deng outcome yang bisa lia deng kantara.

“Paningkatan akang kinerja tarutama dapa biking par kas nae PAD, sakaligus kas nae panyarapan anggaran balanja sahingga palaksanaan program deng kagiatan pambangunan bisa bajalang efektif, efisien, deng kase manfaat maksimal par orang banya,” tegas Benhur.

Benhur bilang, DPRD mo tarus kontrol palaksanaan APBD, tarmasuk pastikan rekomendasi deng catatan yang muncul dalang pambahasan partanggungjawaban anggaran bisa pemerentah daerah tindak lanjut akang.

Manurut Benhur, evaluasi tarhadap palaksanaan APBD taong kalamareng musti jadi dasar, par biking bae kualitas parancanaan deng panganggaran di taong-taong barikot.

Rapat paripurna salanjutnya maso agenda panyampaian pandapat akhir fraksi-fraksi DPRD Provinsi Maluku, sabage sikap politik masing-masing fraksi tarhadap Ranperda manganei Partanggungjawaban Pelaksanaan APBD Taong Anggaran 2025. (red/merindu)

Manurut Benhur, langkah itu penting par pemerentah bisa pung solusi par baku tongka deng tekanan fiskal yang pung dampak par roda pemerentahan deng pambangunan di Maluku.

“Katong manilai, pemprov sampe oras, balong dapa kapastian takait rencana mo pinjang kepeng dar PT SMI. Tagal itu, pemerentah parlu kajalasan manganai akang proses pinjaman,” ujar Benhur par wartawan di Ambon, Senen (3/8/2026).

Manurut Watubun, sampe oras DPRD balong dapa info manganei hasil ansprak utang di PT SMI, tarmasuk kepeng pung basar barapa banya yang pung potensi par dapa disatujui.

Padahal, akang kapastian paleng parlu, agar pemerintah daerah lakas ambe langkah strategis, par biking bae kondisi kauangan daerah.

Benhur bilang, kalo proses bautang di PT SMI masih balong kepastian, maka Pemprov Maluku parlu lakas cari opsi laeng yang lebe mungkin par fiks.

“Pemerentah musti pikir utang malalui Bank Maluku-Malut. Opsi ini masih layak, tagal bisa capat biking bae kondisi fiskal daerah, sakaligus pastikan barbage program pambangunan yang tatunda bisa kumbali bajalan,” ungkap Benhur.

Tekanan fiskal yang Pemprov Maluku tongka akang, manurut Benhur, marupakan akumulasi dar barbage kawajiban kauangan yang musti kas beres akang.

Kondisi ini seng cuma tagal pandapatan daerah kurang-kurang, mar juga juga beban utang dar periode pemerentahan sabalong ini, deng kawajiban pambayaran par sajumlah pihak ketiga.

Dampak kondisi mulai terasa di palaksanaan program pambangunan sampe deng pamanuhan kawajiban pemerentah par Aparatur Sipil Negara (ASN), tarmasuk pambayaran Tambahan Penghasilan Pegawai (TPP).

Bardasarkan informasi yang DPRD tarima sampe akhir Juli 2026 pambayaran TPP ASN, di lingkungan Pemprov Maluku baru par Januari deng Februari 2026.

Tagal itu, Benhur harap, Pemprov Maluku lakas ambe kaputusan takait skema pambiayaan daerah secara tabuka, agar kondisi fiskal seng lebe biking beban par panyalanggaraan pemerentahan.

“Yang parlu sakarang adalah kapastian. Pemerentah musti lakas ambe kaputusan sahingga palayanan publik tetap bajalang, program pambangunan seng tatunda tarus, deng hak-hak ASN dapa bayar tepat waktu,” tegas Benhur. (Red/Merindu)

Akang komitmen pung wujud malalui dorongan par DPR RI lakas kase sah Rancangan Undang-Undang (RUU) Masyarakat Hukum Adat, sakaligus kas capat pambahasan Rancangan Peraturan Daerah (Raperda) tentang Masyarakat Hukum Adat di Provinsi Maluku.

“Maski su ada putusan Mahkamah Konstitusi (MK) yang biking tegas amanat Pasal 18B Ayat (2) UUD 1945, tarnyata masih banya masyarakat adat yang mengadu, dong pung hutan deng tanah ulayat dapa ambe sacara sapihak,” kata Benhur di Ambon, Rabu (22/7/2026).

Manurut dia, masyarakat hukum adat di Maluku sampe oras ini masih eksis, barkembang, deng jadi bageang yang seng tapisah dar Negara Kesatuan Republik Indonesia (NKRI). Tagal itu, negara pung kawajiban kase kapastian hukum par lindungi dong pung hak-hak.

Benhur manilai, kabaradaan regulasi yang kuat jadi kabutuhan mandesak par masyarakat adat seng lagi ada di posisi yang dapa biking rugi saat investasi maso ka wilayah adat.

Dia bilang, pangakuan malalui undang-undang mopun paraturan daerah mo kas dudu masyarakat hukum adat sabage subjek pambangunan yang pung hak par iko dalang satiap kabijakan manyangkut dong pung wilayah.

“Pangakuan yang jelas malalui undang-undang mopun paraturan daerah akang kas dudu masyarakat hukum adat sabage subjek pambangunan, bukang sakadar objek. Kabaradaan akang regulasi panting par setiap kabijakan pemerentah deng investasi tetap hormat par hak adat deng kas iko dong par iko biking kaputusan,” ujar Benhur.

Di tingkat daerah, Benhur ungkapkan DPRD Maluku malalui inisiatif Komisi I su biking abis tahap awal panyusunan Raperda tentang Masyarakat Hukum Adat.

Dalang waktu deka, kata dia, rancangan regulasi su mo maso tahapan uji publik deng kas iko saluruh pamangku kapentingan, mulai dar raja, Majelis Latupati, akademisi, organisasi kamasyarakatan, sampe pegiat masyarakat adat.

Manurut Benhur, palibatan barbage unsur par biking sempurna substansi Raperda par benar-benar mampu manjawab kabutuhan masyarakat adat di Maluku.

“Intinya, DPRD inging samua pamangku kapentingan hadir dalang satu ruang barsama par biking sampurna substansi Raperda ini. Ini akang jadi Perda payung par kabupaten deng kota se-Maluku par dalang manatapkan masyarakat hukum adat di dong pung wilayah masing-masing,” pungkas Benhur. (Red/Merindu)

Benhur manilai, akang langkah parlu paskali par pambangunan bajalang lebe optimal, investasi nae sahingga partumbuhan ekonomi di daerah tamba lebe kuat.

Manurut Benhur, target partumbuhan ekonomi nasional seng bisa dapa akang kalo daerah tarus dapa batas dalang mangalola kepeng deng mangambangkan potensi yang ada.

Parmintaan itu Benhur Watubun sampekan par wartawan di Ambon, Senen (13/7/2026), pas abis iko Rapat Kerja Nasional (Rakernas) II Asosiasi DPRD Provinsi Saluruh Indonesia (ADPSI) Taong 2026 di Bali, 28 Juni sampe 1 Juli 2026.

Dalang akang forum deng tema “Panguatan Fiskal Daerah par Wujudkan Asta Cita Manuju Indonesia Emas 2045”, Benhur manilai, daerah parlu kalaluasaan mangelola kauangan, par mampu lahirkan inovasi yang mandorong partumbuhan ekonomi.

Dia bilang, ajakan pemerintah pusat par daerah biking tajang Anggaran Pendapatan dan Belanja Daerah (APBD) jadi sulit kalo ruang fiskal tarus dapa biking par sasa.

“Katong musti biking tajang katong pung APBD. Beta mo tanya, katong biking tajam apa?,” ujar Benhur.

Dia bilang deng tegas, langkah paleng mandesak itu, buka kumbali ruang transfer fiskal par daerah.

Deng beagitu, pemerentah daerah pung kasampatan lebe basar par kambangkan potensi ekonomi, iko karakteristik wilayah masing-masing.

“Yang katong tunggu itu, samangat par buka kran transfer ka daerah. Transfer musti dapa buka par ada ruang kreativitas kita di daerah,” tegas Benhur.

Dia pung pandapat, katarbatasan kawenangan oras ini justru jadi panghambat par dapa target partumbuhan ekonomi nasional sabasar dalapan parsen.

“Sapanjang itu seng dapa buka, jang bilang katong musti kas nae partumbuhan ekonomi sampe dalapang parsen. Kreativitas daerah samua su dapa ambe dar pusat,” kata Benhur.

Lebe lanjut, Benhur bilang Presiden pung komitmen yang bae par tola nae pembangunan daerah. Mar, akang kabijakan balong batul-batul dapa tarjemah deng optimal dar kamenterian deng lambaga takait.

“Pikiran Presiden bagus, mar pambantu-pambantu Presiden balong tarjamahkan saluruh instruksi itu, par kas jalang akang bae-bae di daerah-daerah,” ungkap Benhur.

Dia kas ibarat kondisi pemerentah daerah oras ini macang pung kainginang basar par karja, mar seng dapa dekeng deng kamampuan mamadai, tagal katarbatasan kawenangan deng kepeng.

“Kalo paksa katong kas nae partumbuhan ekonomi,sadangkan katong ini macang nafsu kuda mar tanaga ayang. Jadi seng bisa biking barbage kreativitas,” ujar Benhur.

Tagal itu, dia harap, pemerentah pusat lebe khusus Kementerian Keuangan (Kemenkeu) lakas ambe langkah konkret par kas loas ruang fiskal par pemerentah daerah.

“Harapan katong sederhana, buka kran transfer ka daerah sa. Dalang barbagai forum Bappenas, pamikiran ini su dapa dukungan. Tinggal bagemana Kementerian Keuangan biking tarobosan par jawab tuntutan daerah,” tandas Benhur. (red/merindu)

“Katong tau saparu su deportasi, sadangkan yang laeng masih dalang proses panalusuran. Harap ada kapastian hukum deng kajalasan administrasi tarhadap satiap warga negara asing yang ada di daerah ini,” kata Benhur par wartawan di Gedung DPRD Maluku, Jumat (19/6/2026).

Manurut Benhur, Maluku pada prinsipnya tabuka par WNA yang datang par karja mopun biking aktivitas laeng yang legal, mar tiap WNA wajib iko samua syarat administrasi dan katantuan kaimigrasian yang barlaku di Indonesia.

“Negara ini deng daerah ini seng tolak orang asing. Yang penting pung kalangkapan administrasi sasuai atorang imigrasi. Kalo dokumen lengkap tantu katong tarima, mar kalo seng iko atorang maka wajib deportasi,” ujar Benhur.

Dia tegaskan, kabaradaan WNA yang sondor dokumen jelas bisa maso kategori palanggaran keimigrasian sahingga pangawasan musti ketat dar instansi takait.

Mananggapi dugaan panyalahgunaan kawenangan dalang pangawasan kaimigrasian, Benhur manilai peran masyarakat paleng penting par kase informasi par aparat.

“Beta kira ini jadi faktor penting. Peran masyarakat parlu paskali par kase informasi sahingga pejabat publik bisa ambe langkah yang sasuai atorang,” kata Benhur.

Dia juga manilai kalo ada WNA yang bisa maso lalu baraktivitas sondor dokumen sah, itu tanda sistem pengawasan payah jadi lakas kas batul akang.

Untuk itu, DPRD Maluku malalui Komisi I baranca mo koordinasi deng pihak Imigrasi par pastikan status deng legalitas WNA di wilayah Maluku.

“Katong mo koordinasi deng Imigrasi. Komisi I nanti mo undang pihak takait par klarifikasi samua dokumen kaimigrasian dar setiap warga negara asing yang ada di daerah ini,” jelas Benhur.

Benhur juga mananggapi isu yang bilang Maluku mulai jadi daerah transit par tanaga karja asing. Dia managaskan, informasi itu harus kaji akang deng komprehensif bardasarkan data yang valid agar jang timbol spekulasi dalang masyarakat.

“Samua musti lia deng fakta dan data yang jelas. Karena itu parlu ada panjalasan resmi dar pihak yang barwenang,” pungkas Benhur. (Red/Merindu)

Benhur bilang akang par awak media, pas abis Rapat Paripurna Panyarahan Laporan Hasil Pemeriksaan (LHP) BPK Perwakilan Maluku atas Laporan Keuangan Pemerintah Daerah (LKPD) Provinsi Maluku Taong Anggaran 2025 di Gedung DPRD Maluku, Senen (8/6/2026).

Benhur bicara tegas, rekomendasi BPK musti pemerentah tindak lanjut akang deng sarius. Katua DPD PDI Perjuangan Provinsi Maluku itu mangaku, sajumlah temuan yang BPK su sampekan, parlu lakas biking batul akang tagal akang bawa pangaruh par kinerja pemerentah deng pangalolaan kauangan daerah.

“Samua pihak, tarutama pemerentah daerah, seng boleh maeng-maeng deng rekomendasi BPK. Apa yang BPK biking itu objektif par biking bae kinerja katong eso-eso. Justeru deng bagitu, BPK su tolong katong pung saparuh parjalanan manuju parubahan yang lebe bae,” pesan Watubun.

Wakil rakyat dar daerah pamilihan Kota Tual, Malra, deng Aru ini paleng apresiasi karja BPK yang dia nilai su kas bajalang fungsi pangawasan deng profesional deng kase masukan konstruktif par pemerentah daerah.

Benhur juga manilai sistem pangandalian deng pangawasan internal yang pemerentah daerah biking, akang su kas unju parkambangan cukup bae. Mar dia minta par upaya itu tarus tamba lebe bae par dorong parubahan yang lebe kantara dalang tata kalola pemerentahan.

“Beta minta akang tarus lebe bae par kinerja pemerentahan bisa barobah ka arah yang jauh lebe bae,” ujar Benhur.

Dia bilang, opini Wajar Tanpa Pengecualian (WTP) yang kumbali Pemerentah Provinsi Maluku dapa akang, itu manjadi indikator bahwa laporan kauangan daerah su panuhi syarat formal deng material yang su dapa ator.

Maski bagitu, sajumlah catatan deng rekomendasi BPK tetap musti jadi parhatian serius par tata kalola kauangan daerah tamba lebe bae. Par mo pastikan tindak lanjut dar tamuan-tamuan itu bajalang efektif, DPRD Maluku buka paluang par bantuk Panitia Khusus (Pansus).

“DPRD mo partimbangkan par biking pansus dalang rangka biking efektif temuan-temuan BPK ini ka arah parbaikan yang lebe bae,” kata Benhur.

Dia mangaku akang langkah panting par kas kuat sinergi antara DPRD deng pemerentah daerah dalang mangawal implementasi rekomendasi BPK sacara barkalanjutan.

“Deng begitu, katong basinergi deng pemerentah sacara kualitatif par lia bahwa akang parbaikan itu sasungguhnya patut katong biking dan cukup par katong biking pangandalian deng bae,” pungkas Benhur. (Red/Merindu)