Itu akang suasana har Minggu (30/8/2026), di Galala-Hative Kecil (Gatik), tampa pulang anana cucu  yang makang taong hidop di tanah orang, jao dar tanah nenek moyang.

Warga Gatik ada datang dar Belanda, Jakarta, Sorong, Makassar, Masohi, Saparua deng tampa-tampa laeng.  Dong bale bukang cuma par jalang-jalang lia-lia, mar datang par  biking parayaan satu parjalanan panjang: 100 taong Jemaat GPM Galala-Hative Kecil.

Prosesi panjemputan basudara sakaligus pambukaan rangkeang parayaan satu abad  barlangsung dalang suasana pono sukacita deng kakaluargaan.

Pesta saratus taong ini pake tema “Mengukuhkan Warisan Iman, Persatuan, dan Pelayanan Lintas Generasi untuk Kemuliaan Tuhan.” Kagiatan mulai dar kawasan Ayala deng Jambatan Galala Lama, trus lanjut deng arak-arakan manuju Gedung Gareja Imanuel Galala-Hative Kecil.

Basudara dar Gatik deng Halong jadi satu dalang acara baku dapa ini. Pas waktu salendang dapa pasang di leher basudara yang baru sampe,  suasana barubah jadi paleng mesra. Kaeng gandong yang talingkar jadi simbol bahwa maski anana cucu su hidop baku jao, ikatan orang basudara seng  parnah taputus.

Akang kaeng gandong biking ingat satu hal sederhana: Mo pi sampe jao mana lai, salalu ada tanah par kumbali deng kaluarga par dapa polo.

Par  masyarakat Galala-Hative Kecil, pesta satu abad bukang sakadar paringatan angka. Saratus taong itu parjalanan panjang yang tasambong  dar generasi ka generasi. Di dalang akang, ada  sejarah iman, pelayanan, kabersamaan deng kahidupan orang basudara yang tarus tapiara sampe oras tadi.

Kapala Desa Galala Jemima Ariesta Marcella Joris ucap syukur banya par anana cucu deng orang, orang tatua, basudara gandong dar barbage panjuru.

“Atas nama Pemerintah Desa Galala deng masyarakat Negeri Hative Kecil, Beta ucap salamat datang par saluruh anacucu, orang tatua deng basudara gandong yang datang dar barbage daerah, bae dar Balanda, Sorong, Makassar, Jakarta, Saparua, Maluku Tengah mopun daerah laeng,” ujar Joris.

Manurut Joris, baku dapa orang basudara marupakan anugerah Tuhan yang patut par ucap syukur deng akang. Dia mangaku paleng haru biru lia ana cucu yang datang deng sukarela deng pono sukacita par kumbali lia orang basudara deng tanah nene moyang.

“Kahadiran katong samua dalang momentum ini paleng brarti tagal katong sama-sama mo rayakan satu abad ato100 taong Jemaat Galala-Hative Kecil,” kata Joris.

Par Joris, saratus taong bukang waktu yang pende. Para leluhur, kata dia, su taruh pondasi kahidupan bersama par masyarakat Galala deng Hative Kecil. Pondasi itu barupa kabarsamaan, parsudaraan dan rasa satu pung satu.

“Saratus taong lalu, katong pung orang tatua su tanam nilai kabarsamaan par katong. Sabage ana cucu, katong patut barsyukur tagal sampe ini oras, akang tetap hidop,” ujar Joris.

Dia kas ingat, Galala deng Hative Kecil ada simpan paleng banya kenangan par ana cucu yang sakarang ada di tanah rantau.

Di tampa ini, dong parnah tumbuh, makang, barmaeng, deng hidop sama-sama dalang ikatan orang Basudara w.

“Maski bapa, ibu, deng basudara su marantau ka barbage daerah deng negara, Galala dan Hative Kecil musti salalu ada di dalang hati. Sejao mana lai katong pi, katong seng boleh lupa katong pung tanah asal,” tegasnya.

Tagal itu, dia harap momentum satu abad akang jadi pangingat par warisan hidop orang basudara seng taputus di generasi sakarang.

“Rumah katong Galala deng Hative Kecil. Rumah ini rumah barsama yang musti katong jaga. Mari terus bagandeng tangang, jaga parsaudaraan deng kas kuat kabarsamaan par generasi ananabcucu,” pungkas Joris.

Dari halaman gsreja, suasana panyambutan barlanjut dalang ruang ibadah.

Katua Majelis Jemaat GPM Galala-Hative Kecil Pdt. Ny. A. Hanoatubun manyambut rombongan basudara yang datang dar Belanda, Maluku Tengah, Sorong, Makassar, Jakarta, deng barbage daerah laeng.

Deng pono sukacita, Pandita Hanoatuhun ajak saluruh basudara maso rumah Tongala par sama-sama barsyukur tagal su baku dapa.

“Katong sambut basudara samua dengan rasa syukur dan sukacita. Mari katong maso ka dalang rumah Tongala deng, katong ucap syukur par parjumpaan yang Tongala su kase par katong,” ujarnya.

Atas nama Majelis Jemaat, para pelayan deng samua umat Jemaat GPM Galala-Hative Kecil, Hanoatubun ucap salamat datang par samua basudara yang su bale dar tanah rantau.

Manurut Pandita, panyambutan yang pemerentah negeri dan desa biking, manunjukkan bahwa saluruh elemen masyarakat datang deng satu hati.

“Katong samua satu hati ucap salamat datang par Bapak, Ibu deng basudara yang datang dar tanah rantau. Katong parcaya satiap parjumpaan dalang parsudaraan salalu bawa berkat Tuhan,” kata Pendita Hanoatubun

Pandita biking ingat jemaat deng pasang dalang Mazmur 133 manganai indahnya hidop dalang parsudaraan deng kabarsamaan.

Barkumpul dalang kasih, manurut Pandita, bukang cuma kas datang sukacita, mar juga jadi ruang par rasa berkat deng kahidupan yang Tongala kase.

Tagal itu, Pandita harap saluruh umat iko ambe bageang dalang satiap rangkeang parayaan satu abad Jemaat GPM Galala-Hative Kecil.

“Samoga sukacita deng parsudaraan ini tarus katong rasa sampe saluruh kagiatan ini abis. Parayaan 100 taong ini bukang cuma jadi sabuah acara, mar jadi momentum par lebe kas kuat iman, parsatuan deng palayanan katong par kamuliaan Tongala,” tutupnya.

Par anana cucu yang datang dar jao, parjumpaan itu mangkali cuma satu dua hari mar kenangan bisa tinggal lebe lama.

Di antara selendang yang tagantong di leher, polo ciong, deng kaeng gandong yang talingkar, ada pasang yang kumbali dapa kas inga: jarak boleh kas pisah, mar parsudaraan seng boleh kahilangan rumah. Par ananacucu Galala-Hative Kecil, rumah itu tetap ada. Tampa par pulang. (red/lm/opa)

Azael Collection badiri dar taong 2022, bawa visi kas kanal identitas Maluku malalui produk fashion yang dapa kemas deng elegan dan modern. Itu yang Fransina kastau dalang dialog di Radio Republik Indonesia (RRI), baru-baru ini.

Barbagai produk unggulan macang tas, syal, rante, sampe handbag sakarang su saring iko pamerang, bae di tingkat lokal mopun nasional. Bahkan, produk deng basis kaarifan lokal itu mulai maso pasar dunya.

“Katong pung produk su mulai dapa suka di luar negeri dan barhasil tambus pasar internasional,” ujar Fransina, melansir rri.co.id, Minggu (22/3/2026).

Dia bilang, ekspor Azael Collection su sampe di sajumlah nagara macang Japang, Amerika Serikat, sampe Belanda.

Kaberhasilan ini, lanjut Fransina, seng lapas dara strategi pamasaran yang adaptif deng pake media sosial mopun jaringan relasi yang loas.

Fransina kastau, dia konsisten promo kaunikan material deng desain etnik Maluku ka audiens digital yang lebe loas.

Manurut dia, hal ini jadi bukti bahwa produk lokal pung daya saing tinggi kalo dapa dukung deng manajemen branding yang tepat dan modern.

“Ini bukti produk lokal bisa baku saing di pasar dunya kalo kemas akang deng bae,” kata Fransina.

Salaeng fokus di pangambangan bisnis, Azael Collection juga usung misi sosial deng bardayakan masyarakat lokal, lebe khusus parangpuang deng mahasiswa, dalang proses produksi.

Katarlibatan komunitas ini, manurut Fransina, seng cuma bantu iko kabutuhan pasar, mar juga kase dampak ekonomi langsung par masyarakat sakitar.

Inisiatif itu biking Azael Collection sabage ruang kolaborasi antara palastarian budaya deng paningkatan kasejahteraan warga.

Malalui capean yang dia su dapa akang, Fransina harap Azael Collection bisa menjadi inspirasi par palaku UMKM laeng di Maluku par tarus biking inovasi deng barani tambus pasar dunya.

Dia tekankan, dukungan barkalanjutan dar pemerintah deng masyarakat akang paleng panting par produk lokal tamba lebe barkembang deng mampu kas kanal budaya Maluku sabage identitas barharga Indonesia di mata dunya. (red/kbrn)

Tradisi ini pikol tema “Dari Hitu Amper Siang, Datang Dari Dara, Biar Hidop Deng Kasiang, Asal Kumpol Orang Sudara”. Acara ini su jadi waris turung-tamurung dar masa leluhur dan tarus dapa jaga sampe oras tadi. Akang jadi simbol nilai kabarsamaan dent toleransi yang hidop di Maluku.

Puncak parayaan barlangsung jam 16.00 WIT, ada hadir Raja Negeri Kaitetu jajaran pemerentah negeri, Penjabat Negeri Hative Besar, Penjabat Negeri Tawiri, Bhabinkamtibmas dan Babinsa Negeri Tawiri, Danramil Teluk Ambon, Wakil Wali Kota Ambon Ely Toisutta, S.Sos, Kepala Dinas Pariwisata Provinsi Maluku, anggota DPRD Kota Ambon Zeth Pormes, tokoh adat, tokoh agama, serta masyarakat dar kadua wilayah.

Sabage simbol kabarsamaan, para parwakilan mengikuti tradisi makang ayang deng minong sageru, sabage tanda hati yang tabuka, parsodaraan, dan kasataraan antarwarga.

Rangkeang tradisi ini akang su mulai dar te 1 Januari malalui badendang, yakni kunjungan dar rumah ka rumah, mulai dar rumah Kapala Dusun Hila Kristen ka rumah Raja Negeri Kaitetu, lalu lanjut ka rumah-rumah warga.

Dalang badendang, warga rame-rame manyanyi lagu Maluku, baku balas pantun deng jadi ruang dialog dan panyalaseang parsoalan antarwarga. Seng jarang, dalang suasana pono kakwluargaan itu, warga yang kamuka ada pung masalah lantas baku polo dan baku kase maaf.

Nilai inilah yang tambah kancang dalang puncak parayaan 31 Januari malalui makang patita sabage simbol rekonsiliasi dan kabarsamaan.

Tradisi ini su mulai dar taong 1948, pada masa pemrentahan Matias, dan seng parnah taputus sampe Oras, sabage sejarah hidop yang tarus dapa kas waris par generasi muda.

Dalang sambutan, Wakil Wali Kota Ambon Ely Toisutta bilang, Pesta Tradisi 31 Januari pung makna paleng dalang par kahidupan sosial masyarakat Ambon.

“Pesta tradisi ini mangajarkan nilai paraudaraan, kabarsamaan, deng toleransi. Tradisi badendang, nyanyian Maluku, baku balas pantun sampe makang patita itu samua simbol hidop nilai hal baku jaga, baku maaf, dan baku kas kuat,” ujar Ely.

Ely bilang, samua nilai itu akang satu jalang deng visi Ambon Manise sabage kota yang inklusif, toleran, dan barkalanjutan. Ely juga mangajak masyarakat par bijak deng aros informasi, lalu seng gampang makang cabar par isu-isu yang biking rusak harmoni hidup orang basudara.

Raja Negeri Kaitetu harap, Pesta Tradisi 31 Januari bisa jadi parhatian serius Pemeretah Kota Ambon dan masuk dalang agenda budaya resmi kota.

“Tradisi ini bukang sakadar seremoni, mar partemuan orang sudara. Harapan katong, eso-eso akang bisa jadi ikon budaya Kota Ambon deng dapa dukungan pemerentah agar palaksanaan tambah lebe bae,” ujarnya.

Dia juga tekankan penting manjaga komunikasi internal par jang baku salah mangarti, yang bisa ganggu tradisi yang su dapa jaga puluh-pukuh taong.

Ketua Panitia Pelaksana Andre Pattiasina paleng sanang dan ucap danke banya par samua sudara yang su biking bagus Deng lancar acara. Dia ajak samua par batahang par acara lanjutan jam lapan malang.

Pesta Tradisi 31 Januari bukang sakadar kagiatang tahunan, malaengkang warisan budaya yang jadi pangikat hubungan parsudaraan antara Dusun Hila Tanah Putih dan Negeri Kaitetu. Samboyan adat Maluku, “Potong di kuku rasa di daging”, jadi carmin ikatan orang basudara yang kuat dan tetap hidop sampe tadi ini.

Tradisi ini sakaligus jadi bukti kaarifan lokal Maluku mampu jadi fondasi harmoni sosial di tengah kabaragaman, patut tarus lestari par generasi barikot. (Leo)

Manurut Reza, partemuan itu marupakan bageang dar agenda koordinasi rutin antara Majelis Latupati Kota Ambon dan Pamerentah Kota Ambon, sakaligus jadi momentum strategis par kumbali dorong parjuangan pangakuan negeri adat di tingkat nasional.

“Ini partemuan awal taong deng Pak Wali Kota. Karena sering koordinasi, maka partemuan ini jadi kasampatan par sampekan barbage hal panting, tarutama takait proses pangakuan negeri adat di tingkat nasional,” ujar Reza Maspaitella par wartawan.

Reza tegaskan, sampe sakarang masih ada kakaliruan dalang mamahami konsep negeri adat yang bisa dapa kase sama deng desa ato desa adat. Padahal, sacara historis, negeri-negeri adat di Maluku su eksis jao sabalong Negara Kesatuan Republik Indonesia (NKRI) badiri.

“Negeri adat bukang desa dan bukang pula desa adat. Sabalong NKRI badiri, negeri-negeri adat di Maluku sudah pung pamerentahan yang lengkap, mulai dar pemerintahan adat, hukum adat, wilayah adat, sampe tata kelola sumber daya alam dan ekonomi,” tegas Reza.

Dia manilai, kasalahpahaman itu pung implikasi di pangakuan hukum dan kebijakan negara yang lemah tarhadap sistem pamerentahan adat yang masih hidop dan bajalang sampe oras tadi.

Reza ungkapkan, Majelis Latupati Kota Ambon su lakukan barbage langkah konkret par parjuangkan pangakuan negeri adat, tarmasuk sampekan dokumen formal deng audiensi ka sajumlah kamanterian di tingkat pusat.

“Katong su audiensi ka Kamanterian Hukom, Kamanterian Dalang Negeri, Kamanterian Kabudayaan, serta Kementerian ATR/BPN, par kase pamahaman manyaluruh takait eksistensi, kadudukan hukum, deng tata kelola negeri adat,” jelas Reza.

Manurut Reza, upaya itu par mo tegaskan negeri adat bukang sakadar konsep historis, malaengkang sistem sosial deng pamerentahan yang masih hidop, lebe khusus di Maluku deng Kota Ambon, tarmasuk dalang konteks pangakuan wilayah adat deng hak ulayat.

Salaeng advokasi di tingkat nasional, Majelis Latupati juga tarus koordinasi dengan DPRD dan Pamerentah Kota Ambon takait kasiapan dokumen pandukung masing-masing negeri adat. Salah satu fokus utama oras ini adalah panyusunan dan panyaragaman profil negeri adat.

“Sabageang negeri adat di Kota Ambon su pung profil, sabageang laeng masih dalang proses. Katong dorong panyaragaman isi profil par data satiap negeri bisa tabaca jelas oleh kamanterian, sahingga pambinaan bisa kas sesuai deng potensi dan kaunikan masing-masing negeri,” ungkapnya.

Reza manilai,kalangkapan dan standar profil negeri adat jadi syarat panting par negeri-negeri adat bisa dapa ambe jadi negeri binaan kamanterian.

Takait kamungkinan panandatanganan nota kasapahaman (MoU) antara Majelis Latupati Kota Ambon deng Pamerentah Kota Ambon, Reza nilai kamitraan yang se tabangung salama ini su bajalan bae tanpa harus salalu jadi formal.

“Karja sama ini cukup dalang kasapakatan agenda karja yang jelas, target capaian, deng waktu palaksanaan, sahingga perjuangan pangakuan negeri adat bisa bajalan efektif,” katanya.

Di akhir parnyataan, Reza kumbali tegaskan, pangakuan negeri adat marupakan bageang panting dar jati diri masyarakat adat Maluku dan harus dapa pangakuan formal oleh nagara.

“Negeri-negeri adat su ada jauh sabalong republik ini badiri. Pangakuan nagara bukan hanya soal hukum tartulis, mar juga bantuk panghormatan tarhadap sistem kehidupan adat yang su hidop deng bajalang ratusan taong,” pungkas Reza.

Dia harap, pengakuan itu bisa pung wujud malalui kabijakan khusus sabage turunan Pasal 18B ayat (2) UUD 1945, sabagemana pangakuan yang su negara kase ka daerah-daerah dengan kekhususan tertentu seperti Papua, Yogyakarta, deng Aceh. (Piere)

Prosesi tutup atap rumah tua marupakan salah satu ritual sakral yang pung makna paleng dalang par masyarakat adat Negeri Hila. Tradisi ini bukang sakadar manandai pambangunan fisik rumah adat yang su klar, mar juga jadi simbol parsatuan, masohi, deng kasinambungan nilai-nilai leluhur yang dapa waris dar angkatan ka angkatan.

Prosesi bajalang khidmat sakaligus samarak. Seniman-seniman bawa tarian tradisional sabage bageang dar rangkean prosesi. Tari-tarian itu jadi ekspresi budaya yang refleksikan hubungan erat manusia, adat, deng lingkungan sosial.

Suasana kabersamaan dapa rasa paleng kuat waktu tokoh adat, tetua negeri, deng masyarakat dar barbage soa bakumpul lia prosesi yang jarang-jarang baru biking akang ini.

Dalang prosesi itu, Saadiah Uluputty dapa kqhormatan par iko ambe bageang sacara langsung. Di hadapan para tokoh adat dan masyarakat, Saadiah sampekan parnyataannya yang dapa sambut antusias.

“Beta mo angka atap kadua,” ujar Saadiah, sabage simbol kasiapan par iko dalang ritual adat.

Partisipasi Saadiah ini, manurut warga Hila, akang jadi bentuk panghormatan par nilai-nilai adat deng tradisi lokal. Kahadiran wakil rakyat di tengah prosesi sakral itu, akang sabage wujud nyata kadekatang deng masyarakat.

Dalam keterangannya, Saadiah menegaskan bahwa adat dan tradisi merupakan fondasi penting dalam membangun jati diri masyarakat Maluku.

“Pambangunan seng cuma soal infrastruktur, mar juga tentang manjaga nilai-nilai budaya yang biking kuat kabarsamaan deng identitas daerah,” ujarnya.

Saadiah manilai, kakuatang sosial masyarakat Maluku ada pada tradisi yang hidop dan dapa waris tarus-tarus. Tagal itu, manurut dia, negara deng para pamangku kapantingan parlu hadir par pastikan nilai-nilai itu tetap tajaga.

Prosesi tutu atap rumah tua di Negeri Hila pun barlangsung pono khidmat deng rasa kakaluargaan. Par masyarakat Hila, ritual ini bukang cuma seremoni, mar juga pangingat akang panting rawat warisan budaya sabage bageang dar kahidopan barsama. (red)

Panyarahan sertifikat ini jadi tonggak panting dalang manjaga orisinalitas karya budaya daerah dari potensi klaim sapihak oleh pihak laeng. Dokumen itu dapa kase langsung dar Kepala Bidang Kekayaan Intelektual Kanwil Kemenkum Maluku, Abd Malik Wagola, mawakili Kepala Kanwil, par Bupati Seram Bagian Barat, Asri Arman.

Abd Malik Wagola managaskan, pandaftaran hak cipta Batik Khas SBB marupakan langkah strategis par lindungi kaarifan lokal par jang orang salah pake akang.

“Sertifikat ini bukang sakadar dokumen administratif, mar jadi benteng hukum par aset budaya masyarakat Seram Bagian Barat. Ini panting paskali par identitas lokal seng dapa klaim pihak laeng,” ujarnya.

Dia tambahkan, Kementerian Hukum pung komitmen tarus hadir par kase kapastian hukum par palaku seni, budaya, deng ekonomi kreatif di daerah.

Deng ada parlindungan hukum ini, Batik Khas Seram Bagian Barat sakarang pung posisi tawar yang lebe kuat di pasar ekonomi kreatif. Salaeng jadi identitas resmi daerah, batik ini juga bisa tola nae partumbuhan ekonomi Deng basis budaya.

Bupati SBB Asri Arman sampekan apresiasi tinggi par Kanwil Kemenkum Maluku atas sinergi yang tajalin.

“Ini kado hari jadi yang paleng barharga par Kabupaten Seram Bagian Barat. Katong harap ini jadi pamantik samangat par para pangrajin, par tarus biking inovasi dan biking luas promosi sampe tingkat nasional,” katanya.

Acara panyarahan sertifikat barangsung khidmat. Hadir jajaran Forkopimda, pimpinan organisasi perangkat daerah, deng tokoh masyarakat.

Momentum ini juga pung makna sabage panguatan komitmen barsama par mo jaga deng biking lestari warisan budaya sabage bageang dar pambangunan daerah yang barkelanjutan.

“Batik bukang cuma kaeng mar identitas deng sejarah. Kalo kalola deng bae, akang bisa jadi panggarak ekonomi yang pung daya saing,” pungkas Asri Arman. (red)

Dari nama-nama yang dapa pangge nae panggung vor mo lantik, ada 68 nama yang dapa bataria. Dar jumlah itu, fam Wattimena dapa pangge ulang-ulang sampe 65 kali, untuk 65 orang beda-beda. Cuma ada tiga orang yang pake fam laeng, yang bukan fam Wattimena. Akang bararti, dar 68 pangurus, tarnyata fam Wattimena ada 95,6 parsen, sadangkan fam laeng 4,4 parsen.

Aneh? Seng! Nepotisme? Bukang! Ini wajar deng biasa-biasa sa, tagal organisasi ini akang pung nama saja “Wattimena Satu Moyang”. Su tantu, yang dudu jadi pangurus itu orang-orang Wattimena. Mar memang Wattimena slek dalang organisasi kakarabatan macang bagini, jarang-jarang ada di dunya. Jadi kalo seng ada data laeng par baku banding, rekor Wattimena ini su layak jadi rekor dunya.

Trus ada tiga nama yang sondor pikol fam Wattimena mar bisa maso jadi pangurus. Ini juga wajar, tagal tiga orang itu Hendrik Lewerissa, tambah kaka-ade Rury Moenandar deng Eva Moenandar. Dong tiga memang seng pikol fam Wattimena, mar tetap maso tagal dong tiga juga ana-cucu Wattimena dari garis mama.

Sabanarnya, Pangurus Wattimena Satu Moyang ini mo dapa lantik dar Gubernur Maluku Hendrik Lewerissa. Mar tagal gubernur ada agenda ka Negeri Ouw, Wali Kota Ambon Bodewin Wattimena yang lantik.

Dalang SK Pangurus, ada komposisi Palindung, Pambina deng Panasihat, Katua Umum deng anam wakil katua iko dong pung bidang, ada Sekretaris Umum deng dua wakil, lalu bendahara umum deng wakil.

Ini Dia Susunan Pangurus Lengkap:

Pelindung: Gubernur Maluku Hendrik Lewerissa, Dr Michael Wattimena, Jou Dullah Wattimena, Hi Thaher Wattime

Pembina dan Penasihat: Wali Kota Ambon Bodewin Wattimena, Wakil Bupati SBT M. Miftah Thoha R. Wattimena, Dr Mos Wattimena (Rusia), Dr Marthin Wattimena (Jakarta), Drg Naftali Ebenhaezer Wattimena SH MH, Ongky Calvin Wattimena (Jakarta), Vabian S. Wattimena (Batam), Giovanny Wattimena (Jakarta), Morets Wattimena (Jakarta), Abe Wattimena (Siwang), Rury Moenandar, Herman Wattimena (Siwang), Nus Wattimena (Seri), Neil Wattimena (Siwang)

Ketua Umum: John Wattimena

Wakil Ketua I Bidang Organisasi dan Kaderisasi: Sandy Wattimena
Anggota: Musa Wattimena (Masohi), Angela Wattimena (Hatiwe Besar), Ales Wattimena (Laha), Yeti Sahetapy Wattimena, Jacko Wattimena, Amin Rais Wattimena

Wakil Ketua II Bidang Ekonomi dan Kesejahteraan: Husein Wattimena
Anggota: Muhaimin Wattimena (Masohi), Hengky Wattimena (Hatiwe Besar), Widya Wattimena (Kudamati), dr Grace Thok Prima Wattimena, Ita Wattimena, dr Syafira Khairunnisa Pay Wattimena

Wakil Ketua III Bidang Hukum dan HAM: Wellem Wattimena
Anggota: Lettu Mursalim Wattimena (Waihaong), Fredy Wattimena (OSM), Oden Wattimena (Latuhalat), Hendy Wattimena, Anes Wattimena, Patrik Wattimena

Wakil Ketua IV Bidang Informasi, Komunikasi, dan Publikasi: Pieter Wattimena
Anggota: Yan Wattimena (Masohi), Anthon Wattimena, Ris Wattimena (Latuhalat), Elsye Wattimena, An Wattimena, Demitrio Wattimena

Wakil Ketua V Bidang Sejarah, Adat, dan Budaya: Hengky Wattimena (Pulo Gangsa)
Anggota: Roy Wattimena (Skip), Abubakar Wattimena (Rutah), Frangky Wattimena (Ery), Welly Wattimena, Hein Wattimena (Waiyari), Bobby Wattimena (Lateri).

Wakil Ketua VI Bidang Sosial Agama: Ony Wattimena (Batugajah)
Anggota: Evi Kayadoe Wattimena (Lateri), Azisah Wattimena (Galunggung), Walter Wattimena (Lata), Fia Wattimena, Bobby Wattimena (Rumahtiga), Rio Wattimena (OSM)

Sekretaris Umum: Ampy Wattimena
Wakil Sekretaris Umum: Chairul Wattimena
wakil Sekretaris Umum 2: Eva Moenandar
Bendahara Umum: Inggrid Wattimena
Wakil Bendahara Umum: Abubakar Wattimena (Hatukau)
(Red)

Ada banyak tokoh Wattimena bakupol di Baileo Oikumene, tantu juga deng warga Wattimena Salam-Sarane dari Ambon, Lease, deng Seram.

Katua Panitia Parayaan Syukur Natal 2025 dan Pelantikan Pengurus Basar Wattimena Satu Moyang Syaiful Wattimena dalang laporan, kase tau, kagiatang ini cuma parsiapan satu minggu sa mar su jadi.

Manurut Syaiful, samua ini tagal ada bantuan dari banya tokoh Wattimena di barbage kota di Indonesia.  Dia lantas ure nama-nama tokoh Wattimena satu-satu.

Gubernur Maluku Hendrik Lewerissa seng bisa hadir, mar ada urus Kadis Pemuda dan Olahraga Provinsi Maluku Sandy A. Wattimena par wakili gubernur.  

Gubernur  Hendrik dalang sambutan yang Sandy baca, paleng apresiasi parayaan Har Kajadiang Kaluarga Wattimena Satu Moyang,  sabage forum par biking erat tali hidup orang basudara di Maluku.  Nilai luhur ini jadi pondasi utama par samua.

Gubernur minta Organisasi Kakarabatan Wattimena Satu Moyang dapa minta par iko dalam kagiatan sosial kemasyarakatang, Iko aktif dalang pambangunan masyarakat, deng bisa jadi mitra pemerentah.

Sabalong ibadah syukur yang dapa pimpin dar Pandita Elifas Maspaitella, lebe dolo ada pambakaran lilin oleh Sandy Wattimena, John Wattimena, Syaiful Wattimena, Rudy Moenandar, deng Wali Kota Ambon Bodewin Wattimena.

Ibadah ini masih bajalang. Ada doa, puji-pujian deng musik ukulele, sampe pambacaan puisi.

Khotbah Natal dar Pandita Maspaitella fokus di Silsilah Yesus yang mulai dar Nene Moyang Abraham sabagemana ada di Injil karangan Mateus.

Inti pasang dari nama-nama yang muncol dalang silsilah, ada masa krisis mar, kata Maspaitella, Allah janji deng panuhi janji par Yesus ada datang par bawa dame par saluruh dunya.

Dar silsilah Yesus, Maspaitella bawa refleksi ke silsilah Wattimena, yang macang pohon dari akar sampe cabang ranting yang biking hasil buah-buah bae par kahidopang.

“Tiap orang musti inga apa yang ada dalang pohon kahidupan, inga deng catat carita kahidupan sampe ana cucu,” tegas Maspaitella.

Manurut Maspaitella, Yesus adalah cahaya abadi dalang pohon kahidupan. Dia yang kase barsih akar pahit.

Maspaitella ajak orang tua Wattimena kase unju jalang-jalang tarang par ana cucu. Pangurus Wattimena Satu Moyang dapa minta par pastikan generasi baru Wattimena pung karakter Bae, dame, seng tapica, sabagemena manis paskali dame Wattimena yang satu moyang. (Opa)

Simak berita dan artikel porostimur.com lainnya di Google News

Ikuti yang terbaru di WhatsApp Channel porostimur.com

Executive Producer Timur Nagita Slavina bilang waktu di Ambon, Minggu (14/12/2024) , felem ini seng cuma kas unju aksi laga, mar juga bawa pasang kuat soal hidop basudara yang dapa inspirasi dar nilai-nilai budaya, lebe-lebe Gandong yang kantal dalang hidop orang Maluku, sabage simbol hubungan basudara lintas negeri deng generasi.

“Beta rasa syukur paskali lia panontong gerat skali tarima felem Timur. Dar kamuka beta dapa ajak gabung, beta langsung rasa musti iko kase kontribusi. Felem ini bawa nilai kaluarga deng parsodaraan yang paleng kuat, apa-apa yang manurut beta, akang paleng panting par angka ka layar lebar deng orang banya bisa nontong akang,” kata Nagita saat screening film.

Manurut Nagita, rangkeang special screening biking di 17 kota basar Indonesia, yakni Jakarta, Bandung, Bogor, Semarang, Yogyakarta, Surabaya, Kupang, Lampung, Padang, Pekanbaru, Pontianak, Banjarmasin, Balikpapan, Ambon, Jayapura, Madiun, deng Medan.

Kahadiran felem ini dapat sambutan hangat dar penonton di banya daerah, termasuk di Maluku yang jadi salah satu latar budaya panting dalang filem.

Nagita bilang, kakuatan cearita Timur ada di kabaranian angka nilai-nilai lokal jadi ruh narasi, jadi penonton seng cuma lia adegan laga, mar juga emosi dan makna yang deka deng kehidupan masyarakat Indonesia.

Salah satu ana Ambon yang iko bawa rol dalam felem Timur, Aufa Assegaf, iko bilang dia pung parasaan. Dia mangaku haru deng bangga lia penonton begitu banya pas waktu mo tayang. Manurut Aufa, respons positif dar kota-kota jadi bukti, carita orang basudara deng pangorbanan bisa dapa tarima di dalang masyarakat banya.

“Jujur beta paleng rasa haru. Waktu lia kursi-kursi di MTIX dan TIX ID mulai merah, beta rasa campur aduk antara senang, deg-degan, dan syukur,” ujar Aufa.

“Respons penonton di barbage kota juga luar biasa. Dari Jakarta sampai daerah, energi dan antusiasme sama. Itu bikin katong yang bawa rol rasa parjuangan salama proses syuting banar-banar tabayar,” katanya.

Felem Timur dapa dukung dar BNI dan iko jadwa nanti tayang di samua bioskop Indonesia, mulai 18 Desember 2025. Tiket panayangan hari pertama su tasadia malalui aplikasi MTIX, TIX ID, CGV, deng Cinepolis.

Felem ini jadi tonggak baru par perfilman nasional, khusus yang mo angkat kakayaan budaya daerah macang Gandong Maluku ka layar lebar. (red)

Pejabat- pejabat deng pamangku kapantingan yang iko datang, antara laeng Kasubbag Umum BPK Wilayah XX Maluku, Stenly R. Loupatty, Kapala Kantor Wilayah Kementerian Hukum Maluku Saiful Sahri, pimpinan OPD lingkup Pemerentah Kota Ambon, para pelaku seni, serta tamu undangan laeng.

Ada 17 sanggar seni ambe bageang dalang festival ini, yaitu dua sanggar dar Kota Masohi deng 15 sanggar dar Kota Ambon yang tabage di lima kecamatan.

Kasubbag Umum BPK Wilayah XX Maluku Stenli R. Loupatty jelaskan, Kota Ambon dapa pilih jadi lokasi pelaksanaan Festival Budaya Daerah Maluku 2025 tagal pung nilai filosofis yang kuat sabage pintu maso kaluar Maluku par masyarakat Nusantara deng dunya.

“Sapanjang taong 2025, katong mulai dan biking abis samua kagiatang pamajuan kabudayaan di Kota Ambon. Hal ini sabage bantuk panghargaan par kota yang jadi wajah Maluku,” tegas Stenly dalang sambutan.

Manurut Stenly, festival ini jadi sarana strategis par biking kuat kolaborasi antara BPK Wilayah XX Maluku deng Pemerentah Kota Ambon dalang mandukung Ambon sabage Kota Musik Dunia.

“Festival ini kase ruang ekspresi sakaligus literasi budaya par anana muda, juga biking kuat palestarian seni deng budaya daerah,” ujar Stenly.

Stenly juga tekankan, Festival Budaya Daerah Maluku seng cuma pung orientasi palestarian budaya, mar juga par dukung promosi pariwisata deng basis budaya di Kota Ambon.

Dalang kasampatang itu, Stenly bilang BPK Wilayah XX Maluku sakarang ada biking siap naskah akademik par usul Tahuri jadi warisan budaya dunia ka UNESCO.

Stenly bilang upaya itu parlu dapa dukung dar pemerentah daerah, macang dalang

“BPK seng bisa karja sandiri. Parlu karja sama deng kolaborasi pemerentah daerah, Iko Undang-Undang Pemajuan Kebudayaan,” pungkasnya.

Festival Budaya Daerah Maluku 2025 jadi momentum par biking kuat identitas budaya Maluku sakaligus biking mantap posisi Ambon sabage pusat gerak kebudayaan deng musik dunya dar Timur Indonesia. (Leo)