Prestasi ini akang biking anana Evav sanang deng bangga tagal akang kompetisi pung gengsi tinggi, deng bar parnah biking di kawasan Indonesia Timur, deng tema “Where Championship Are Made”.

Dalang akang kompetisi di Taman Budaya Karang Panjang, tim Maryadat Creative yang bawa 35 peserta tampil impresif dan barhasil kas kalah puluh-puluh pasarta laeng.

Palatih sakaligus koreografer Neo Efruan di Ambon bilang, tim dar Kei ini kas nae tiga divisi, yakni senior, junior, deng upper.

“Katong angka nae divisi senior, junior dan upper masing-masing satu tim, jadi katong iko tiga kategori,” ujar Neo, Salasa (21/4/2026).

Dar hasil kompetisi, tim Maryadat Creative dapa Juara 1 kategori Upper malalui Double J Maryadat deng Juara 2 par Maryadat Junior.

“Dar total 64 peserta, cuma Kota Tual yang bisa bawa pulang dua kategori juara,” tambah Neo.

Dia bilang, akang hasil seng dapa gampang-gampang. Tim su biking parsiapan dar November 2025 deng total waktu latihan sakitar lima bulang.

Proses pambantukan tim mulai dar seleksi personel, Januari 2026, lanjut deng pambinaan intensif takait barbage gaya tari, molai dar kontemporer sampe hip-hop.

“Waktu dapa informasi WOD biking di Ambon, katong langsung bagara capat kas sadia tim. Anana dapa latih dar dasar sampe koreografi par akang kompetisi,” jelas Neo.

Dia juga bilang, ajang ini juga ada pasarta dar India deng Ukraina, jadi akang rame. Lebe jauh, Neo manilai antusias anana muda par iko ajang ini, akang jadi sinyal positif par seni di Kei.

Neo harap, malalui kagiatan macang ini, generasi muda bisa maso di hal-hal yang lebe produktif deng pung prestasi.

“Katong inging apus stigma dan mo dorong generasi muda Kei biking prestasi, bukan loko panah-panah wayer,” tegas Neo.

Efruan juga kas apresiasi par Pemerintah Kota Tual yang su dukung tim dalang ajang ini. Dia harap, akang jadi motivasi par anana muda Maluku, lebe khusus di Kota Tual, par tarus biking karya deng kas harum nama daerah di tingkat nasional mopun internasional. (Vera)

Minggu lalu, dua video musik ini balong ada di daftar 100 video musik paleng top. Mar minggu ini, Swim maso deng balumpa nae 97 trap, sadangkan Toton pung “Ambon Manise” balumpa 83 trap. Hasil ini takait deng video paleng viral, “Swim” ada di nomor 1 sadangkan “Ambon Manise” di nomor 7.

Video musik “Ada Titik-Titik di Ujung Doa” (Sal Priadi) kamuka di nomor 6, mar minggu ini talempar turun 4 trap, jadi sakarang ada di nomor 10. Sadangkan “Everything u are” (Hindia) batahang di nomor 7.

Negoro Angin (Denny Caknan) biking kage tagal minggu lalu ada di nomor 15, sakadang su di nomor 8. Di nomor 9, ada “Alamak” (Rizky Febian & Adrian Khalif) yang kamuka ada di nomor 12.

Video musik paleng top minggu ini masih tetap ada di “Tabola-Bale” (Silet Open Up) nomor 1 deng Orang “Baru Lebe Gacor” (Ecko Show). Tagal “Swim” langsung dudu di nomor 3, akang biking tiga video musik rame-rame turung. “Sedia Aku Sebelum Hujan” (Idgitaf) dari nomor 3 ka 4, Kota Ini Tak Sama Tanpamu” (Nadhif Basalamah) nomor 4 ka 5, lalu “Don’t Force Your Longing” (Ifan Seventeen) turun dar 5 ka 6.

Video musik Anana Timur masih banya di 100 video musik paleng top versi Youtube. Ada yang bagara nae, ada yang taturung. Misalnya, “Bahagia Lagi” (Piche Kota) ada di nomor 1, “Lesung Pipi” (Raim Laode) nomor 14, “Ngapain Repot (Toton Caribo) di nomor 15, dan “Ambon Manise” (Toton Caribo) di nomor 17.

“Cerita Indah” (Vicky Salamor feat Fresly Nikijuluw) kamuka di nomor 9, sakarang taturung 12 trap jadi di nomor 21. Sadangkan “Body Pata-Pata” (Faris Adam) kamuka ada di nomor 51, sakarang su di nomor 28 tagal balumpa nae 23 trap.

Barikut ini, daftar 10 video musik paleng top di Indonesia versi Youtube (20-26 Maret 2026) lengkap deng angka tayangan mingguan. Angka dalang kurung itu rengking minggu lalu:

1 (1) Tabola Bale (Elart Mix) – Silet Open Up, Jacson Zeran, Juan Reza & Diva Aurel – 4,607,859
2 (2) Orang Baru Lebe Gacor – Ecko Show, Juan Reza & Chesylino) – 3,751,861
3 (-) Swim (BTS) – 3,087,019
4 (3) Sedia Aku Sebelum Hujan -Idgitaf – 2,545,048
5 (4) Kota ini tak sama tanpamu – Nadhif Basalamah – 2,188,989
6 (5) Don’t Force Your Longing – Ifan Seventeen – 2,081,900
7 (7) Everything u are – Hindia – 1,888,015
8 (15) Negoro Angon – Denny Caknan – 1,523,443
9 (12) Alamak – Rizky Febian & Adrian Khalif – 1,360,060
10 (6) Ada titik-titik di ujung doa – Sal Priadi 1,345,729

(AmbonVibes/Youtube/OpaRudi)

Bruno Mars bukang tageser ka nomor 2, malaengkang nomor 3. Soalnya, nyong-nyong Korea Selatan yang tagabung dalang band BTS balumpa nae dar nomor 86 ka nomor 2.

Youtube hitung artis-artis ini pung jumlah video resmi youtube pung tayangan, sapa paleng banya. Juan Reza, BTS deng Bruno Mars sama-sama pung jumlah tayangan lebe dari 13 juta, akang selisih di angka ratusan. Juan Reza unggul deng 13,835,522; barikut BTS deng 13,686,405, sadangkan Bruno Mars 13,251,726.

Paleng rame parsaingan artis-artis di 10 basar top Indonesia. Bukang Bruno Mars saja yang tajungkal dar no urut 1. Ajeng Febria yang minggu lalu di nomor 3, tarpaksa turun satu trap ka nomor 4 tagal Bruno Mars turung di Ajeng pung tampa.

Tagal Ajeng turun ka nomor 4, Nadhif Basalamah yang ada di situ, taturung dua trap ka nomor 6. Di nomor 5, ada Denny Caknan batahang di situ, seng nae, seng turung.

Nadhif turung sampe Hindia iko turung ka nomor 7, sadangkan Sal Pribadi ka nomor 8. Artis Difarina Indra tetap batahang di nomor 9.

Silet Open Up paleng asek. Minggu lalu ada di nomor 12, sakarang lompat dua trap nae ka nomor 10. Otomatis, ada yang takaluar dari 10 basar artis top. Korban lompatan dua trap itu seng laeng adalah Dewa19. Silet Open Up dudu di situ deng angka tayangan 7,532,685. Dewa19 turun ka nomor 11, salisih 4.832 tayangan. Dewa19 punya 7,527,853.

Sampe minggu ini, ada 90 artis laeng yang manggurebe maso 10 basar paleng top di Indonesia, tarmasuk artis luar negeri. Sadangkan dar Indonesia Timur, ada nama-nama top dalang daftar 100 artis populer. Piche Kota misalnya, dia ada di nomor 16.

Artis laeng yang ada bagara nae, Jacson Seran (18), Raim Laode (24), Ecko Show (29), Toton Caribo (30), Chesylino (37), deng Vicky Salamor.

Barikut ini, daftar 10 artis top deng dong pung angka tayangan di Youtube. Angka dalang kurung itu, dong pung rengking minggu lalu par bisa lia nae-turung ato tatap batahang di tampa:

1 (2). Juan Reza – 13,835,522
2 (86). BTS – 13,686,405
3 (1). Bruno Mars – 13,251,726
4 (3). Ajeng Febria – 11,991,447
5 (5). Denny Caknan – 9,850,909
6 (4). Nadhif Basalamah – 9,292,467
7 (6). Hindia – 9,241,434
8 (7). Sal Priadi – 8,496,798
9 (9). Difarina Indra – 8,057,603
10 (12) Silet Open Up – 7,532,685

(AmbonVibes/Youtube/OpaRudi)

Band BTS pung dua lagu paleng manonjol. Kalompok donci Korea Selatan itu pung lagu “Body to body” ada di tangga katiga, dan “Swim’ ada di tangga partama.

Lagu Negoro Angin (Denny Caknan) yang rilis kamuka 16 Maret, ada di tangga kadua lagu paleng viral di Indonesia.

Trending ini akang pung pangaruh di nomor urut video musik, bae harian, bae mingguan. Kalo harian, “Ambon Manise” punya Toton Caribo su dalapang hari maso saratus basar. Hari ini, Sabtu (28/3/2026), “Ambon Manise” ada maraya nae dar nomor 22 ka 21. Toton geser Vicky Salamor deng Fresly Nikijuluw pung “Cerita Indah” dar nomor 21 ka 22.

Lagu “Parcuma” bar dua hari maso saratus basar. Partama maso di nomor 84, kamareng, lalu sakarang su balumpa 45 trap jadi samantara di nomor 39.

Video Musik Taratas Mingguan

Lagu “Parcuma” balong maso di saratus basar video musi taratas mingguan edisi 13-19 Maret 2026, tagal akang baru rilis 24 Maret. Mar, kamungkinan basar akang maso di edisi 20-26 Maret, yang sadiki-sadiki lae youtube rilis akang.

Barikut ini, video musik timur yang masih batahang di 100 video musik taratas mingguan di youtube Indonesia. Angka dalang kurung itu kas unju barapa minggu batahang di tangga lagu.

1. Tabola-bale – Silet Open Up (45 minggu)
2. Orang Baru Lebih Gacor – Ecko Show, Juan Reza, Chesylino (26)9. Cerita Indah – Vicky Salamor feat Fresly Nikijuluw (2)
3. Bahagia Lagi – Piche Kota (8)
4. Tabola-bale – Adagio Sekolah Musik (7)
5. Lesung Pipi – Raim Laode (50)
6. Stecu – Faris Adam (52)
7. Ngapain Repot – Toton Caribo (48)
8. Bersenja Gurau – Raim Laode (16)
9. Taguling-gulung – Silet Open Up (9)
10. Bodi Pata-Patah – Faris Adam (2)
11. Bahagia Lagi – Piche Kota (8)
12. Ora Urus – Toton Caribo (17)
13. Jauh Ko Pergi – Dike Sabrina (1)
14. Kapten Hiphop – Produk Timur” feat. Jacson Zeran (10)

(Opa)

Sabalong ini, video musik “Cerita Indah” seng ada dalang 100 basar tangga lagu. Video mudik ini dong dong dua kasnae di Kanal YouTube Vicky Salamor and Fresly Nikijuluw Official, 7 Maret 2026.

Dalang dua minggu ini, manurut data charts.youtube.com, video musik Vicky-Fresly su dapa nonton sabanya 1,298,443 kali. Jumlah ini masih jao di bawah Tabola Bale 4,404,750 kali dapa nonton.

“Cerita Indah” ada di atas Piche Kota deng lagu “Bahagia Lagi”. Sadangkan di nomor 8 ada “Alamak (Rizky Febian & Adrian Khalif), dan nomor 7 ada “Tabola-bale” (Cover oleh Adagio Sekolah Musik).

Di nomor 6, ada Everything u are (Hindia), dan nomor 5 dudu lagu “Kota Ini Tak Sama Tanpamu” (Nadhif Basalamah). Sadangkan di nomor 4, ada lagu “Jangan Paksa Rindu” (Ifan Seventeen).

“Sedia Aku Sebelum Hujan” dar Idgitaf batahang di nomor 3, Orang Baru Lebe Gacor (Ecko Show, Juan Reza, Chesylino) di paringkat 2. Lagu “Tabola-bale” (Silet Open Up feat Jacson Zeran, Juan Reza & Diva Aurel) masih paleng top di nomor 1.

Akang lagu “Cerita Indah”, yang tulis Vicky Salamor, music & vocal production dar Vicky Salamor di VAW Digital Studio, mixing & mastering Nyong Peimahul di 88 Creative Lab Studio. Voice Over Saness Ginting-Salamor, gitar Beby Baingan, bass Ochu Padomsz. Videografer & editor Belgi Aprilliandy, manajer produksi Ody Art. Model dalang video ada tiga orang yaitu Rochana, Milla, deng Bayu Aji Setiyawan.

Sampe berita ini nae di AmbonVibes.com, Jumat (20/3/2026), video musik “Cerita Indah” ada dapa komentar paleng banya. Tacatat di Youtube ada 4.951 komentar. Ini salah satu komen dar @opiebatfeny, yang sangaja dapa pilih par taruh di sini.

“Lagu ini cukup berbeda dengan lagu lagu timur yang biasa saya dengar, dan Di sini kentara kejeniusan Vicky dalam menulis Karya & menciptakan musik yang sangat enak dan susah ditebak bagi pendengar.

Dan yang tidak kalah hebat sesungguhnya adalah Fresly, karena menurut saya lagu ini betul-betul menyatu dengan karakternya Fresly, bagaimana Dia membuat semua pendengar mengerti dengan massage lagu ini. Setiap improvisasi dari suara & lirik yang keluar dari mulutnya diperhitungkan semaksimal mungkin agar tidak over, ini yang disebut sebagai salah satu penyanyi yang dewasa dalam berkolaborasi.

Menurut saya sepertinya Fresly sangat-sangat tau mana tempat yang dia harus improvisasi & mana tempat yg hanya cukup variasi di dalam lagu. Topppp…Toppp…

Kolaborasi ini semakin mempertegas bahwa Musik Pop indonesia Timur sudah berada di level yang sejajar bersama musik pop indonesia pada umumnya.

Sukses selalu Vicky & Fresly”.

Sair langkap lagu “Cerita Indah” akang bagini:

Teringat semua kenangan dulu
Saat se tidur di beta pung pangku
Se lihat beta pung mata
Se bilang se sayang beta
Cinta ini cuma par beta

Tersimpan begitu banyak cerita indah
Dulu
Yang balom bisa hilang
Berharap semua bisa terulang lagi
Nanti…Nanti di surga

Sayangnya Tuhan Su panggel ale
Sayangnya Beta masih Rindu se
Seng mungkin se datang dan berikan cinta itu
Beta slalu berdoa par ale

Sio beta rinduuuu
Rinduuuuuu
Rinduuu paskaliiii
Ingin bertemuuuuu
Walauuu
Hanya di dalam mimpi

(Opa Rudi)

Levinus Kariuw biking dendang ini lalu rilis akang di platform YouTube. Sampe kalamareng, orang su nontong sabanyak 7.836 kali dalam 11 jam dar partama lapas akang. Malalui balutan musik melankolis dan lirik yang jujur, Fresly bawa anyu pandengar maso ka dalang konflik batin sorang laklaki yang hidop dalang parkawinan sondor cinta yang utuh.

Narasi Luka, Sunyi deng Personal

“Cinta Seng Pasti” bacarita tentang tragedi sunyi sorang laklaki yang kaweng deng parangpuang yang secara fisik ada sama-sama. Mar, dalang batin masih baku tarika deng cinta masa lalu. Bukang soal pangkhianatan yang rame, malaengkang tentang kakalahan yang musti tarima deng sadar.

Dar bait awal, dendang ini langsung angka konflik emosional tokoh “beta”.
“Orang bilang cinta itu anugrah terindah, tapi for beta akang barasa perih”. Itu akang pung lirik awal. Akang lukis ironi cinta yang musti biking bahagia mar justru tabale jadi sumber luka.

Lirik itu mo tegaskan par tokoh utama, cinta bukang anugerah lai, malaengkang beban emosional yang musti hala akang sandiri. Puncak kasadaran pait itu muncol waktu “beta” sadar, hati parangpuang yang dia cinta masih orang lain pung akang.

“Ale pung mata bicara, masih ada dia yang ale cinta.”

Kalimat sederhana itu kas isyarat luka yang dalang, sondor amarah atau tudingan, cuma pangakuan bahwa “beta” cuma pangganti, bukang tujuan ahir.

Refrein Pono Tragedi

Bageang refrein jadi inti emosi lagu ini. Dengar saja bageang refrein:
“Beta sadar hanya tampa singgah… untuk batahang di cinta yang seng pasti ini.”

Ungkapan “tampa singgah” mnggambarkan posisi tokoh utama sabage parsinggahan samantara dalang kahidupan sang parangpuang. Dia batahang bukan tagal kapastian, mar tagal parasaan yang talanjur tumbuh.

Tema “salah waktu” juga jadi benang merah lagu ini. Tokoh laklaki sadar dia pung rasa hadir di saat yang kaliru.

“Ini cuma salah rasa beta, yang jatuh di tampa deng waktu yang salah.”

Pesan ini dapa rasa relevan par banya pandengar: Tidak semua cinta gagal karena kurang usaha, tetapi karena hadir di waktu yang tidak tepat. Perempuan yang dicintainya telah membangun benteng perasaan yang terlalu kuat untuk orang lain, membuat cintanya tak pernah benar-benar memiliki ruang.

Bahasa Lokal dan Kadekatan Emosional

Sacara emosional, “Cinta Seng Pasti” bukang lagu kamarahan, malainkan lagu panarimaan. Tokoh utama “beta” seng buang salah par parampuang yang dia sayang, malaengkang dia pung diri sandiri tagal jatuh cinta par sorang yang balong selesai deng masa lalu.

Kalimat “Beta yang kalah” yang taulang di bageang akhir jadi simbol kakalahan yang sunyi—bukang karena bakalae ancor-ancor mar tagal cinta yang dar kamuka lae seng pernah banar-banar batumbuh.

Deng bahasa lokal Maluku yang lugas dan kuat, Fresly Nikijuluw mampu kas hadir kisah yang dapa rasa deka deng kahidupan nyata. Lagu ini jadi carmin par banya orang yang parnah jatuh cinta sondor kapastian, batahang dalang harapan, lalu sadar, harapan itu seng parnah dapa dia pung rumah.

“Cinta Seng Pasti” kase satu pesan panting: Cinta sondor kapastian cuma par biking luka yang tarus batahang lama-lama. Ini satu pangakuan jujur soal kabaranian par cinta, sakaligus kasiapan par tarima kanyataan manakala cinta datang di waktu yang salah. (red)

Baragam agenda budaya, pariwisata, sampe musik su tasadia par isi kalender kagiatang sepanjang 2026. Rangkean event ini par kas nae kunjungan wisata, kas bagara ekonomi kreatif, sakaligus biking kuat citra Ambon sabage kota budaya deng Kota Musik Dunya.

Maso-maso Februari 2026, Disparbud Ambon su jadwal tiga event utama. Partama, Festival Imlek di Pattimura Park, pas di hari parayaan Tambaru Imlek. Kadua, Hari Raja 28 Februari 2026 di Negeri Rutong. Negeri adat itu jadi salah satu desa wisata unggulan di Kota Ambon, deng kakayaan adat dan tradisi yang masih tajaga kuat sampe sakarang.

Salaeng itu, Festival Ramadan juga nanti mo biking di kawasan muka Masjid Raya Al Fatah, sairing maso bulan suci Ramadan 1447 Hijriah, masih di bulan Februari.

Sabalong itu, rangkean Calendar of Event 2026 su tabuka deng Gala Beat Fest – Sound of Amboina (SoA), 31 Januari 2026. Event ini su biking di bawah Jembatan Merah Putih, Desa Galala, akang bajalang rame, bisa tarek ribuan panontong.

Eso-eso, Disparbud Ambon juga mo biking Sound of Amboina sabage agenda rutin yang nanti mo biking bulan April, Juni, Agustus, dan November 2026.

Salaeng Sound of Amboina, sajumlah agenda musik deng skala basar juga maso dalang kalender 2026. Salah satunya, Konser Glenn Fredly, bulang April, lalu ada Amboina International Music Festival, Oktober 2026.

Menutup kalender event taong 2026, Disparbud Ambon biking siap barbage kagiatan budaya dan pariwisata par Desember. Satu dua agenda itu antara laeng Santa Claus Festival, 1 Desember di Pattimura Park, Cuci Negeri Soya, 11 Desember di Negeri Soya, Mangente Rutong pada 21 Desember di Negeri Rutong, serta Cuci Negeri Rutong, 28 Desember 2026.

Rangkeang event sapanjang taong ini bukang cuma par jadi daya tarek wisata, mar juga kase dampak ekonomi langsung par masyarakat, sakaligus kas kuat posisi Ambon sabage pusat kebudayaan dan musik di kawasan timur Indonesia. (Piere)

Oras itu, lautang tado, seng ada galombang. Bulang pung cahaya tumpah ka aer laut, parsis macang mas caer. Gagah paskali. Seng ada omba pica-pica di bibir pante. Malahan petikan gitar, tabuhan drum, tuts-tuts keyboard dapa tindis, samua dapa rasa macang ada omba puti-puti dar lao.

Bagitu sudah suasana di Kafe Teluk Indah, Poka, Kamis (4/12/2025) malang. Anana muda Ambon jago-jago maeng musik, dong biking panggung jadi parsis lautang musik. Pas Plh. Sekda Maluku yang wakili Gubernur Maluku abis kas luncur Yayasan Belang Musika Maluku (BMM), langsung dong unju dong pung talenta musik dalang tema basar “Today With Jazz In Ambon 2025”.

Di atas panggung su ada musisi-musisi papang atas Kota Ambon. Seng maeng-maeng, di panggung ada nama-nama musisi idealis macang ⁠Mickhen Leinussa (drum), ⁠Ido Kainama (kibor 1), Verrill Ferdinandus (kibor 2)⁠, Marvil Lewaherilla (bass), ⁠Richo Hiariej (gitar), ⁠Melvrick Pattiwael trumpet 1), ⁠Jofanz Nuan (trumpet 2), ⁠Noce Latuloma (alto saxofon), Sion Kainama (tenor saxofon), ⁠Jeiren Manuputty (trombone 1), deng Juninho Lunmisay (trombone 2).

Musisi-musisi biji ruku ini dong langsung maeng pica-pica. Dapa rasa paskali, pop jazz kreatif, balari etnik lai. Ada dua biduan, Willy Waas deng Allan Tehupuring. Ada lai dua biduanita Hetty Siwabessy deng Grace Syauta. Dong ampa ini sabanarnya samua kanal sabage panyanyi solo. Mar malang jazz ini, dong tampil dalang komposisi kwartet.

“Katong cuma latihan satu hari sa,” kata Willy sabalong dong manyanyi.

Biar latihan capat-capat saja, mar tarnyata dong ampa manyanyi biking panggung kaya ada omba pukol. Lagu Goro-Goro Ne tasambung Mande-Mande, mangalir sadap-sadap. Abis itu dong bawa dua lagu lai, dar album Ambon Jazz Rock Jopie Latul, Mari Badansa deng Goyang. Panonton paleng sanang.

Kwartet mandadak abis tampil, langsung MC pangge satu kalompok ana muda yang dong mangkali kurang top di Ambon, mar paleng top di Balanda. Dong sapuluh orang pake nama Palita Project.

Palita Project ini pung personil sabageang su top waktu karier solo. Lia sa dong pung nama satu-satu. Lodwyk Hahury (vocal), Nathasya Dates (vocal), Nathania Noya (vokal), Rachel Yamlaay (vokal), Hardy Harefa (vocal), Joviel Tubalawony (gitar), Yoreins Salamor (bass), Juan Siahaya (kibor 1), Verrill Ferdinandus (kibor 2), Calvin Jhosua Pelmelay (drum).

Palita Project mulai manyanyi deng dong pung lagu andalan, La Apa tempo. Abis itu barturut-turut, Enggo Lari, Rame-Rame, deng Nusaniwe. Panontong paleng puas tagal salaeng suara bagus deng harmoni, Palita pung koreo sadiki-sadiki biking panontong bataria “sadoks”.

Sekretaris Yayasan Belang Musika Maluku (BMM) Stefanny Diasz mangaku paleng sanang deng konser musik jazz ini. Dia bilang, konser ini sangat luar biasa.

“Deng satu kata saja, konser ini akang mahal. Katong seng parlu kas kaluar kepeng banya par lia konser bagus mudel bagini. Padahal, par bisa nontong musik bagus, katong musti kas kaluar kepeng. Malang ini luar biasa deng frei,” kata Stefanny.

Stefanny kase tau, taong muka, Yayasan BMM mo bicara deng dong di Galala, par biking konser kumbali di Galala. Galala jadi prioritas tagal di sabalah jambatang ada tampa bagus. Salaeng itu, manurut Stefanny, Galala dapa pilih tagal di negeri itu, su banya paskali lahirkan musisi-musisi top Indonesia, macang Hellas, Hasa, Andarinyo, deng laeng-laeng.

“Katong biking Sound of Amboina (SoA) dari kacamatang ka kacamatang. Jadi nanti awal 2026, katong mulai dar ke Galala,” ungkap Stefanny. (Leo Manuputty/Rudi Fofid)

Lagu ini, Doddie sandiri yang tulis akang. Figgy Papilaya karja akang pung aransemen musik, lalu Levy Kariuw yang jadi produser.

Doddie yang su paleng top deng suara khas, melantunkan lagu-lagu romantis, sakarang pindah tema ke Mama, sebuah pilihan paleng universal.

Doddie harap “Inga Mama” bisa maso di orang pung hati, lebe-lebe masyarakat di wilayah Indonesia timur macang Maluku, NTT, dan Papua, bahkan pandengar di Belanda. Dia nilai, lagu ini cocok jadi tamang masyarakat par maso har Kajadiang deng Tambaru.

Doddie bilang dangke banya par samua panggemar yang salama ini su dukung deng suka karya-karya dia salama ini.

“Seng lupa Beta ucap syukur , hormat, dan kemuliaan kepada Tuhan Yesus. Lewat berkat deng talenta yang kase par beta, beta bale kase yang paleng bae par samua yang cinta musik di Maluku, Papua, NTT, dan di Belanda,” ujar Doddie.

Singel “Inga Mama” mo tegaskan posisi Doddie sabage salah satu musisi Maluku yang tarus konsisten hadirkan musik lokal deng kualitas bae, yang jangkau nasional dan internasional, semarakkan momen Natal dan Tahun Baru bagi pendengar setia.

Sejak luncur 13 hari lalu, lagu Inga Mama su dapa nonton 24 ribu kali, dapa 929 like dan 77 komentar positif dari penikmat musik tanah air. (New)

Festival ini bageang dar parayaan minggu–minggu Adventus par maso-maso haraya Kajadiang 2025. Festival yang dong biking di Taman Pattimura ini lahir dar tradisi jalan Santa Claus yang saban taong iko biking rame suasana Har Kajadiang di Ambon.

Wakil Wali Kota Ambon Ely Toisutta dalang sambutan tegaskan, kagiatan ini libatkan palaku ekonomi kreatif sabage motor panggarak ekonomi daerah.

“Industri ekonomi kreatif marupakan bageang dar basis, karakter, dan simbol kahadiran Indonesia di tengah pargaulan antarbangsa. Deng biking kuat industri Deng basis tradisi dan budaya, kekayaan intelektual deng warisan budaya bangsa bisa lestari,” ujarnya.

Wawali Ely tambahkan, festival ini bukang cuma a ruang kreativitas, mar juga sarana strategis par biking kua posisi Ambon sabage kota kreatif yang pung daya tarik wisata deng basis budaya.

Lebe dar sakadar parayaan, Santa Claus Festival juga jadi ruang bakudapa yang biking kuat harmoni antarumat beragama.

“Maski masyarakat Kota Ambon heterogen, kagiatan ini jadi contoh nyata karukunan hidup baragama. Ini sajalang deng visi katong par wujudkan Ambon yang toleran secara barkelanjutan,” beber Ely.

Wawali tegaskan, modal keragaman budaya yang ada di Ambon musti tarus olah akang jadi kakuatang kreatif yang mampu tarek wisatawan dan tingkatkan citra kota sebage destinasi budaya.

Dalang kasampatang itu, Ely sampekan salamat par warga Sarane yang ada dalam masa Adventus. Dia juga ajak warga Ambon jaga hidup orang basudara l.

Katua Panitia Santa Claus Festival Sandra Berhitu jelaskan, kagiatan ini adalah inisiatif Disparbud par dukung kreativitas pelaku ekonomi kreatif deng jadi bageang dar program pangambangan pariwisata daerah.

Festival taong ini kas iko o630 ana dar barbage tampa di Kota Ambon. Acara barlangsung darbsiang sampe amper malang, lanjut deng karnaval yang libatkan Angkatan Muda GPM serta komunitas Santa Claus di Kota Ambon.

“Santa Claus Festival merupakan turunan program pangambangan sumber daya pariwisata dan ekonomi kreatif yang turut manunjang 17 program prioritas Wali Kota dan Wakil Wali Kota Ambon periode 2025–2030,” pungkasnya.

Deng samangat kolaborasi dan kreativitas, Santa Claus Festival kumbali tegaskan Ambon sabage kota yang harmonis, kreatif, dan pono samangat sambut Har Kajadiang. (New)